ஸங்க்²யாகமம் 5 - Saurashtra Bible (BSI)

இஸ்ரயேல்னுகெ ஸுத்தி⁴

¹ பகவான் மோசேஜோள்,

² இஸ்ரயேல்னும் கொங்கதி கோ²ட் ரோக்தீ, ரெகத் லுச்சாரிய ரோக்தீ, மொடாக் ஹாத் தெ⁴ரெஹால் அண்டுகன்தீ ரி:யெதி தெகொ கா³மு பராட் தொவ்டி. (லேவி 13:46; ஸங்க் 12:14)

³ மென்க்யானும் கோன் அண்டுகன் ரி:யெத் மெளி தெங்கொ கா³மு பராட் தொவ்டி. தும்ரெ ம:ஜார் மீ ஸேஸ்தெஹால் துமி ஜிவரிய தாமுனுக் ஜுகு ஸுத்தி⁴கன் தொவ்லுனொ.

⁴ பகவான் மோசேஜோள் ஸங்கெதானுக் இஸ்ரயேல்னு அஸுத்துடு⁴னுக் கா³மு பராட் தட்டிட்யாஸ்.

சூக்வான்ஜோள் க²டரிய அபராத்

⁵ மோசேஜோள் பகவான்,

⁶ தூ இஸ்ரயேல்னுஜோள் இஸனி ஸங்கி: தும்ராம் கோன்தி கொங்கதி விரோத்கன் காய் பாப் கெரெத் மெளி, தெனொ பகவானுக் நொம்கெ துரோக் கெரரெஸ்.

⁷ தேஹாலிம் தெனொ கெரெ பாபுக் ஒப்புல்னொ. அநீதி பொந்தெ மெனிகுக் அபராத் ஹன்னவ் ஸெங்கொ பாஞ்சும் ஒண்டெ வடொ வேன் தெ³னொ.

⁸ ஹொயெதி அநீதி பொந்தெ மெனிக் மொஜ்ஜி ரி:யெதி, தெல்லெ ஹன்னவுக் கள்ளஸ்தக் லெகுத்தா ஸொந்தம் கொன்னின் நீ:மெனெதி தெல்லெ அபராத் ஹன்னவ் பகவானுக் பாத்யம் ஹொயி, ப⁴ட்டர்னுக் ஜீ செரய். தீநா:ஸ்தக் தெகொ பாபுக் ப்ராயஸித்த பலிகன் ஒண்டெ மெ:டி பெண்டுக் பலி தெ³னொ. தெப்பொ பகவான் தெகொ பாபுக் க்ஷமொ கெரன்.

⁹ இஸ்ரயேல்னு ஆரத்தி பலிகன் தியெ தட்சணான் பூரா ப⁴ட்டர்னுக் பாத்யம் ஹோய்.

¹⁰ அஸ்கி தட்சணான் ப⁴ட்டர்னுக் பாத்யம் ஹோய்; துஸ்ர கொன்னின் தெல்லெ தட்சணானுக் கள்ளஹோனா.

தல்லொ பெய்லுகெ தா³வா

¹¹ பகவான் மோசேஜோள்,

¹² இஸ்ரயேல்னுஜோள் தூ இஸனி ஸங்கி: ஒண்டெதெகா பெய்ல் துஸ்ர தல்லொ ஸெந்தொ ஸவஸ் தொவ்லி அபுல் அம்புலாக் நொம்கெ துரோக் கெரெதி,

¹³ துஸ்ர தல்லொ தெகொ ஸெந்தொ ஸவஸ் தொவ்லி ஸேஸ்தெ தெகொ அம்புலாக்தீ, துஸ்ர கொங்கினாக்தீ களானா ர:வாய். தெனொ பாப் கெரிஸ் மெனி ஸங்கஸ்தக் கொன்னி ஸாக்ஷி நீ:ஸ்தக் மெளி ர:வாய்.

¹⁴ ஹொயெதி அபுல் பெய்ல் பாப் கெரி ரா:ய்கீ மெனி தல்லாக் ஸெந்தேவ் லகெதி,

¹⁵ தெனொ அபுல் பெய்லுக் ப⁴ட்டர்ஜோள் பெல்லி ஜனொ. தெனொ ஜாஸ்தவேளு ஏப்பா அட்டா³ம் தெ³ஸ்ஸும் ஒண்டெ வடொ பார்லி பீடுக் கள்ளி ஜனொ. ஹொயெதி தெமாம் வஸ்னா வஸ்துனுக்தீ, தேல்தீ ஸொடஹோனா. காமெனெதி ஸெந்தேவ் பொடஸ்தெனொ நிஜ்ஜம்யெ களைளஸ்தக் தேரிய தான்ய பலிகன் எல்லெ ஸே. எல்லெ பீடுக் பலி பீடமுக் கள்ளி ஜானான்.

¹⁶ ப⁴ட்டர் தெல்லெ பெய்லுக் பகவான்கெ ஸந்நிதிம் ஹிப்படி,

¹⁷ ஒண்டெ மத்தி எனமும் ருவ்வொ தீர்து ஸொடி, பரிஸுத்த டேராகெ ஸந்நிதிம்ரீ: ருவ்வொ மத்தி ஹெடி தெல்லெ பனிம் தகய்.

¹⁸ பல்சொ தெல்லெ பெய்லுகெ தொஸ்கா கேஸுக் ஸொவ்டி ஸோட் மெனி ஸங்கிதி, தான்ய பலிகன் தெனி பொடெ தெல்லெ பார்லி பீடுக் தெல்லெ பெய்லுகெ ஹாதும் தொவ்தி, ஸாபன அவடரிய கொடு பனி ஸேஸ்தெ பிங்கணிக் ப⁴ட்டர் அபுல் ஹாதும் தொவ்லய்.

¹⁹ தெல்லெ பெய்ல்மெனிக் சூக் கெரிஸ்கீ நீ:கீ மெனி களைளஸ்தக் தெகொஜோள் ஸெத்து கள்ளி, தெகொ ஸீ ப⁴ட்டர் மென்னொ ஸேஸ்தெ காயொமெனெதி: “தூ துரெ அம்புலாக் நொம்கெ துரோக் கெர்ரினி மெனெதி எல்லெ பனி தொகொ கொன்னி ஹீன் கெர்னா.

²⁰ ஹொயெதி தூ துஸ்ர தல்லொ ஸெந்தொ ஸவஸ் தொவ்லி துரெ அம்புலாக் நொம்கெ துரோக் கெரி தூ தொகொ காட் கெல்லி ரி:யெதி.

²¹ பகவான்கெ ஸாபன துரெ ஹொல்லெ அவய். அத்தெங்குட் தொகொ பில்லொ உஜுனாஸ்ததானுக் துரெ கெர்பு ஸுக்கய். போட் புக்கய்.

²² ஸாபன அவடரிய எல்லெ பனிக் தூ பெனொ; தூ பாப் கெரி ரி:யெதி துரெ போட் புக்கய். தொகொ பில்லொ உஜுனா” மெனி மெனய். தெல்லெகொ பெய்ல் மெனிக், ‘ஆமென், ஆமென்’ மெனி மெனய்.

²³ ப⁴ட்டர் எல்லெ ஸாபன வத்தானுக் ஒண்டெ கள்ஜமும் லிக்கி கொடு பனிம் து⁴வி நஸ்துகய்.

²⁴ ஸாபன அவடரிய தெல்லெ கொடு பனிக் தெல்லெ பெய்ல்மெனிக்ஜோள் ப⁴ட்டர் தேய். தெனொ பாப் கெரி ரி:யெதி, கொடு பனி தெகொ போடும் ஜீ துனொ அவடய்.

²⁵ தான்ய பலிகன் தீரிய பீடுக் ப⁴ட்டர் தெல்லெ பெய்ல்மெனிக்ஜோள்ரீ: கள்ளி ஜீ, பகவான்கெ ஸந்நிதிம் செடன் பலிகன் ஸமர்பண கெர்திகி பலி பீடம் ஹொல்லெ தொவய். (லேவி 8:27)

²⁶ ப⁴ட்டர் தெல்லெ தான்ய பலிகெ பீடும்ரீ: ஒண்டெ மூட் ஹெடி பலி பீடமும் தகி ஜெளய். தெக பல்சொ தெல்லெ பெய்ல்மெனிக்ஜோள் தீரிய கொடு பனிக் பே மெனி ஸங்கய்.

²⁷ தெனொ அபுல் அம்புலாக் நொம்கெ துரோக் கெரி ரி:யெதி, ஸாபன அவடரிய கொடு பனி தெகொ போடும் ஜீ துனொ அவடய். தெகொ போட் பு²க்கி கெர்பு ஸுக்கய். தெனொ ஸாபன பொந்தி ஜிவய்.

²⁸ ஹொயெதி தெல்லெ பெய்ல் பாப் கெர்னாஸ்த உத்தமி மெனெதி தெகொ ஒண்டெ ஹீன் மெளி அவ்னா. தெகொ கெர்பு கொள்டி ஸுக்குனா. போட் புக்குனா.

²⁹ ஒண்டெ பெய்ல் அபுல் அம்புலாக் நொம்கெ துரோக் கெர்திகி துஸ்ர தல்லொ ஸெந்தொ ஸவஸ் தொவ்லி ரி:யெதி தெகொ கெர்னொ ஸேஸ்தெ நியதின் எல்லேஸ்.

³⁰ ஒண்டெ தல்லொ பொட்ஜாளும் அபுல் பெய்லுக் ஸெந்தேவ் பொடெத் மெளி தெனொ தெகொ பகவான்கெ ஸந்நிதிக் பெல்லி அவாய். ப⁴ட்டர் எல்லே ப்ரமாண்தானுக் தெகொ ஸெந்தேவுக் திர்சடய்.

³¹ பெய்ல் பாப் கெரி ரி:யெதி தண்டன பொந்தய். ஹொயெதி தெல்லெ சூகு பொரொ அம்புலொ ஹொல்லெ அவ்னா. (லேவி 20:17-20)