உன்னத கீத் 6 - Saurashtra Bible (BSI)

எருசலேம் பெட்கின்

¹ “பெட்கினும் பெ⁴ளி ஸிங்காரு, துரெ ப்ரேமுடு கோட் ஜேட்யாஸ்? கொங்குட் ஜியாஸ்? அமி மெளி துரெ ஸெங்கொ அவி வெக்கி ஸவெஸ்.”

ப்ரேமி

² “மொர் ப்ரேமுடு வஸ்னா ஜட்கின் ஹொட்ரிய அபுல் பூ²லு வனமுக் ஜீரியாஸ். தேட் தெனு பூ²ல் தொட்லேத் அபுல் பெண்டு கும்புனுக் சொவ்ரராஸ்.

³ மீ மொர் ப்ரேமுடுக் பாத்யம்; மொர் ப்ரேமுடு மொகொ பாத்யம். லீலி புஷ்பமுன் ஹொட்ரிய அபுல் வனமும் தெனு அபுல் பெண்டு கும்புனுக் சொவ்ரராஸ்.

ப்ரேமுடு

⁴ மொர் ப்ரேவூ, தூ திர்ஷா பட்ணம்ஸோன் ஸிங்கார். எருசலேம்ஸோன் வேன் ஸிங்கார். ஜ²ண்டாவ் தெர்லி யுத்தமுக் ஜாரிய வீருடு தூ.

⁵ துரெ தொளான்கெ ஸிங்கார் மொகொ ஜெகிஞ்சிதியொ. துரெ தொஸ்கா கேஸ் கீலேயாத் தொங்கரும்ரீ: ஹுத்ரரிய மெ:டி பெண்டுன்ஸோன் ஸிங்கார்.

⁶ கேஸ் செக்கிலி ஆங்கு து⁴வ்தி கெட்டர் ஹிங்கரிய பெய்லு பெண்டுன்ஸோன் துரெ தா³துன் ஸிங்கார்கன் ஸே. ஒண்டெ தா³த் மெளி அட்டா திட்டம் நீ:ஸ்தக் செர்மான்கன் ஸே.

⁷ முஸுங்கு தகில்ரியெ துரெ க³ல்பொ கச்சம்பா பொள்ளானுக் நிகர்.

ப்ரேமுடு

⁸ ஒண்டெ ரஜாக் 60 (ஷாட்) பெய்லான்; 80 (அஸி) ஹத்³த³ளின் ர:வாய். ஜுகு கென்ன பெட்கின் மெளி ர:வாய்.

⁹ மொர் கவ்து³கீ, மஹா உத்தமி! தெகொஸோன் ஸிங்கார் துஸ்ர கொன்னின் நீ: அபுல் அம்பாகெ ஒண்டே பெட்கி. பெட்கின் தெகொ மெச்சிலியாஸ். ரணின்கின், ரஜாகெ ஹத்³த³ளின் தெகொ ஆஸீர்வாத் கெர்யாஸ்.

¹⁰ தூ கோன்? சாந்துஸோன் ஸிங்கார்; ஜொலிஞ்சரிய பா²ரு சுக்கொ; ஸுரித்ஸோன் ப்ரகாஸ்; ஜ²ண்டாவ் ஹாதும் தெர்லி யுத்தமுக் ஜாரிய வீருடுஸோன் ஸேனா தூ கோன்?

ப்ரேமி

¹¹ மீ பா³தாம் ஜாடுனுக் ஸாஸ்தக் ஜீஸ். லோத் க²ணிபு தாமும் பிக்கெ பொள்ளானுக் ஸாஸ்தக் ஜீஸ். திராட்செ ஜட்கினும் பூ²ல் அவ்டிஸ்கீ, த³ணிம் பொள்ளா ஜட்கின் பூ²ல் ஸொட்டிஸ்கீ மெனி ஸாஸ்தக் ஜீஸ்.

¹² மீ ஸொந்தோஷும் பு³டிஸ்; காய் ஸொந்தோஷ் மெனஸ்த மொகொ களையெனி. மீ மொர் ரஜொ ஸெந்தொ ரெத்தும் பிஸிலி ஜாரியஸோன் லகெஸ்.

¹³ பிரி ஆவ், பிரி ஆவ்; சூலமித்தியா பெட்கி! பிரி ஆவ்; பிரி ஆவ்; அமி தொகொ ஸனொ. துமி ககொ தெகொ ஸனொ? யுத்த வீருடுன் ம:ஜார் நச்சரிய சூலமித்தியா பெட்கிக் துமி ககொ ஸனொ?