நியாயாதிபதின் 12 - Saurashtra Bible (BSI)

யெப்தாகின் எப்பிராயீம்

¹ எப்பிராயீம் மென்க்யான் ஒண்டேஸ்கன் மிளி யோர்தான் நெத்திக் தடி சாப்போன் கா³முக் அவி யெப்தாஜோள், “அம்கொ பெல்லி ஜானாஸ்தக் தூ கெத்தி³ அம்மோனியர்னு ஸெங்கொ யுத்தம் கெரஸ்தக் ஜியெஸ்தெ ஸெர்ககீ? அமி தொகொக்கின், துரெ கே⁴ருக் ஹுளொ லகடி ஜெளன்” மெனி மென்யாஸ்.

² யெப்தா தெங்கொஜோள், “மீகின் மொர் மென்க்யான் அம்மோனியர்னு ஸெங்கொ தர்‍க்கம் கெரெவேளு மீ தும்கொ பொவெஸ். துமி மொகொ ஹேது கெரஸ்தக் அவ்யானி. தெங்கொஜோள்ரீ: துமி மொகொ கபட்யானி.

³ துமி மொகொ கபடஸ்தக் அவ்யானி மெனஸ்த மீ களைளி மீ மொர் ஜீவுக் தக்குனாஸ்தக் அம்மோனியர்னு ஸெங்கொ யுத்தம் கெரெஸ். மீ தெங்கொ ஜெகிஞ்சஸ்தக் பகவான் மொகொ ஹேது கெர்யாஸ். தேஹாலிம் துமி அத்தொ மொர் ஸெங்கொ ஜெடாக் அவராஸ்‍தெ ஸெர்க நா:” மெனி மெனெஸ்.

⁴ பல்சொ யெப்தா கீலேயாத்துகெ மென்க்யானுக் ஒண்டேஸ்கன் மிளடி எப்பிராயீம் மென்க்யான் ஸெங்கொ யுத்தம் கெரி மொரடெஸ். காமெனெதி எப்பிராயீம் மென்க்யான் கீலேயாத் மென்க்யானுக் ஸீ, “துமி எப்பிராயீம், மனாசே கோத்‍ருன்கெ தாமுனும் ஜிவஸ்தக் அவ்யாஸ்தெனுஸ்னா” மெனி தெங்கொ கேலி கெர்யாஸ்.

⁵ தேஹாலிம் கீலேயாத் மென்க்யான் எப்பிராயீமுக் பாத்யம் ஹொயெ யோர்தான் நெத்திகெ லாங்கு³ஜோள் ஹிப்பி ரே:ட்யாஸ். தெப்பொ எப்பிராயீம் மெனிக் கோன்தி ஒண்டெதெனொ யோர்தான் நெத்திக் தடி அவ்னொ மெனெதி லாங்கு³ஜோள் ஹிப்பிரிய யுத்த வீருடுன்ஜோள், “மீ நெத்திக் வெதுர் கெட்டர் ஜனொ” மெனி புஸய். கீலேயாத் மெனிக் தெகொஜோள், “தூ எப்பிராயீம் கோத்ருகீ?” மெனி புஸய். தெல்லெகொ தெனொ, “மீ எப்பிராயீம் கோத்ரு நா:” மெனி ஸங்கய்.

⁶ தெப்பொ கீலேயாத் யுத்த வீருடுன் தெகொஜோள், “ஷிபோலேத்” மெனி ஸங்கி மெனய். தெனொ தெல்லெ வத்தாக் ஸெர்ககன் மெனன் களானாஸ்தக் “சிபோலேத்” மெனி மெனய். எப்பிராயீம் கோத்ருக் தெல்லெ வத்தொ ஸெர்ககன் ஸங்கன் களானா மெனஸ்த களைளி யோர்தான் நெத்தி கெட்டரூஸ் தெங்கொ செக்கி தகன். இஸனி தெனு 42,000 (தி³வஞ்சளிஸ் ஸஸர்) எப்பிராயீம் மென்க்யானுக் செக்கி மொரட்யாஸ்.

⁷ யெப்தா ஸோ ஒர்ஸு இஸ்ரயேலுக் நியாயாதிபதிகன் ஹொதெஸ். பல்சொ தெனொ மொரெஸ். தெகொ ஸொந்தம் கா³ம் கீலேயாத்தும் தெகொ க³ட்யாஸ்.

இப்சான், ஏலோன், அப்தோன்

⁸ தெக பல்சொ பெத்லகேம் மெனிக் இப்சான் இஸ்ரயேலுக் நியாயாதிபதிகன் ஹொதெஸ்.

⁹ தெகொ தீஸ் பெடான்கின், தீ²ன் பெடின் ஹொத்யாஸ். தெனொ அபுல் பெ³டினுக் துஸ்ர தேஸு பெட்கானுக் ஹொராட் கெரி தியெஸ். துஸ்ர தேஸு பெட்கின் 30 (தீஸ்) தெங்காக் அபுல் பெடானுக் ஹொராட் கெரி தொவெஸ். தெனொ ஸாத் ஒர்ஸு இஸ்ரயேலுக் நியாயாதிபதிகன் ஹொதெஸ்.

¹⁰ பல்சொ இப்சான் மொரெஸ். தெகொ பெத்லகேமும் க³ட்யாஸ்.

¹¹ தெக பல்சொ செபுலோன் கா³மு மெனிக் ஏலோன் தெ³ஸ்ஸு ஒர்ஸு இஸ்ரயேலுக் நியாயாதிபதிகன் ஹொதெஸ்.

¹² தெக பல்சொ ஏலோன் மொரெஸ்; செபுலோனுக் பாத்யம் ஹொயெ பு⁴ஞிர் ஆயலோன் கா³மும் தெகொ க³ட்யாஸ்.

¹³ தெக பல்சொ பிரத்தோன் கா³மு மெனிக் இல்லேல் பெடொ அப்தோன் இஸ்ரயேலுக் நியாயாதிபதிகன் ஹொதெஸ்.

¹⁴ தெகொ 40 (சளிஸ்) பெடான்கின், 30 (தீஸ்) நத்யான் ஹொத்யாஸ். தெனு 70 (ஸீரு) கெதடுன் ஹொல்லெ ப்ரயாண் கெர்யாஸ். தெனொ ஆட் ஒர்ஸு இஸ்ரயேலுக் நியாயாதிபதிகன் ஹொதெஸ்.

¹⁵ பிராத்தோன் கா³மு மெனிக் இல்லோல் பெடொ அப்தோன் மொரெஸ்; அமலேக்கியர்னுக் பாத்யம் ஹொயெ தொங்கர் கா³ம் எப்பிராயீம் ராஜ்யமும் ஸேஸ்தெ பிராத்தோன் கா³மும் தெகொ க³ட்யாஸ்.