நீதி வத்தான் 14 - Saurashtra Bible (BSI)

¹ புத்திஸாலி பெட்கி அபுல் குடும்பமுக் பந்தய்; புத்தி நீ:ஸ்த பெட்கி அபுல் குடும்பமுக் நாஸ் கெரய்.

² நீதிமான் தேவுக் தக்கி ஜிவய்; அநீதிமான் தேவுக் அலக்ஷ்யம் கெரரெஸ்.

³ ம:ட்டபோன் பொந்துலரிய மு:டொ, புத்தி நீ:ஸ்தக் வத்தொ கெரி கா⁴ம் கள்ளய். புத்திகன் வத்தொ கெரரிய ஞானி அபுலுக் கபட்ளய்.

⁴ ஜுண்ணஸ்தக் கொ³ருன் ரா:னா ஜியெதி க³தின் ரிக்தகன் ரா:ய். கொ³ருன் ரி:யெதி தான்யமுன் வேன் அப்பய்.

⁵ நிஜ்ஜம் ஸாக்ஷி ஸங்கஸ்தெனொ சொட்டொ வத்தொ கெர்னா; சொட்டொ ஸாக்ஷி ஸங்கஸ்தெனொ தோண் போர் சொட்டொ வத்தோஸ் கெரய்.

⁶ கேலி கெரஸ்தெனொ ஞானுக் வெக்கெத் மெளி தெக்கி தெர்னா. புத்திமான் ஞானுக் ஸெணம் ஸிக்குலய்.

⁷ மு:டான்ஜோள் ஸவஸ் தொவ்லுங்கன்; தெங்கொஜோள் துமி கொன்னி ஸிக்குலன் முஸுனா.

⁸ ஞானி புத்திகன் ஜிவி அபுலுக் கபட்ளய். மு:டொ புத்தி நீ:ஸ்தக் ஜிவி ஹொங்கி ஜாய்.

⁹ பாப் கெரஹோனா மெனி ஸங்கஸ்தெங்கொ மு:டான் கேலி கெரன். நீதிமான் தேவுக் ஒப்பயெதானுக் ஜிவி ஸொந்தோஷ்கன் ரா:ய். (நீதி 10:23)

¹⁰ ஸொந்தோஷ்கீ விசார்கீ தெல்லெ துரெ மொன்னுகூஸ் களாய். துஸ்ரதெனு தெல்லெ பாத்யம் கெல்லன் முஸுனா.

¹¹ துஷ்டுடுகெ ஸந்ததி நாஸ் ஹோய். நீதிமான்கெ குடும்பம் ஸுபிக்ஷம்கன் ரா:ய்.

¹² மென்க்யானுக் சொக்கட்யெஸோன் லகரிய வாட் ர:வாய். தெல்லெ வாட்கீ தெங்கொ மொரனுக் பெல்லி ஜேடய். (நீதி 16:25)

¹³ பராட் ஸொந்தோஷ்கன் அஸெத் மெளி மொன்னும் விசார் ர:வாய்; ஸொந்தோஷ் ஜேட்யெதி பீர் விசார் அவ்டய். (பிர 2:2)

¹⁴ துஷ்டுடு துஷ்ட க்ரியானுக் தகெ ப²லன் கள்ளய். சொக்கட் மெனிக் சொக்கட் க்ரியானுக் தகெ ப²லன் கள்ளய்.

¹⁵ கானும் பொடரிய வத்தான் அஸ்கி, நிஜ்ஜம் மெனி ஹெப்ப³ட் ஹவ்டய். விவேகி நிஜ்ஜம்கன் காய் சலெஸ் மெனி களைளய்.

¹⁶ ஞானி ஜுகு ஜாக்ரதகன் ரா:ய். ஹீன் கெரஸ்தக் தக்கய் . மு:டொ வேன் ராக்³ பொடய். அஸ்கிதெமாம் தொஸ்கொ தேய்.

¹⁷ ஸெணம் ராக்³ பொடஸ்தெனொ மதிஹீன்கன் சல்த கெல்லய். ஞானி ராக்³ பொட்னாஸ்தக் புத்திகன் சல்த கெல்லய்.

¹⁸ ஹெப்ப³ட்னுக் மதிஹீனமூஸ் பாத்யம்; விவேகி வேன் ஞான் பொந்தய்.

¹⁹ சொக்கட்தெங்காக் கெனம் கெரஸ்தக் ஹீனுடுன் வெக்கிலி அவன்; நீதிமான்கெ தயவு அபுல்நுக் அப்புனொ மெனி துஷ்டுடுன் தெங்கொ தா³ரும் ர:கிலேத் ரா:ன்.

²⁰ தூ துர்பள்கன் ரி:யெதி துரெ ஸிங்கதி மெளி துரெஜோள் ப்ரேவ்கன் ரா:னா. தனவானுனுக் ஜுகு ஸிங்கதின் ரா:ன்.

²¹ அந்யத்ரானுக் அவ்மான் கெரஸ்த பாப்; துர்பள்னுக் ஹேது கெரஸ்தெனொ ஸொந்தோஷ்கன் ரா:ய்.

²² ஹீன் கெரஸ்தெனொ வாட் தடி ஜாரெஸ்; ஹிதம் கெரஸ்தெகொ தேவுகெ கிருபொகின் தயவு அப்பய்.

²³ ப்ரயாஸ் பொடஸ்தெகொ ப²லன் அப்பய். தெ³ண்டு வத்தொ கெரெதி தரித்ரு அவய்.

²⁴ ஞானினுக் வெக்கிலி ஐஸ்வர்யம் அவய். மு:டானுக் வெக்கிலி மதிஹீனூஸ் அவய்.

²⁵ நிஜ்ஜம் ஸாக்ஷி ஸங்கஸ்தெனொ ஜீவுக் கபடய். சொட்டொ ஸாக்ஷி ஸங்கஸ்தெனொ ஹொங்கடய்.

²⁶ தேவுக் தக்கி ஜிவஸ்தெனொ தைர்யம்கன் ரா:ய். தெனொகின், தெகொ பில்லல்னு பத்ரம்கன் ரா:ன்.

²⁷ தேவுக் தக்கி ஜிவஸ்தேஸ் ஜீவுக் ஆதார். தெல்லெ மெனிகுக் மொரனு தா⁴க் ரா:னா. (யோவா 4:10,14)

²⁸ ஜுகு தேஸுனுக் ராஜ்ஜலரிய ரஜாக் வேன் கெனம் அப்பய். மென்க்யான் ரா:னா ஜியெதி ரஜாக் கெனம் அப்புனா.

²⁹ ஸாந்த குண்ணு ஸேஸ்தெனொ மஹா ஞானி. பெ⁴ளி ஸெணம் ராக்³ பொடஸ்தெனொ மதிஹீன்கன் சல்த கெல்லய். (நீதி 16:32; யாக் 1:19)

³⁰ மொன்னும் நிம்மதி ரி:யெதி ஆங்கு ஸவுர்யம்கன் ரா:ய். பொட்ஜாள் குண்ணு ஹட்காக் கய்தய்.

³¹ துர்பள்னுக் ஹிம்ஸொ கெரஸ்தெனொ தெகொ உருகெரெ தேவுக் அவ்மான் கெரரெஸ். தரித்ருக் ஹேது கெரஸ்தெனொ தேவுக் கெனம் கெரரெஸ். (நீதி 17:5; மத் 25:40,45)

³² துஷ்டுடு அபுல்நு கெரரிய ஹீன் கார்யமும் ஸம்டி நாஸ் ஹோய். நீதிமான் மொரஞ்ஜாரிய லோபுளாம் மெளி தேவ்ஜோள் நொம்கெகன் ரா:ய்.

³³ புத்திஸாலிகெ மொன்னும் ஞான் வஸி ரா:ய். மதிஹீனனுக் கொன்னி களானா.

³⁴ நீதீ, ராஜ்யமுக் கெனம் அவடய். பாப்கீ ராஜ்யமுக் அவ்மான் அவடய்.

³⁵ ஸமர்துகன் சல்த கெல்லியெ அதிகாரிக் ரஜொ மெச்சுலய். அபுலுக் அவ்மான் அவடெ மெனிகுக் தெனொ தண்டன தேய். (மத் 24:45,47)