ஸங்க்²யாகமம் 8 - Saurashtra Bible (BSI)

தி³வொ பொவ்ரஸ்த

¹ பகவான் மோசேஜோள்,

² தூ ஆரோன்ஜோள் இஸனி ஸங்கி: “தூ த²ந்திலி தி³வாகெ ஸது தி³வா தொளானுக் லகி, ஸொம்மர் பொங்குட் ஹுஜாள் பொடஸ்ததானுக் தோ²வ்.”

³ பகவான் மோசேஜோள் ஸங்கெதானுக் ஆரோன் தி³வொ லகி, ஸொம்மர் பொங்குட் ஹுஜாள் பொடஸ்ததானுக் தொவெஸ்.

⁴ த²ந்திலி தி³வானுக் ஜுகு ஸிங்கார்கன் ஸொந்நா தகடும் கெரி ஹொத்யாஸ். பகவான் அபுல்ஜோள் ஸங்கெதானுக் மோசே கெரடி ஹொதெஸ். (யாத் 25:31)

லேவியர்னுகெ ப்ரதிஷ்டெ

⁵ பகவான் மோசேஜோள்,

⁶ “இஸ்ரயேல்னும் லேவி கோத்ருக் அலக்க³ கெரி தெங்கொ ஹொல்லெ பனி சிலுஞ்சி ஸுத்தி⁴ கேர். காமெனெதி தெனு பரிஸுத்த டேராம் ஸேவொ கெர்னொ.

⁷ திஸோஸ் தெனு அபுல் ஆங்கு பூரா கேஸுக் சிவ்லி, அபுல் வஸ்தர்னுக் குஞ்ஜி ஸ்நான் கெல்லந்தக். தெப்போஸ் தெனு ஸுத்தி⁴ ஹோன்.

⁸ தெனு ஒண்டெ து³டாக்கின், தேலும் குஸிரெ நி:னாவ் பீடும் கெரெ தான்ய பலிக் கள்ளி அவந்தக். தூ பாபு பரிஹார பலி தேஸ்தக் அங்குண்டெ து³டாக் கள்ளி ஆவ்.

⁹ பல்சொ அஸ்கின் இஸ்ரயேல்னு பரிஸுத்த டேராகெ தாருக் அவந்தக். தேட் லேவியர்னு மெளி அவந்தக்.

¹⁰ தெப்பொ இஸ்ரயேல்னுகெ கொ³ம்டான் லேவியர்னு ஹொல்லெ அபுல் ஹாதுனுக் தொவி ப்ரதிஷ்டெ கெரந்தக்.

¹¹ பல்சொ ஆரோன் மெளி லேவியர்னுக் ப்ரதிஷ்டெ கெரய். இஸ்ரயேல்னு தேவுக் செடன் பலிகன் தேரிய தட்சணாக் நிகர்கன் லேவியர்னு ரா:ன். பகவானுக் ஸேவொ கெரஸ்தக் இஸ்ரயேல்னுகெ ஸார்புகன் லேவியர்னு ரா:ன்.

¹² லேவியர்னு அபுல் ஹாதுனுக் தீ³ கொ³ருனுகெ தொஸ்கான் ஹொல்லெ தொவந்தக். லேவியர்னுகெ பாபுனுக் பரிஹார்கன் ஒண்டெ கொ³ருகின், தகன பலிகன் அங்குண்டெ கொ³ருக் பலி தெ³னொ.

¹³ பல்சொ தூ லேவியர்னுக்கின், ஆரோனுக்கின், தெகொ பெடானுக் மொர் பலி பீடம் வெதுர் ஹிப்பாட். பகவானுக் செடன் பலிகன் தேரிய தட்சணகன் தெங்கொ ப்ரதிஷ்டெ கேர்.

¹⁴ இஸனி தூ இஸ்ரயேல்னும் லேவியர்னுக் அலக்க³ கெர்னொ. லேவியர்னு மொகோஸ் பாத்யம்.

¹⁵ மொர் ஸந்நிதிம் ஸேவொ கெரரிய லேவியர்னுக் ஸுத்தி⁴ கெரி ப்ரதிஷ்டெ கேர். தெனு செடன் பலிகன் தெனி பொடெ தட்சணாக் நிகர்கன் ஸே. தேஹாலிம் அத்தொ தெனு மொர் பரிஸுத்த டேராகெ காமுன் கெரஸ்தக் பிஸ்தர் அவாய்.

¹⁶ இஸ்ரயேல்னுகெ பெ²ய்லட் பெடானுக் ப⁴ர்தி எல்லெ லேவியர்னுக் மீ பாத்யம் கெல்ரியொ. மொகொ ஸேவொ கெரரிய பாக்யம் எங்கொ தெனி பொடரியொ.

¹⁷ இஸ்ரயேல்னும்கின், மூகுனும் உஜரிய பெ²ய்லட்யெ பூரா மொகோஸ் பாத்யம். காமெனெதி துமி எகிப்தும் ர:த, எகிப்தியர்னுகெ பெ²ய்லட் பெடானுக்கின், பெ²ய்லட் மூகுனுக் மீ மொரடெஸ்; ஹொயெதி இஸ்ரயேல்னுகெ பெ²ய்லட் பில்லல்னுக்கின், மூகுனுகெ பெ²ய்லட்னுக் மீ பாத்யம் கெல்லியெஸ். (யாத் 13:2)

¹⁸ இஸ்ரயேல்னுகெ பெ²ய்லட் பெடானுக் ப⁴ர்தி மீ லேவியர்னுக் பாத்யம் கெல்ரியொ.

¹⁹ இஸ்ரயேல்னும்ரீ: லேவியர்னுக் மீ அலக்க³ கெரி ஆரோன்ஜோள்கின், தெகொ பெடான்ஜோள் தெ⁴ரும்கன் தீட்ரியொ. இஸ்ரயேல்னுகுர்சி தெனு பரிஸுத்த டேராம் ஸேவொ கெரன். மென்க்யானுகெ பாபுனுக் ப்ராயஸித்தம்கன் பலி தேன். த்யெலெந்தால் இஸ்ரயேல்னு பரிஸுத்த டேரா லெகுத்த அவ்னொ பொடெத் மெளி தெங்கொ கொன்னி ஹீன் அவ்னா” மெனி ஸங்க்யாஸ்.

²⁰ மோசேகின், ஆரோன்கின், அஸ்கி இஸ்ரயேல்னு லேவியர்னுக் ப்ரதிஷ்டெ கெர்யாஸ். பகவான் மோசேஜோள் ஸங்கெதானுக் தெனு கெர்யாஸ்.

²¹ லேவியர்னு அபுல் வஸ்தர்னுக் குஞ்ஜி ஸ்நான் கெல்லியாஸ். ஆரோன் தெங்கொ செடன் பலிகன் பகவான்கெ ஸந்நிதிம் தெங்கொ ப்ரதிஷ்டெ கெரெஸ். தெனு ஸுத்தி⁴ ஹோஸ்தக் ஆரோன் பாபு ப்ராயஸித்த பலி தியெஸ்.

²² தெக பல்சொ ஆரோன்கின், தெகொ பெடான்கெ வத்தாதானுக் பரிஸுத்த டேராம் காம் கெரஸ்தக் லேவியர்னு பிஸ்தர் ஜியாஸ். பகவான் மோசேஜோள் ஸங்கெதானுக் லேவியர்னு ப்ரதிஷ்டெ கெர்னி பொட்யாஸ்.

²³ பகவான் மோசேஜோள்,

²⁴ “(பஞ்சவீஸ்) 25 ஒர்ஸுகின், தெக வேன் ஒர்ஸு ஸேஸ்தெ லேவியர்னு பரிஸுத்த டேராகெ காமுனுக் கெருவாய்.

²⁵ (பந்நாஸ்) 50 ஒர்ஸு பூர்தி ஹொயாஸ்தெனு கொன்னி காம் கெர்னான்.

²⁶ ஹொயெதி தெனு பரிஸுத்த டேராம் ந:ன்ன ஒர்ஸு லேவியர்னுக் ஹேது கெருவாய். தெனு ஸுயம்கன் கொன்னி காமுனுக் கெரஹோனா. இஸனி லேவியர்னுகெ காம் காயொ மெனி தூ நிர்ணயம் கெரி தே” மெனி ஸங்க்யாஸ்.