நீதி வத்தான் 12 - Saurashtra Bible (BSI)

¹ ஞானி புத்திமதினுக் நிகொகன் அய்கய். மு:டொ புத்திமதினுக் த்³வேஷ் கெரய்.

² உத்தமடுன்ஜோள் பகவான் ப்ரேவ்கன் ரா:ன். ஹீனுடுனுக் தேவ் தண்டன தேன்.

³ துஷ்டுடு புலோகுர் நிள்சி ரா:னா. நீதிமான் மூள்ஸோன் நிள்சி ரா:ய்.

⁴ குணஸாலி பெய்ல் அபுல் அம்புலாக் க்ரீடுகன் ஸே. அபுல் அம்புலாக் அவ்மான் அவடரிய பெய்ல், தெகொ ஹட்காக் காரிய க்ஷயரோகிகன் ஸே. (ரூத் 3:11; நீதி 31:23; 1 கொரி 11:7)

⁵ நீதிமான்கெ யோசனான் நியாவ்கன் ரா:ய். துஷ்டுடுகெ ஆலோசனான் வஞ்சனகன் ரா:ய்.

⁶ துஷ்டுடுகெ வத்தான் மொரன் அவடய். நீதிமான்கெ வத்தான் ஜீவுக் கபடய்.

⁷ துஷ்டுடுகெ ஸந்ததி நாஸ் ஹோய்; நீதிமான்கெ தோ²ர் நிள்சி ரா:ய்.

⁸ ஞானிகன் ஜிவெதி மென்க்யான் மெச்சுலன். புத்தி நீ:ஸ்த மு:டொ அவ்மான் பொந்தய்.

⁹ கொ⁴ம்மொ பா⁴த் நீ: மெனெத் மெளி, பராட் ம:ட்டபோன் பொந்துலரிய மெனிக் ஸொம்மர், ப்ரயாஸ் பொடி காம் கெரரிய துர்பள் கித்ககி மேட்.

¹⁰ நீதிமான் அபுல் மூகுனுக் ப்ரேவ்கன் ஸீலய். துஷ்டுடுகெ மொன்னும் கொடூரம் வேன் ரா:ய். (உபா 25:4)

¹¹ ப்ரயாஸ் பொடி பெய்ரு காம் கெரஸ்தெகொ த்ருப்திகன் க²வ்ணம் அப்பய். மு:டொ வீணுடுனுக் வெக்கிலி ஜாய்.

¹² துஷ்டுடு துஷ்ட க்ரியானுக் கெர்லேத் ரா:ய். நீதிமான் கொப்பிம் சொக்கட்யெ கெரய்.

¹³ துஷ்டுடு அபுல் தோணு வத்தாமூஸ் ஸம்டய். நீதிமான் ப்ரசனாம்ரீ: ஸொடுவி பொந்தய்.

¹⁴ துரெ தோணு வத்தோஸ் தொகொ கபடய். துரெ க்ரியானுக் தகெ ப²லன் தொகொ அப்பய்.

¹⁵ மு:டொ அபுல்நு ஸங்கெஸ்தேஸ் ஸெர்க மெனி மெனய். ஞானி துஸ்ரதெங்கா ஆலோசனானுக் கள்ளய். (நீதி 3:7; 9:9; 21:2)

¹⁶ மு:டொ ஸெணம் ராக்³ பொடய்; ஞானி தூஷன வத்தானுக் பர்வ கெர்னா.

¹⁷ ஸத்யவான்கெ ஸாக்ஷி நீதிக் நிள்சடய். சொட்டொ ஸாக்ஷி அநீதிக் வாட் தெக்கடய்.

¹⁸ தெவ்டதெங்கா வத்தொ மொன்னுக் மொடய்; ஞானிகெ வத்தான் மொன்னுக் பரொ கெரய்.

¹⁹ நிஜ்ஜம் வத்தொ கொப்பிம் நிள்சி ரா:ய். சொட்டொ வத்தொ ருவ்வொ கெ⁴டீஸ் ரா:ய்.

²⁰ துஷ்டுடுகெ மொன்னு போர் வஞ்சன ரா:ய். ஸமதான் கெரடஸ்தெகா மொன்னும் ஸொந்தோஷ் வேன் ரா:ய்.

²¹ நீதிமானுக் ஒண்டெ ஹீன் மெளி அவ்னா. துஷ்டுடுகெ ஜிவ்னம் பூரா ப்ரசனகன் ரா:ய். (நீதி 12:13; 2 தீமோ 4:18)

²² சொட்டொ வத்தொ பகவானுக் வெகுட் லகய். நிஜ்ஜம் வத்தொ பகவானுக் ப்ரேவ் லகய். (நீதி 6:17; 11:20)

²³ ஞானி அபுலுக் அஸ்கி களாய் மெனி ம:ட்டபோன் பொந்துனா. மு:டொ மதிஹீன்கன் சல்த கெல்லரெஸ் மெனி அஸ்கினாக் களடய்.

²⁴ ப்ரயாஸ் பொடி காம் கெரஸ்தெனொ அதிகாரிகன் ரா:ய். பன்மல்கெ பொடஸ்தெனொ ப⁴ந்தைத்கன் ரா:ய்.

²⁵ மொன்னு விசார் ஸொந்தோஷ் ஜவடய். சொக்கட் வத்தான் ஸொந்தோஷ் அவடய். (நீதி 15:13)

²⁶ நீதிமான் அபுல் ஸிங்கதினுக் ஆலோசன தேய். துஷ்டுடு அஸ்கினாக் துர்ஆலோசன தேய்.

²⁷ ஹந்தஸ்தக் பன்மல்கெ பொடஸ்தெகொ பா⁴த் அப்புனா. ப்ரயாஸ் பொடி காம் கெரஸ்தெகொ த்ருப்திகன் க²வ்ணம் அப்பய்.

²⁸ நீதிமான்கெ வாட் சொக்கட் ஜிவ்னமுகெ வாட். தெல்லெ வாடும் மொரனு தா⁴க் ரா:னா. (யோவா 3:36; 4:36; 8:51; 11:26; 1 கொரி 15:54; கலா 6:8)