1.تواريخ 14 - Sindhi Bible

¹ ۽ حيرام، صور جي بادشاهہ، دائود ڏي قاصد موڪليا، ۽ ديودار جا وڻ، ۽ رازا، ۽ واڍا بہ، انهيءَ لاءِ تہ سندس لاءِ هڪڙو گهر جوڙين.

² ۽ دائود ڄاتو تہ خداوند کيس اسرائيل تي بادشاهہ مقرر ڪيو آهي، ڇالاءِ جو هن سندس بادشاهي پنهنجي قوم اسرائيل جي خاطر بلند ڪئي هئي.

³ ۽ دائود يروشلم ۾ وڌيڪ زالون پرڻيو: ۽ دائود کي زيادہ پٽ ۽ ڌيئرون ٿيڻ لڳيون.

⁴ ۽ يروشلم ۾ جيڪي ٻار هن کي ڄاوا، تن جا نالا هي آهن؛ سموع ۽ سوباب، ناتن ۽ سليمان؛

⁵ ۽ ابحار، ۽ السوع، ۽ الفالط؛

⁶ ۽ نوجہ، ۽ نفجہ، ۽ يفيعہ؛

⁷ ۽ اليسمع، ۽ بعليدع، ۽ اليفالط.

⁸ ۽ جڏهن فلستين ٻڌو تہ دائود کي مسح ڪري ساري اسرائيل جو بادشاهہ ڪيو اٿن، تڏهن سڀ فلستي دائود جي تلاش ۾ ٻاهر نڪتا: ۽ دائود اها ڳالهہ ٻڌي ۽ نڪري انهن جي سامهون آيو.

⁹ هاڻي فلستين اچي رفائيم جي واديءَ ۾ ڦرلٽ ڪئي هئي.

¹⁰ ۽ دائود خدا کان پڇيو تہ آءٌ فلستين تي چڙهي وڃان يا نہ؟ ۽ تون انهن کي منهنجن هٿن ۾ ڏيندين يا نہ؟ ۽ خداوند هن کي چيو تہ تون چڙهي وڃ؛ ڇالاءِ جو آءٌ هنن کي تنهنجن هٿن ۾ ڏيندس.

¹¹ تڏهن هو بعل پراضيم ۾ آيا ۽ دائود اُتي هنن کي شڪست ڏني؛ ۽ دائود چيو تہ خدا منهنجن دشمنن کي منهنجي هٿان پاڻيءَ جي بند ڀڄڻ وانگي ڀڃي وڌو آهي. تنهنڪري هن انهيءَ هنڌ جو نالو بعل پراضيم رکيو.

¹² ۽ هنن پنهنجا معبود اُتي ڇڏيا؛ ۽ دائود حڪم ڏنو، جنهن موجب هنن انهن کي باهہ ڏيئي ساڙي ڇڏيو.

¹³ پوءِ فلستين انهيءَ واديءَ ۾ وري ٻيو ڀيرو ڦرلٽ ڪئي.

¹⁴ ۽ دائود وري بہ خدا کان پڇيو، ۽ خدا چيس تہ تون هنن جي پٺيان متان وڃين: هنن کان ڦري پاسو ڪر، ۽ توت جي وڻن جي سامهون هنن تي ڪاهي اچ.

¹⁵ ۽ هيئن ٿيندو تہ جڏهن تون توت جي وڻن جي چوٽين تان ماڻهن جي هلڻ جو آواز ٻڌين، تڏهن جنگ ڪرڻ لاءِ نڪري اچج: ڇالاءِ جو خدا فلستين جي لشڪر کي شڪست ڏيڻ لاءِ تنهنجي اڳيان اُٿي هليو آهي.

¹⁶ ۽ دائود ائين ڪيو جيئن خداوند حڪم ڏنو هوس: ۽ هنن فلستين جي لشڪر کي جبعون کان وٺي جزر تائين شڪست ڏني.

¹⁷ ۽ دائود جي ناموس سڀني ملڪن ۾ پکڙجي ويئي، ۽ خداوند هن جو خوف سڀني قومن تي وڌو.