நீதி வத்தான் 13 - Saurashtra Bible (BSI)

¹ புத்திஸாலி பெடொ அபுல் பா³புகெ புத்திமதினுக் அய்கய்; கேலி கெரஸ்தெனொ புத்திமதினுக் கானும் கள்ளுனா.

² சொக்கட்யெ வத்தொ கெரெதி சொக்கட்யெ சலய். துஷ்ட க்ரியான் கெரெதீஸ் துஷ்டுடுக் ஹோங்கு அவய்.

³ ஜீபுக் அண்சுலஸ்தெனொ ஜிவ்னமுக் கபட்ளரெஸ். ஜீபுக் அண்சுல்னாஸ்தெனொ ஜிவ்னமுக் நாஸ் கெல்லரெஸ்.

⁴ கெண்டல்பொந்தி க²னொ மெனி ஹவுர் பொடெத் மெளி தெகொ கொன்னி அப்புனா. ப்ரயாஸ் பொடி காம் கெரஸ்தெனொ க²ய்தி த்ருப்திகன் ரா:ய். (நீதி 10:4)

⁵ நீதிமான் சொட்டொ வத்தாக் த்³வேஷ் கெரய். துஷ்டுடு விருதா வத்தான் கெரி லாஜ்கின் அவ்மான் அவடய்.

⁶ உத்தமுடுக் நீதி பத்ரம்கன் கபடய். பாப் கெரரிய துஷ்டுடு ஹுடொ க⁴லி பொடய்.

⁷ ம:ட்ட தனவான்ஸோன் சல்த கெல்லரிய துர்பள் மெளி ஸே. துர்பள்ஸோன் சல்த கெல்லரிய ம:ட்ட தனவான் மெளி ஸே. (நீதி 12:9; லூக் 12:20,21)

⁸ தனவானுக் தக்கடெதி ஹன்னவ் தீ³ அபுல் ஜீவுக் கபட்ளன் முஸய். துர்பள் கொங்கினாக் தக்கஸ்தக் வேஸ் நீ:

⁹ உடாவ் தி³வொஸோன் நீதிமான் ப்ரகாஸிஞ்சய். துஷ்டுடுகெ தி³வொ ஸெணம் ம:வ்லாய்.

¹⁰ ஹகம் பொடரிய மு:டொ ஜெடொ அவடய். ஆலோசனானுக் அய்கரிய மெனிக் ஞானிகன் ரா:ய்.

¹¹ நஜ்ஜெ வாடும் செர்சரிய ஹன்னவ் ஸெணம் ஸெஜ்ஜய். ப்ரயாஸ் பொடி காம் கெரஸ்தெனொ ஸுபிக்ஷம்கன் ஜிவய்.

¹² ஜுகு தின்னுகன் ர:கிலேத் ரீ: அப்புனா ஜியெதி மொன்னு முட்டியய். ப்ரேவ் பொடெஸ்தெ அப்பெதி ஜுகு ஸொந்தோஷ் லகய்.

¹³ தேவுகெ வத்தானுக் அவ்மான் கெரஸ்தெனொ நாஸ் ஹோய். ஆக்³ஞான்தானுக் ஜிவஸ்தெகொ ஆஸீர்வாத் அப்பய்.

¹⁴ ஞானின்கெ போதனான் ஜீவ் தேரிய பனிகஸு; மொரனு க²ணிம் பொட்னாஸ்ததானுக் தெல்லெ தொகொ கபடய்.

¹⁵ புத்திகன் சல்த கெல்லஸ்த ஜீவுக் கபடய். துரோகிகெ ஜிவ்னம் நாஸ் ஹோய்.

¹⁶ விவேகி கொப்பிம் புத்திகன் சல்த கெல்லய். மு:டொ புத்தி நீ:ஸ்தக் சல்த கெல்லரெஸ் மெனி அஸ்கினாக் களடய்.

¹⁷ நொம்கெ துரோக் கெரரிய தூது ப்ரசன அவடய். சொக்கட் தூது ஸமதான் அவடய்.

¹⁸ புத்திமதினுக் அய்குனாஸ்தெனொ துர்பள் ஹொயி அவ்மான் பொந்தய். புத்திமதினுக் அய்கஸ்தெனொ கெனம் பொந்தய்.

¹⁹ ஒப்பயெஸ்தெ அப்பெதி மொன்னு ஸொந்தோஷ் லகய்; நஜ்ஜெ வாடுக் ஸொட்டி அவஸ்தக் மு:டாக் மொன்னு ரா:னா.

²⁰ ஞானின் ஸெங்கொ ஐக்யம் தொவ்லஸ்தெனொ ஞானிகன் ரா:ய். மு:டான் ஸெங்கொ மிளஸ்தெனொ ஹிம்ஸொ பொந்தய். (ஏசா 32:6)

²¹ பாபினுக் தெர்மிலி ஹிணயம் அவய். நீதிமானுக் ப³ஹுமான்கன் சொக்கட்யெ அப்பய்.

²² நீதிமான்கெ ஆஸ்தி தெகொ நத்யா நத்தினினுக் மெளி அப்பய். பாபின்கெ ஆஸ்தி நீதிமானுக் அவி செரய்.

²³ துர்பள்னுகெ சேனும் தான்யமுன் ஜுகுயெ ஹொடய். நியாவ் நீ:ஸ்தக் சல்த கெல்லரிய மெனிகுக் கொன்னி அப்புனா.

²⁴ பெ³த்தம்ஹால் ஹன்னாஸ்தெனொ அபுல் பில்லல்னுக் த்³வேஷ் கெரரெஸ்; பில்லல்னுஜோள் ப்ரேவ்கன் ஸேஸ்தெனொ தெங்கொ ஹனி ஸெர்க கெரரெஸ். (நீதி 19:18; 22:15; 23:13; 29:15,17)

²⁵ நீதிமானுக் த்ருப்திகன் க²வ்ணம் அப்பய். துஷ்டுடு பூக்ஹால் பாத பொந்தய்.