நியாயாதிபதின் 21 - Saurashtra Bible (BSI)

ஹொராடு ப்ரசன

¹ இஸ்ரயேல்னு பென்யமீன் ஸெந்தொ யுத்தம் கெரஸ்தக் முல்லொ மிஸ்பா கா³மும் பகவான்கெ ஸந்நிதிம், “அம்ராம் கொன்னின் பென்யமீன் கோத்ரு பெட்கானுக் பெட்கி தேஹோனா” மெனி ஸெத்து கெல்லியாஸ்.

² இஸனி ஸெத்து கெல்லியெஹால் இஸ்ரயேல்னு பெத்தேலுக் ஜீ வீள்டொ லெங்கு பகவான்கெ ஸந்நிதிம் கெட்டி ஸெத்து³கன் ரொட்யாஸ்.

³ தெனு பகவான்ஜோள், “இஸ்ரயேல்கெ தேவ் பகவானு, இஸ்ரயேல்கெ ஸந்ததிம்ரீ: ஹிந்தொ ஒண்டெ கோத்ரு ககொ உன்னொ பொட்னொ” மெனி அல்லட்யாஸ்.

⁴ தேஹாலிம் துஸந்தி ஸொளபார் ஹுடி தேட் ஒண்டெ பலி பீடம் பந்தி தகன பலின்கின், ஸமதான பலின் தீ³, பகவானுக் பாய்ம் பொட்யாஸ்.

⁵ தெப்பொ தெனு, “பகவான்கெ ஸந்நிதிக் கோன் அவ்யானி” மெனி புஸி களைளியாஸ். காமெனெதி மிஸ்பா கா³மும் பகவான்கெ ஸந்நிதிம் மிளெ ஸபாக் அவ்னாஸ்தெங்கொ மொரடீஸ் திர்னொ” மெனி ஸெத்து கெரி ஸங்கி ஹொத்யாஸ்.

⁶ தெனு பென்யமீன் கோத்ருக் ஹவ்டி மொன்னு பாத பொட்யாஸ். “இஸ்ரயேல்னும்ரீ: ஹிந்தொ ஒண்டெ கோத்ரு நீ:னா மெனி விசார் பொட்யாஸ்.

⁷ அமி அம்ரெ பெட்கினுக் தெங்கொ பெட்கானுக் தேனான் மெனி ஸெத்து கெரி ஸங்கிரியெஹால் அத்தொ தெங்கொ பெட்கானுக் பெட்கி அப்பஸ்தக் அமி காய் கெருவாய்” மெனி வத்தொ கெல்லியாஸ்.

⁸ தெனு வத்தொ கெர்லேத் ர:த இஸ்ரயேல்னும்ரீ: மிஸ்பா கா³மும் பகவான்கெ ஸந்நிதிம் மிளெ ஸபாக் கோன் அவ்யானி மெனி புஸிலியாஸ். தெப்பொ கீலேயாத் கா³மும் யாபேஸ் குல மென்க்யான் ஒண்டெதெனு மெளி தேட் அவி ஹொத்யானி மெனஸ்த களைளியாஸ்.

⁹ தெப்பொ, தேட் அவ்ரிய மென்க்யானுக் மொவ்ஜி ஸியாஸ். கீலேயாத் கா³மும் யாபேஸ் குல மென்க்யான் கொன்னின் தேட் ஹொத்யானி.

¹⁰ தென்னவேங்கு இஸ்ரயேல்னும்ரீ: பலம் பொரெ 12,000 (பா³ர் ஸஸர்) யுத்த வீருடுனுக் வெக்கி ஹெடி தெங்கொஜோள், “துமி நிகிளி ஜவொ; கீலேயாத் கா³மும் யாபேஸ் குல தல்லானுக்கின், பெய்லானுக்கின், பில்லல்னுக் செக்கி மொரடுவொ.

¹¹ ஹொராட்‍ ஹோனாஸ்த பெட்கினுக் ஸொட்டுவொ; உராவ் அஸ்கிதெங்காக் செக்கி தகொ” மெனி ஆக்³ஞொ தகி தட்டியாஸ்.

¹² திஸோஸ் யுத்த வீருடுன் ஜீ, கீலேயாத் கா³மும் யாபேஸ் குல மென்க்யானுக் செக்கி தகிதி ஹொராட் ஹோனாஸ்த 400 (சார் ஸோவு) பெட்கினுக் தெக்கி தெரி கானான் தேஸும் சீலோ கா³மும் மிளி ஹொதெ இஸ்ரயேல்கெ ஸபாக் பெல்லி அவ்யாஸ். (யோசு 18:1)

¹³ பல்சொ இஸ்ரயேல் ஸபா மென்க்யான் அஸ்கின் ரிம்மோன் தொங்கர் லெகுத்த ஸேஸ்தெ பென்யமீன் கோத்ருன்ஜோள் மெனிகுக் தட்டி தெங்கொ ஸெந்தொ ஸமதான் கெல்லியாஸ்.

¹⁴ பல்சொ பென்யமீன் கோத்ருன் ரிம்மோன் தொங்கரும்ரீ: பிரி அவ்யாஸ். கீலேயாத் கா³மும்ரீ: தெர்லி அவெ யாபேஸ் குல பெட்கினுக் தெனு ஹொராட் கெல்லியாஸ். ஹொயெதி தெங்கொ அஸ்கினாக் ஹொராட் கெரி தேஸ்தக் பஜெ ஹொயெ பெட்கின் தேட் ஹொத்யானி.

¹⁵ பென்யமீன் கோத்ரு நாஸ் ஹொயெஸ்தெ ஹவ்டி இஸ்ரயேல்னு ஜுகு விசார் பொட்யாஸ். காமெனெதி இஸ்ரயேல் கோத்ருன் ஸெந்தொ ஐக்யம்கன் ரா:னாஸ்ததானுக் பகவான் தெங்கொ அலக்க³ கெரி ஹொத்யாஸ்.

¹⁶ தெப்பொ இஸ்ரயேல்கெ ம:ட்டான் மிளி, “பென்யமீன் கோத்ரும் பெட்கின் யுத்தமும் மொஜ்ஜியெஹால், உராவ் ஸேஸ்தெ பெட்கானுக் பெட்கின்‍ அப்பஸ்தக் அமி காய் கெருவாய்?” மெனி புஸ்யாஸ்.

¹⁷ அங்குன் தெனு, “பென்யமீன் கோத்ருக் வார்ஸு அப்பஸ்ததானுக் அமி தெங்கொ காய்தி கெர்னொ; நீ:மெனெதி இஸ்ரயேல் ஸந்ததிம் ஒண்டெ கோத்ரு நாஸ் ஹொய் ஜேடய்.

¹⁸ அமி அம்ரெ பெட்கினுக் தெங்கொ தேன் முஸுனா; காமெனெதி பென்யமீன் கோத்ருக் பெட்கி தேஸ்தெனு ஸாபன பொந்தன்” மெனி ஸெத்து கெரி அமி ஸங்கிரியாஸ் மெனி மென்யாஸ்.

¹⁹ தெப்பொ தெங்காம் தெவ்டதெனு, “ஒர்ஸு ஒர்ஸு சீலோ கா³மும் பகவான்கெ ஸெந்நு சலய்; தெல்லெ ஸெந்நு பெத்தேலுக் உத்தர் திக்குக்கின் லீபனோனுக் தக்ஷிண் திக்குக்கின், பெத்தேல்ரீ: சீகேம் கா³முக் ஜாரிய க²வ்நஸ் திக்குக் ம:ஜார் சலய்” மெனி மென்யாஸ்.

²⁰ தேஹாலிம் தெனு பென்யமீன் கோத்ருனுக் ஸீ, “துமி ஜீ திராட்செ பொள்ளா லாநும் லிக்குலுவொ.

²¹ சொக்கட் நிகொகன் கம்சி ஸவொ; சீலோ கா³மு பெட்கின் கீத் கவ்லி நச்சிலேத் அவரிய வேளு, துமி திராட்செ லாநும்ரீ: பராட் அவி, ஒண்டொண்டெதெனு ஒண்டொண்டெ பெட்கிக் துக்கிலி பென்யமீன் தேஸுக் தமி ஜேடுவொ.

²² தெல்லெ பெட்கினுகெ பா³ப்தீ பை⁴ன்தீ அம்ரெஜோள் அவி புஸெதி அமி தெங்கொஜோள், “தும்ரெ பெட்கினுக் அமி ஹொராட் கெல்லஸ்தக் ம:ட்ட மொன்னுகன் ஸொடி தீடுவொ. காமெனெதி அமி யாபேஸ் கா³மும் ஜீ யுத்தம் கெரெவேளு அம்ரெ பெட்கான்கெ லெ:க்காதானுக் பெட்கின் தேட் அப்பெனி. அத்தொ மெளி தும்ரெ பெட்கினுக் அம்கொ ஹொராட் கெரி தேஸ்தக் துமி ஸம்மத் பொட்ராஸ்தெ நா: அமீஸ் கள்ளிரியாஸ்தெ. தேஹாலிம் துமி சூக்வான் நா: தும்கொ கொன்னி ஸாபன அவ்னா” மெனி மெனன் மெனி ஸங்க்யாஸ்.

²³ இஸ்ரயேல் கோத்ருன் ஸங்கெதானுக் பென்யமீன் கோத்ருன் கெர்யாஸ். கீத் கவ்லி நச்சிலேத் அவெ பெட்கினுக் ஒண்டொண்டெதெனு ஒண்டொண்டெ பெட்கிக் துக்கிலி தெங்கொ ஸொந்த கா³முனுக் ஜியாஸ். தேட் தெனு கே⁴ர்னுக் பந்திலி ஜிவ்யாஸ்.

²⁴ தெகொ பல்சோஸ் இஸ்ரயேல்கெ கோத்ருன் தெங்கொ தெங்கொ தாமுனுக் ஜியாஸ்.

²⁵ தெல்லெ தின்னுநும் இஸ்ரயேல்னுக் ரஜான் ஹொத்யானி. தென்தெனு தெங்கொ தெங்கொ மொன்னுக் ஸெர்க லகெஸ்தெ கெர்யாஸ். (நியா 17:6) ஏகூத் நியா 3:9-11 ஒத்னியேல் நியா 3:15 - 30 சம்கார் நியா 3:31 தெபோராள், பாராக், நியா 4:4 – 5:31 கிதியோன் நியா 8:20 அபிமெலேக் நியா 9:1-52 தோலா நியா 10:1-2 யாவீர் நியா 10:3-5 யெப்தா நியா 12:7 இப்சான் நியா 12:8-9 ஏலோன் நியா 12:11 அப்தோன் நியா 12:13-14 சிம்சோன் நியா 15:20 ஏலி 1 சாமு 4:18 சாமுயேல் 1 சாமு 7:2; 8:1