யோசுவா 18 - Saurashtra Bible (BSI)

உராவ் ஸேஸ்தெ தாமுனுக் வடொ கெல்லராஸ்

¹ இஸ்ரயேல்னு அஸ்கி தேஸுனுக் ஜெகிஞ்செ பல்சொ, அஸ்கி மென்க்யான் ஒண்டேஸ்கன் சீலோ மெனரிய பட்ணமும் மிளாஸ். தேட் பகவான்கெ பரிஸுத்த டேரா பந்த்யாஸ்.

² அங்குன் இஸ்ரயேல்னும் ஸாத் கோத்ருனுக் தெங்கொ மெனி பாத்யம் ஹொயெ தாமுனுக் வடொ கெரி தீ³ ஹொத்யானி.

³ தேஹாலிம் யோசுவா இஸ்ரயேல்னுக் ஸீ, “தும்ரெ ஒள்ட்யான் பாய்ம் பொடெ தேவ் பகவான் தும்கொ தீரிய தேஸுக் பாத்யம் கெல்லுனாஸ்தக் அங்குன் கித்க தின்னு துமி கெண்டல்பொந்திகன் ரா:ன்.

⁴ துமி ஒண்டொண்டெ கோத்ரும் தீ²ன் தீ²ன்தெங்காக் வெக்கி ஹெடுவொ. தெங்கொ மீ தட்டுஸ். தெனு ஜீ, தேஸ் பூரா சுட்டு பிரி ஸீ, தெங்கொ தெங்கொ பாத்யம் ஹொயெ தாமுன் கோட்ரீ: கித்க தூர் மெனி இவர்கன் லிக்கி மொர்ஜோள் தேந்தக்.

⁵ இஸனி லெ:க்க ஹெடன் ஜாஸ்தெனு தேஸுக் ஸாத் வடொகன் லெ:க்க ஹெட்னொ. யூதா கோத்ரு தக்ஷிண் திக்கு தாமும் ர:னொ. யோசேப்பு குடும்பமுன் உத்தர் திக்கு தாமும் ர:னொ.

⁶ திஸனி தேஸுக் ஸாத் வடொகன் லெ:க்க பி⁴டி லிக்கி, மொர்ஜோள் தெவொ. பல்சொ மீ ஏட் பகவான்கெ ஸந்நிதிம் தும்ரெ வெதுர் சீட் தகி ஸவு.

⁷ லேவியர்னுக் பாத்யம்கன் கொன்னி தாமுன் தெனி பொட்னா. காமெனெதி பகவானுக் ப⁴ட்டர்கன் ஸேவொ கெரஸ்தேஸ் லேவியர்னுக் அப்பரிய பாக்யம்” மெனி மெனெஸ். பகவான்கெ ஸெவ்கன் மோசே ஆக்³ஞொ தகெதானுக் காத், ரூபன், மனாசே கோத்ரும் ஹத்து³வாஸ் மென்க்யான் யோர்தான் நெத்திக் க²வ்நஸ் திக்கும் அபுல்நுக் பாத்யம் ஹொயெ தாமுனுக் வடொ கெல்லி ஹொத்யாஸ்.

⁸ அபுல் வத்தாதானுக் தேஸுக் லெ:க்க ஹெடஸ்தக் ஜாரிய மென்க்யான்ஜோள், “துமி ஜீ தேஸுக் சுட்டுபிரி ஸீ, ஸெர்ககன் லெ:க்க ஹெடி சீலோ பட்ணமும் மொர்ஜோள் அனி தெவொ; மீ பகவான்கெ ப்ரஸன்னமும் சீட் தகி ஸீ, தாமுனுக் வடொ கெரி தொ³வு” மெனி ஸங்கெஸ்.

⁹ திஸோஸ் தெல்லெ மென்க்யான் ஜீ தேஸுக் சுட்டு பிரி ஸியாஸ். அஸ்கி பட்ணமுனுக்கின், கிராமமுனுக் செர்சி ஸாத் வடொகன் லெ:க்க பி⁴டி ஒண்டெ கச்சாதும் லிக்கிலியாஸ். தெனு சீலோ பட்ணமும் வஸி ஹொதெ யோசுவாஜோள் கள்ளி அனி தியாஸ்.

¹⁰ யோசுவா பகவான்கெ ப்ரஸன்னமும் சீட் தகி ஸீ, இஸ்ரயேல்னுக் தெங்கொ தெங்கொ கோத்ரு லெ:க்காதானுக் தாமுனுக் வடொ கெரி தியெஸ்.

பென்யமீனுக் தியெ தாமுன்

¹¹ முல்லா சீட் பென்யமீன் கோத்ருக் பொடெஸ். தெங்கொ அப்பெ தாம் யூதா கோத்ருக்கின், யோசேப்பு கோத்ருக் ம:ஜார் ஹொதெஸ்.

¹² தெங்கொ தாம் உத்தர் திக்கும் யோர்தான் நெத்தி ரீ: எரிகோ பட்ணமுக் உத்தர் திக்கும் ஜீ, தேட்ரீ: ஒஸ்த திக்கும் தொங்கர் பொங்குட் பெத்தாவேன் வளுராண் லெங்குகின்,

¹³ தேட்ரீ: தக்ஷிண் திக்கும் பெத்தேல் மெனரிய லூசு பட்ணமு பொங்குட் ஜீ அதரோத்அதாரு மெனரிய தாமுக் கா²ல் பெத்தோரோனுக் தக்ஷிண் திக்கும் ஸேஸ்தெ தொங்கர் லெங்கு ஜாரெஸ்.

¹⁴ பல்சொ தேட்ரீ: ஒஸ்த திக்கும் ஸேஸ்தெ தொங்கருக் தக்ஷிண் திக்கு பெத்தோரோனுக் வெதுர் யூதா கோத்ருக் பாத்யம் ஹொயெ கீரியாத்யெபாரிம் மெனரிய கீரியாத்பாகால் தாமும் முஸரியொ. எல்லேஸ் பென்யமீன் கோத்ருக் ஒஸ்த திக்குகன் ஹொதெஸ்.

¹⁵ தக்ஷிண் திக்கும் கீரியாத் எயாரீம் தாம்ரீ: ஹர்ம்பம் ஹொயி ஒஸ்த திக்கும் நெப்தோவா பனிகஸு லெங்கு ஜாரெஸ்.

¹⁶ தீநா:ஸ்தக் ரெபாயீம் க²ணிபு தாமுக் உத்தர் திக்கும் இன்னோம் க²ணிபு பொங்குட் ஸேஸ்தெ தொங்கர் லெங்கு ஜாரியொ. தேட்ரீ: எபூசியர்னுகெ தொங்கரு கா²ல் தக்ஷிண் திக்கும் இன்னோம் க²ணிபு லெகுத்த என்ரோகேல் பட்ணம் லெங்கு ஜாரியொ.

¹⁷ திஸோஸ் உத்தர் திக்கும் அதும்மீம் மெனரிய மிட்டா தாமுக் வெதுர் கெலிலோத் லெகுத்த ரூபன்கெ பெடொ போகனுக் பாத்யம்கன் தெனி பொடெ தாம் லெங்கு ஜாரியொ.

¹⁸ தேட்ரீ: உத்தர் திக்கும் தொங்கரு கா²ல் அராபா மெனரிய தாமுக் வெதுர் ஜீ பீர் அரபா லெங்கு ஹுத்ரய்.

¹⁹ அங்குன் தெல்லெ தாம் பெத்தொகிலா தாமுக் உத்தர் திக்கும் தடி மீடு ஸெந்துருக் உத்தர் திக்கும் யோர்தான் நெத்திக் தக்ஷிண் திக்கும் முஸரெஸ். எல்லேஸ் தக்ஷிண் திக்கும் ஸேஸ்தெ தாமுன்.

²⁰ க²வ்நஸ் திக்கும் யோர்தான் நெத்தி தமரியொ. எல்லெ தாமுன் பென்யமீன் கோத்ருக் பாத்யம்கன் அப்பெஸ்.

²¹ பென்யமீன் கோத்ருன் பாத்யம் கெல்லியெ பட்ணமுகெ நாவுன்: எரிகோ, பெத்தொகிலா, கேசீஸ் க²ணிபு

²² பெத்அரபா, செமராயிம், பெத்தேல்,

²³ ஆவீம் பாரா, ஓப்ரா,

²⁴ கேப்பார்அமோனாய், ஒப்னி, காபா மெனரிய பா³ர் பட்ணமுன்கின், தெக சுட்டுர் ஸேஸ்தெ கிராமமுன்.

²⁵ கிபியோன், ராமா, பேரோத்,

²⁶ மிஸ்பே, கெப்பிரா, மோத்சா,

²⁷ ரெக்கேம், இர்பெயேல், தாராலா,

²⁸ சேலா, ஏலேப், எருசலேம் மெனரிய எபூசி, கீபெயாத், கீரேயாத் மெனரிய சொவ்து பட்ணமுன்கின், தெக சுட்டுர் ஸேஸ்தெ கிராமமுன். பென்யமீன் கோத்ருக் பாத்யம்கன் அப்பெஸ். (யோசு 15:8)