நியாயாதிபதின் 17 - Saurashtra Bible (BSI)

மீகா உருகெரெ விக்ரகம்

¹ எப்பிராயீம்கெ தொங்கரு தேஸும் மீகா மெனி ஒண்டெதெனொ ஹொதெஸ்.

² ஒண்டெதி தெனொ அபுல் அம்பொஜோள், “துரெஜோள் ஹொதெ 1,100 (ஸஸருர் ஸோவு) ருப்பா காஸுனுக் கோன்கி சொர்திகியாஸ் மெனி ஸாபன தியெஸ்னா? மீ மெளி தெல்லெ அய்கிலேத் ஹொதெஸ். ஏலா, துரெ ருப்பா காஸுனுக் மீஸ் கள்ளியெஸ். தெல்லெ மொர்ஜோளூஸ் ஸே” மெனி மெனெஸ். தெப்பொ தெகொ அம்பொ, “மொர் பெடா, தூ கள்ளியெஸ்தெ ஒப்பிலியெஹால் பகவான் தொகொ ஆஸீர்வாத் கெரந்தக்” மெனி ஸங்கிஸ்.

³ மீகா 1,100 (ஸஸருர் ஸோவு) ருப்பா காஸுனுக் அபுல் அம்பொஜோள் பிரி தியெஸ். தெல்லெகொ அம்பொ, “மீ தியெ ஸாபன துரெ ஹொல்லெ அவ்னாஸ்ததானுக் எல்லெ ருப்பா காஸுனுக் மீ மொர் பகவானுக் தட்சணகன் தீடரியொ. தெனொ எல்லெ காஸுனுக் தொவ்லி ஒண்டெ பிள்டிகின், ஒண்டெ விக்ரகம் தயார் கெரய்” மெனி ஸங்கி தெல்லெ ருப்பா காஸுனுக் பெடொஜோள் தீடிஸ்.

⁴ ஹொயெதி மீகா தெல்லெ காஸுனுக் அம்பொஜோள் பிரி தீடியொ. தெகொ அம்பொ தெமாம்ரீ: 200 (தீ³ ஸோவு) ருப்பா காஸுனுக் ஹெடி கஸார்ஜோள் தீ³ ஒண்டெ பிள்டிகின், ஒண்டெ விக்ரகம் தயார் கெரடிஸ். தெல்லெ விக்ரகமுன் மீகா கொ⁴ம்மொ ஹொதெஸ்.

⁵ எல்லெ விக்ரகமுனுக் தொவி புஜெ கெரஸ்தக் மீகா ஒண்டெ த⁴வ்ரொ பந்தெஸ். தெல்லெ த⁴வ்ராம் அங்குன் தெவ்ட விக்ரகமுனுக்கின், ஏபோத் மெனரிய விக்ரகமுக் மெளி கெரி தொவெஸ். அபுல் பெடானும் ஒண்டெதெகாக் ப⁴ட்டர்கன் ந்யமுன் கெரெஸ்.

⁶ தெல்லெ தின்னுநும் இஸ்ரயேல்னுக் ரஜான் ஹொத்யானி. தேஹாலிம் தென்தெனு தெங்கொ தெங்கொ மொன்னுக் ஸெர்க லகெஸ்தெ கெர்யாஸ். (உபா 12:8)

⁷ தெப்பொ யூதா தேஸும் பெத்லகேமும் கா³மும் ஒண்டெ ஜவ்ணொ லேவியன்கன் ஹொதெஸ்.

⁸ தெனொ பெத்லகேம்ரீ: நிகிளி துஸ்ர தாமுக் ஜிவன் ஜியெஸ். ஜாரிய வாடும் எப்பிராயீம் தொங்கர் தேஸும் மீகா கே⁴ர் வாட்கன் ஜிலேத் ர:த,

⁹ மீகா தெகொ பொவி, “தூ கோட்ரீ: அவரியொ” மெனி புஸெஸ். தெல்லெகொ தெனொ, “மீ யூதா தேஸும் பெத்லகேம்ரீ: அவரிய ஒண்டெ லேவியன். மீ ஜிவஸ்தக் ஒண்டெ தாம் வெக்கிலி ஜாரியொ” மெனி மெனெஸ்.

¹⁰ மீகா தெகொஜோள், “மொர் கே⁴ருக் ஆவ்; மொர் கொ⁴ம்மொ மீ பந்திரியெ த⁴வ்ராக் ப⁴ட்டர்கன் ரா: அம்கொ பா³ப்கன் ரீ: ஆலோசன தே. மீ தொகொ ஒண்டொண்டெ ஒர்ஸு தெ³ஸ்ஸு ருப்பா காஸ்கின், பில்லஸ்தக் வஸ்தர்கின், காஸ்தக் க²வ்ணம் தொ³வுஸ்” மெனி மெனெஸ்.

¹¹ தெல்லெ லேவியன் மீகா ஸங்கெ வத்தானுக் ஸம்மத் பொடி, தெகொ கொ⁴ம்மொ வஸி ஹொதெஸ். தெகொ பெடானும் ஒண்டெதெனொஸோன் தேட் ஜிவெஸ்.

¹² மீகா தெல்லெ ஜவ்ணாக் ப⁴ட்டர்கன் ந்யமுன் கெரெஸ். தெனொ மீகா கொ⁴ம்மோஸ் ஜிவெஸ்.

¹³ தெப்பொ மீகா, “ஒண்டெ லேவியனூஸ் அத்தொ மொகொ ப⁴ட்டர்கன் ஸே; தேஹாலிம் பகவான் மொகொ சொக்கட்யெ கெரன்” மெனி மெனெஸ்.