எரேமியா 12 - Saurashtra Bible (BSI)

எரேமியாகெ புகார்

¹ பகவானு, துமி நீதி ஸேஸ்தெனு; த்யெலெந்தால் மீ மொர் ஸெந்தேவுக் புஸரியொ; துமி ஸெர்ககன் நியாவ் ஸார்வொ கெரன் மெனி மொகொ களாய்; திஸொ ர:த, துஷ்டுடுன் சொக்கட்கன் ஜிவஸ்தக் காரணொ காயொ? நொம்கெ துரோகின் ஸுகம்கன் ஜிவராஸ்தெ கோனகு?

² துமீஸ் தெங்கொ மெளி உரு கெர்யாஸ்; ஒண்டெ ஜாடுக் ஹொவ்டரியஸோன் ஹொவ்ட்யாஸ்; தெனு சொக்கட் ஹொடி அத்தொ பொள்ளான் மெளி தேராஸ்; த்யெலெந்தால் தெனு அஸ்கின் தும்கொ மெச்சிலியெத் மெளி தெங்கொ மொன்னு தும்கொ ஸொடி துதூர் ஸே.

³ ஹொயெதி பகவானு, மீ கோன் மெனி தும்கொ களாய்; மொகொ துமி ஸிலேத் ஸே; மீ தும்ரெஜோள் ப்ரேவ்கன் ஸே மெனி தும்கொ களாய்; பகவானு, துஷ்டுடுனுக் பெண்டுனுக் செக்கரியஸோன் செக்குவொ. தெங்கொ அஸ்கினாக் செக்கி மொரடஸ்தக் தின்னு தொவொ.

⁴ தெங்கொலெந்தால் அங்குன் கித்க தின்னு அம்ரெ பு⁴ஞி ஹிம்ஸொ பொந்தய்? துஷ்டுடுன் லெந்தால் ஜாட் ஜட்கின் மெளி ஸுக்கி ஜேட்யொ; மென்க்யானுகெ ஹிம்ஸொ வேன் ஹொயெஹால் மூகுன்கின் பக்ஷின் தமி ஜேட்யொ; ‘அம்ரெ க்ரியானுக் தேவ் ஸானான்’ மெனி தெனு மெல்லராஸ்.

⁵ தெப்பொ பகவான் எரேமியாக் ஸீ, “வீருடுன் ஸெங்கொ தமரியவேளுஸ் தொகொ ஸீன் அவ்டரெஸ்; தூ கோனக் கொ⁴டான் ஸெங்கொ தமய்? ஸமபு⁴ஞிம் தமஸ்தகூஸ் தூ தக்கெதி, யோர்தான் நெத்தி தமரிய ராணும் தூ கோனக் தமன் முஸய்?

⁶ துரெ பை⁴ன்கின், துரெ ஒஸ்துன் தொகொ நொம்கெ துரோக் கெர்யாஸ்; துரெ விரோதின் ஸெங்கொ தெனு மெளி அவ்யாஸ்; தேஹாலிம் தெனு துரெ ஸெங்கொ குள்ளெகன் வத்தொ கெரெத் மெளி தூ தெங்கொ நொம்முங்கொ” மெனி மென்யாஸ்.

பகவான்கெ புகார்

⁷ பகவான் மொகொ ஸீ, “மீ இஸ்ரயேலுக் ஹாத் ஸொட்டியொ; மொகொ பாத்யம் ஹொயெ தேஸுக் மீ தொப்பி ஸொட்டியொ; மீ வேன் ப்ரேவ் தொவி ஹொதெ மொர் மென்க்யானுக் விரோதின்ஜோள் ஒப்பிஞ்சி தீடியொ.

⁸ மீ களைளியெ மென்க்யானூஸ் மொகொ விரோத்கன் ஸே; ராணு ஸிம்ஹுஸோன் மொகொ விரோத்கன் ரகளெ கெரராஸ்; தேஹாலிம் மீ தெங்கொ த்³வேஷ் கெரி தொப்பிதியொ.

⁹ மீ களைளியெ மென்க்யான் துஸ்ர ஜாது பக்ஷின்ஸோன் ஹொஜ்ஜிரியாஸ்; தேஹாலிம் அஸ்கி பக்ஷின் தெகொ விரோத்கன் மிளி அவ்ரியொ; ராணு மூகுனு! துமி மெளி தெகொ மிங்கஸ்தக் அவொ.

¹⁰ பராட் தேஸு ரஜான் ஜுகுதெனு மொர் திராட்செ பொள்ளா லாநுக் நாஸ் கெர்யாஸ்; அஸ்கி பொள்ளானுக் தொக்கி நாஸ் கெர்யாஸ்; ஸிங்கார்கன் ஹொதெ தெல்லெ தேஸுக் வளுராண்ஸோன் கெர்திகியாஸ்.

¹¹ தெல்லெ தேஸ் அத்தொ ரிக்தகன் ஸே; பனி நீ:ஸ்தக் ஸுக்கி ஸே; ஹொயெதி கொங்கினாக் கை விசார் நீ:

¹² நாஸ் கெரரிய யுத்த வீருடுன் அத்தொ வளுராண்கெ மிட்டா தாமுனுக் அவ்ரியாஸ்; காமெனெதி பூரா தேஸுக் நாஸ் கெரஸ்தக் பகவான்கெ பட்டயம் அஸ்கி பொங்குட் சுட்டு பிர்லேத் ஸே; தேஹாலிம் கொங்கினா மொன்னும் ஸமதான் நீ.

¹³ மொர் மென்க்யான் சேனும் கோ⁴முதந்துக் சொல்லியாஸ்; தெங்கொ ப²லன்கன் க²டா ஜ²ட்கின் அப்பெஸ்; ப்ரயாஸ் பொடி காம் கெர்யாஸ்; கொன்னி ப²லன் அப்பெனி; தெங்கொ அப்பெ ப²லனுக் ஸீதி அவ்மான் பொட்யாஸ்; பகவான் தெங்கொஜோள் ராக்³ பொடெஹாலூஸ் தெங்கொ இஸனி ஹொயெஸ்.

துஸ்ர தேஸுனுக் அப்பரிய தண்டன

¹⁴ பகவான் ஸங்கராஸ்: “ மொர் மென்க்யான் இஸ்ரயேலுக் மீ பாத்யம்கன் தியெ தேஸுக் நாஸ் கெரெ அஸ்கி தேஸு ரஜானுக் ஸங்கரியொ: யூதா, இஸ்ரயேல் தேஸு மென்க்யான் அபுல்நுக் பாத்யம் ஹொயெ தேஸுனும் ஜிவன் முஸுனாஸ்ததானுக் மீ தெங்கொ நாஸ் கெரெஸோன் துமி மெளி தும்ரெ தேஸும் ஜிவன் முஸுனாஸ்ததானுக் மீ நாஸ் கெரு.

¹⁵ தெக பல்சொ மீ பீர் தெல்லெ தேஸுனுக் தயவு தெக்கடி அஸ்கின் தெங்கொ தெங்கொ தேஸுனுக் பாத்யம் கெல்லஸ்ததானுக் கெரு.

¹⁶ ஒண்டெ காலும் தெனு மொர் மென்க்யானுக் பாகால் தெய்வுக் பாய்ம் பொடுவொ மெனி ஸிக்கடி தியாஸ். அத்தொ தெனு, ‘மீஸ் நிஜ்ஜம் தேவ்’ மெனஸ்த களைளி, மொர் மென்க்யான் ஸிக்கடி தேரிய ஆக்³ஞான்தானுக் ஜிவெதி, தெங்கொ மெளி மீ ஆஸீர்வாத் கெரு; தெனு மெளி மொர் மென்க்யான்ஸோன் சொக்கட் ஜிவன்.

¹⁷ ஹொயெதி துஸ்ர தேஸு மென்க்யான் மொர் வத்தானுக் அய்கி, த்யெதானுக் ஜிவ்னா ஜியெதி, மீ தெல்லெ தேஸுனுக் மூள் ஸெந்தொ உத்கி விஸ்தய்து” மெனி பகவான் ஸங்கராஸ்.