யோசுவா 10 - Saurashtra Bible (BSI)

யோசுவா எமோரியர்னுக்‍ ஜெகிஞ்சஸ்த

¹ யோசுவா எரிகோ பட்ணமுக்கின், தெகொ ரஜாக் நாஸ் கெரெஸோன் ஆயி பட்ணமுக்கின், தெகொ ரஜாக் நாஸ் கெர்ரியொ மெனி எருசலேமுகெ ரஜொ அதோனிசேதேக் அய்கினி பொடெஸ். கிபியோனியர்னு மெளி இஸ்ரயேல்னு ஸெந்தொ ஸமதான் கெல்லி தெங்கொ ம:ஜார் ஜிவராஸ் மெனி அய்கினி பொடெஸ்.

² தேஹாலிம் எருசலேம் ரஜொகின், தெல்லெ பட்ணமு மென்க்யான் ஜுகு தக்யாஸ். காமெனெதி ரஜான் ராஜ்ஜலெ பட்ணமுனும் கிபியோன் ம:ட்ட பட்ணம்கன் ஹொதெஸ். ஆயி பட்ணம் ஸொம்மர் ம:ட்டகன்கின், ராணுவ பலம் வேன் ஸேஸ்தெனுகன் ஹொத்யாஸ். திஸொ ரீ:மெளி தெனு இஸ்ரயேல்னுஜோள் சொட்டொ வத்தொ ஸங்கி ஸமதான நியமந்த் கெல்லி ஜிவராஸ்.

³ தேஹாலிம் எருசலேம் ரஜொ அதோனி சேதேக், எபிரோன் ரஜொ ஓகாம், யர்முத் ரஜொ பீராம், லாகீசு ரஜொ யப்பியா, எக்லோன் ரஜொ தெபீர் மெனஸ்தெங்கொ ஒண்டெ ஸமசார் ஸங்கி தட்டியெஸ்.

⁴ “கிபியோனியர்னு ஸெந்தொ யுத்தம் கெரஸ்தக் அம்கொ துமி அவி ஹேது கெருவொ. காமெனெதி தெனு யோசுவா ஸொந்தொகின், இஸ்ரயேல்னு ஸெந்தொ ஸமதான நியமந்த் கெல்லிரியாஸ்” மெனி ஸங்கி தட்டியெஸ்.

⁵ திஸோஸ் எமோரிய ஸந்ததிம்ரீ: அவெ எபிரோன் யர்முத், லாகீசு, எக்லோன் பட்ணமு ரஜான் பாஞ்ச்தெனு ஒண்டேஸ்கன் மிளி அபுல் யுத்த வீருடுன் ஸெந்தொ கிபியோனுக் விரோத்கன் யுத்தமுக் ஜியாஸ்.

⁶ தெப்பொ கிபியோனியர்னு கில்காலும் வஸி ஹொதெ யோசுவாஜோள், “அமி தும்ரெ ஸெவ்கன்; அம்கொ ஹாத் ஸொட்டுங்கன். தயவு கெரி ஸெணம் அவி அம்கொ கபடுவொ. அம்கொ ஹேது கெருவொ. காமெனெதி தொங்கர் தேஸும் ஜிவரிய எமோரிய ரஜான் அஸ்கின் அம்கொ விரோத்கன் யுத்தம் கெரஸ்தக் ஒண்டேஸ்கன் மிளி அவ்ரியாஸ்” மெனி ஸங்கி தட்டியாஸ்.

⁷ தென்னவேங்கு யோசுவா கில்காலும்ரீ: அபுல் யுத்த வீருடுன் ஸெந்தொகின், பலம் பொரெ ராணுவ வீருடுன் ஸெந்தொ நிகிளி ஜியெஸ்.

⁸ பகவான் யோசுவாக் ஸீ, “தெங்கொ ஹவ்டி தூ தக்குங்கொ. தெங்கொ மீ துரெ ஹாதும் ஒப்பிஞ்சி தீடியொ. தெங்காம் கொன்னின் தொகொ விரோத்கன் ஹிப்பன் முஸுனா” மெனி மென்யாஸ்.

⁹ தேஹாலிம் யோசுவா கில்காலும்ரீ: நிகிளி ராத் பூரா ப்ரயாண் கெரி, கிபியோனியர்னுக் ஜீ தெக்கெஸ். தெங்கொ கபடஸ்தக் எமோரியர்னுக் விரோத்கன் ரி:யெவந்நு யுத்தமுக் ஜியெஸ்.

¹⁰ எமோரியர்னு இஸ்ரயேல்னுக் ஸீதி, தக்கி பெதிரி பொடி ஒண்கஸ்ததானுக் பகவான் சல்த கெர்யாஸ். இஸ்ரயேல்னு கிபியோனும் ஜுகு எமோரியர்னுக் செக்கி மொரட்யாஸ். அங்குன் ஜுகுதெங்காக் தெனு பெத்தொரோனுக் ஜாரிய வாடும் அசெக்கா, மக்கெதா கா³ம் லெந்து தொவ்டிலி ஜீ தெர்மி ஸொட்யாஸ்.

¹¹ தெனு இஸ்ரயேல்னுஜோள்ரீ: அபுல் ஜீவுக் கபட்ளஸ்தக் பெத்தொரோனுக் தமி ஜாஸ்தவேளு பகவான் தெங்கொ ஹொல்லெ அசெக்கா கா³ம் லெந்து ம:ட்ட கு³ண்டா பொவுஸுக் பொடட்யாஸ். இஸ்ரயேல்னு பட்டயமுன்ஹால் செக்கி மொரட்யாஸ்தெ ஸொம்மர் கு³ண்டா பொவுஸும் ஸம்டி மொர்யாஸ்தெனூஸ் வேன்.

¹² தேவ் எமோரியர்னுக் இஸ்ரயேல்னு ஜோள் ஒப்பிஞ்சி தியெ தின்னும் யோசுவா பகவான்ஜோள் ப்ரார்தன கெர்திகி, அஸ்கி இஸ்ரயேல்னுகெ தொளா வெதுர் “ஸுரிது! தூ கிபியோனும் ஹிப்பி ரா: சாந்து! தூ அயலோன் க²ணிபு தாமும் ஹிப்பி ரா:” மெனி உத்தர் தகெஸ். (நியா 12:12)

¹³ இஸ்ரயேல்னு அபுல் விரோதினுக் ஜெகிஞ்சஸ்த லெங்கு ஸுரித்கின், சாந்து ஹள்ளுனா பொள்ளுனாஸ்தக் ஹிப்பி ஹொதெஸ் மெனி யாசேர்கெ புஸ்தவும் லிக்கினி பொட்ரியொ நா:கீ? ‘ஸுரித் ம:த்தி³ ஹபாளும் ஒண்டெ தின்னு பூரா ஹள்ளுனாஸ்தக் திஸோஸ் ஹிப்பி ஹொதெஸ்’. (2 சாமு 1:18; ஏசா 38:8)

¹⁴ ஒண்டெ மெனிகுகெ ப்ரார்தனாக் பகவான் அய்கி, இஸ்ரயேல்னு யுத்தம் கெரி முஸஸ்த லெங்கு ஸுரிதுக்கின், சாந்துக் தெனு ம:த்தி³ ஹபாளும் ஹிப்படெ தெல்லெ தின்னுஸோன் எக முல்லொ கொப்பிம் ஹொதிரியெனி. (யாத் 14:14)

¹⁵ பல்சொ யோசுவாகின், தெகொ ஸெந்தொ ஹொதெ அஸ்கி யுத்த வீருடுன் கில்காலுக் பிரி ஜியாஸ்.

பாஞ்ச் ரஜானுக் யோசுவா ஜெகிஞ்சஸ்த

¹⁶ பல்சொ தெல்லெ பாஞ்ச் எமோரிய ரஜான் அபுல் ஜீவுக் கபட்ளஸ்தக் தமி ஜீ, மக்கெதா கா³மும் ஒண்டெ கொ⁴பாம் ஜீ லிக்கில்டியாஸ்.

¹⁷ தெனு மக்கெதா கொ⁴பாம் லிக்கிலி ஸே மெனி யோசுவாக் களட்யாஸ்.

¹⁸ தெப்பொ யோசுவா, “கொ⁴பா தாரும் ம:ட்ட தெய்டானுக் ஜ²கி தொவொ. தெனு கொட்டி ஜேட்னாஸ்தக் தெங்கொ தெரஸ்தக் தெவ்டதெங்காக் கெத்தி³ தேட் ஹிப்பி ர:வடுவொ.

¹⁹ உராவ்ஜெனு கோ³ஸ் ஹிப்பி ரா:னாஸ்தக் விரோதினுக் தெர்மிலி ஜீ தெருவொ. தெனு பட்ணம் பிஸ்தர் ஜேட்னாஸ்தக் ஸீலுவொ. தும்ரெ தேவ் பகவான் தும்ரெ ஹாதும் தெங்கொ ஒப்பஞ்சி தீரியாஸ்” மெனி மெனெஸ்.

²⁰ யோசுவாகின், இஸ்ரயேல்னு விரோதினுக் சொக்கட் ஹனி செக்கி மொரட்யாஸ். தெங்கொஜோள்ரீ: சுங்கி தெவ்டதெனு பட்ணம் பிஸ்தர் தமி ஜேட்யாஸ்.

²¹ பல்சொ இஸ்ரயேல்னு அஸ்கின் யோசுவா ஹொதெ மக்கெதா கா³முக் பிரி ஜியாஸ். இஸ்ரயேல்னுக் விரோத்கன் வத்தொ கெரஸ்தக் கொங்கினாக் தைர்யம் ஹொதெனி.

²² பல்சொ யோசுவா, “கொ⁴பா தா³ருக் ஹுடி தெல்லெ பாஞ்ச் ரஜானுக் மொர்ஜோள் பெல்லி அவொ” மெனி ஸங்கெஸ்.

²³ திஸோஸ் தெனு கொ⁴பாக் ஹுடி எருசலேம், எபிரோன், யர்முத், லாகீசு, எக்லோன் பட்ணமு ரஜான் பாஞ்ச்தெங்கொ பராட் பெல்லி அவ்யாஸ்.

²⁴ தெனு தெல்லெ ரஜானுக் யோசுவாஜோள் பெல்லி ஜியாஸ். தெப்பொ யோசுவா இஸ்ரயேல்னு அஸ்கினாக் பொவி ஒண்டேஸ்கன் மிளடெஸ். யோசுவா ஸெந்தொ யுத்தமுக் ஜியெ அதிபதினுக் பொவி, “துமி லெகுத்த ஜீ, தும்ரெ பாய்ஞ்னுக் எல்லெ ரஜானுகெ கெ³ளாம் தொவொ” மெனி ஸங்கெஸ். தெனு திஸோஸ் கெர்யாஸ்.

²⁵ யோசுவா தெங்கொ ஸீ, “தாக் திகில் நீ:ஸ்தக் தைர்யம்கன் ர:வொ. தும்ரெ விரோதின் அஸ்கினாக் பகவான் இஸோஸ் நாஸ் கெரன்” மெனி மெனெஸ்.

²⁶ தெக பல்சொ, யோசுவா தெல்லெ பாஞ்ச் ரஜானுக் செக்கி மொரடெஸ். தெங்கொ ஸரீர்னுக் பாஞ்ச் ஜாடுனும் தெந்துஸ்தி வீள்டொ லெங்கு லொம்படி தொவெஸ்.

²⁷ ஸுரித் பு³டரிய கெ⁴டி யோசுவா தெல்லெ ஸரீர்னுக் க²ல்லெ ஹுத்ரடெஸ். எக முல்லொ தெங்கொ ஜ²கி தொவி ஹொதெ கொ⁴பாம் விஸ்தகிதியாஸ். கொ⁴பா தாரும் ம:ட்ட தெய்டானுக் துளடி ஜ²கி தொவ்யாஸ். எல்லெ தின்னு லெங்கு தெல்லெ தெடூஸ் ஸே.

²⁸ யோசுவா தெந்துஸ்தி மக்கெதா பட்ணமுக்கின், ரஜாக் சுட்டுக⁴லி தெரெஸ். ரஜாக் செக்கி மொரடெஸ். பட்ணமு பிஸ்தர் ஹொதெ கொங்கினாக் ஜீவ் ஸெந்தொ ஸொடெனி. எரிகோ ரஜாக் கெரெஸோன் மக்கெதா ரஜாக் மெளி செக்கி மொரடெஸ்.

²⁹ யோசுவாகின், தெகொ ஸெந்தொ ஹொதெ இஸ்ரயேல்னு அஸ்கின் மக்கெதா கா³ம்ரீ: லிப்னா மெனரிய கா³முக் ஜீ யுத்தம் கெர்யாஸ்.

³⁰ பகவான் லிப்னா கா³மு மென்க்யானுக்கின், ரஜாக் இஸ்ரயேல்னுஜோள் ஒப்பிஞ்சி தியாஸ். தேட் கொங்கினாக் ஸொட்னாஸ்தக் அஸ்கினாக் செக்கி மொரட்யாஸ். எரிகோ பட்ணமு ரஜாக் நாஸ் கெரெஸோன் எகொ மெளி நாஸ் கெர்யாஸ்.

³¹ யோசுவாகின் தெகொ ஸெந்தொ ஹொதெ இஸ்ரயேல்னு அஸ்கின் லிப்னா கா³ம்ரீ: லாகீசு கா³முக் ஜீ தேட் யுத்தம் கெர்யாஸ்.

³² பகவான் லாகீசு கா³முக் மெளி இஸ்ரயேல்னுஜோள் ஒப்பிஞ்சி தியாஸ். யுத்தம் ஹர்ம்பம் கெரெ தி³வந்தி யோசுவா தெல்லெ பட்ணமுக் ஜெகிஞ்செஸ். தேட் ஸேஸ்தெ அஸ்கினாக் செக்கி தகெஸ். லிப்னா பட்ணமு மென்க்யானுக் நாஸ் கெரெஸோன் எல்லெ பட்ணமுக் மெளி நாஸ் கெரெஸ்.

³³ தெப்பொ கேசேர் கா³மு ரஜொ ஓராம், லாகீசு பட்ணமு ரஜாக் ஹேது கெரஸ்தக் ஜியெஸ். யோசுவா தெகொ மெளி தெரி மொரடெஸ். தெகொ கா³மு மென்க்யானுக் மெளி ஹனி மொரடெஸ்.

³⁴ யோசுவாகின், தெகொ ஸெந்தொ ஹொதெ இஸ்ரயேல்னு அஸ்கின் லாகீசு பட்ணம்ரீ: எக்லோனுக் ஜியாஸ்.

³⁵ தெனு தெந்துஸ்தீஸ் தெல்லெ பட்ணமுக் தெரி லாகீசு பட்ணமுக் நாஸ் கெரெஸோன் தேட் ஸேஸ்தெ அஸ்கினாக் செக்கி மொரட்யாஸ்.

³⁶ யோசுவாகின், தெகொ ஸெந்தொ ஹொதெ இஸ்ரயேல்னு எக்லோன் பட்ணம்ரீ: எபிரோனுக் ஜீ தெல்லெ பட்ணமுக் மெளி நாஸ் கெர்யாஸ்.

³⁷ தெல்லெ பட்ணமு ரஜாக்கின், தேட் ஸேஸ்தெ அஸ்கி மென்க்யானுக் செக்கி மொரட்யாஸ். கொங்கினாக் ஜீவ் ஸெந்தொ ஸொட்யானி. எக்லோன் பட்ணமுக் நாஸ் கெரெஸோன் எல்லெ பட்ணமுக்கின், தேட் ஹொதெ அஸ்கி ஜீவுனுக் நாஸ் கெர்யாஸ்.

³⁸ யோசுவாகின், தெகொ ஸெந்தொ ஹொதெ இஸ்ரயேல்னு தெபீருக் பிரி ஜீ தெல்லெ பட்ணமுக் ஹன்யாஸ்.

³⁹ தேட் ஸேஸ்தெ ரஜாக்கின், அஸ்கி கா³முனுக் ஜெகிஞ்ச்யாஸ். தெங்கொ அஸ்கினாக் செக்கி மொரட்யாஸ். பட்ணமும் ஹொதெ கொங்கினாக் ஜீவ் ஸெந்தொ ஸொட்யானி. லீப்னா பட்ணமுக்கின், ரஜாக் நாஸ் கெரெஸோன் தெபீருகெ யுத்த வீருடுனுக்கின், ரஜாக் நாஸ் கெர்யாஸ்.

⁴⁰ யோசுவா அஸ்கி தொங்கர் தேஸுனுக் ஜெகிஞ்செஸ். தக்ஷிண் திக்குகெ வளுராணுக்கின், ஸமபு⁴ஞிக்கின், க²ணிபு தாமுனுக்கின், தெக ரஜானுக் ஜெகிஞ்செஸ். இஸ்ரயேல்கெ தேவ் பகவான் ஆக்³ஞொ தகெஸோன் தெங்கொ அஸ்கினாக் நாஸ் கெரி தகெஸ்.

⁴¹ யோசுவா காதேஸ்பர்னேயா தாம்ரீ: காசா பட்ணம் லெங்குகின், கோசேன் தேஸ் ரீ: கிபியோன் லெங்கு ஸேஸ்தெ அஸ்கி தேஸுனுக் ஜெகிஞ்செஸ்.

⁴² யோசுவா அஸ்கி ரஜானுக்கின், தேஸுனுக் ஒண்டேவாளும் ஜெகிஞ்செஸ். இஸ்ரயேல்னுகெ தேவ் பகவான் தெங்கொகுர்சி யுத்தம் கெர்யாஸ்.

⁴³ பல்சொ யோசுவாகின், தெகொ ஸெந்தொ ஹொதெ இஸ்ரயேல்னு தெனு வஸி ஹொதெ கில்காலுக் ஜீ செராஸ்.