நியாயாதிபதின் 10 - Saurashtra Bible (BSI)

தோலா

¹ அபிமெலேக்கு மொரெ பல்சொ இஸ்ரயேல்னுகெ நியாயாதிபதிகன் தோதாகெ நத்யெ பூவாகெ பெடொ தோலா அவெஸ். எனொ இசக்கார் கோத்ரு மெனிக்; எப்பிராயீம்கெ தொங்கர் தேஸும் சாமீர் கா³மும் ஜிவெஸ்.

² எனொ இஸ்ரயேலுக் 22 (தி³வ்வீஸு) ஒர்ஸு நியாயாதிபதிகன் ராஜ்ஜலெஸ். பல்சொ தெனொ மொரெஸ். சாமீர் கா³மும் தெகொ க³ட்யாஸ்.

யாவீர்

³ தெக பல்சொ கீலேயாத் ராஜ்யமும் ஜிவெ யாவீர் அவெஸ்; தெனொ இஸ்ரயேலுக் 22 (தி³வ்வீஸு) ஒர்ஸு நியாயாதிபதிகன் ஹொதெஸ்.

⁴ தெகொ 30 (தீஸ்) பெடான் ஹொத்யாஸ். தெனு 30 (தீஸ்) கெதடுன் ஹொல்லெ ப்ரயாண் கெரன். கீலேயாத் ராஜ்யமும் எங்கொ பாத்யம்கன் 30 (தீஸ்) பட்ணம் ஹொதெஸ். தெல்லெ பட்ணமுன் யாவீருகெ பட்ணமுன் மெனி ஹிந்தா தின்னு லெங்கு ஸங்கினி பொடரியொ.

⁵ பல்சொ யாவீர் மொரி காமோன் கா³மும் க³ட்னி பொடெஸ்.

யெப்தா

⁶ இஸ்ரயேல்னு பகவானுக் விரோத்கன் பீர் பாப் கெர்யாஸ்; தெனு பாகால், அஸ்தரோத் தெய்வுனுக்கின், சீரியா, சீதோன், மோவாப், அம்மோனியர் பெலிஸ்திய தேஸுனுகெ தெய்வுனுக் பாய்ம் பொட்யாஸ். தெனு பகவானுக் ஹவ்டன் ஜவள்ளிடியாஸ். தெங்கொ ஸேவொ கெரஸ்த ஸொட்டியாஸ்.

⁷ தேஹாலிம் இஸ்ரயேல்னு ஹொல்லெ பகவான் வேன் ராக்³ பொட்யாஸ். பெலிஸ்தியர்னுகின், அம்மோனியர்னு தெங்கொ ஜெகிஞ்சஸ்ததானுக் கெர்யாஸ்.

⁸ தெனு தெல்லெ ஒர்ஸும் இஸ்ரயேல்னுக் ஜுகு ஹிம்ஸொ கெர்யாஸ். யோர்தான் நெத்திக் க²வ்நஸ் திக்கும் கீலேயாத் ராஜ்யமும் ஹொதெ அம்மோனியர்னுகெ தேஸும் ஜிவெ இஸ்ரயேல்னுக் 18 (அடார்) ஒர்ஸு ஜுகு ஹிம்ஸொ கெர்யாஸ்.

⁹ அம்மோனியர்னு யோர்தான் நெத்திக் தடி அவி யூதா, பென்யமீன், எப்பிராயீம் கோத்ருன் ஸெந்தொ யுத்தம் கெர்யாஸ். தேஹாலிம் இஸ்ரயேல்னுகெ மொன்னு ஜுகு பாத பொடெஸ்.

¹⁰ தெப்பொ இஸ்ரயேல்னு பகவானுக் ஸீ, “அமி தும்கொ விரோத்கன் பாப் கெர்திகியாஸ். அம்ரெ தேவ்கன் ஸேஸ்தெ தும்கொ ஸொட்டி அமி பாகால் தெய்வுக் பாய்ம் பொட்யாஸ்” மெனி கெட்டி ஸெத்து³கன் ரொட்யாஸ்.

¹¹ பகவான் இஸ்ரயேல்னுஜோள், “மீ தும்கொ அஸ்கினாக் எகிப்தியர்னு, எமோரியர்னு, அம்மோனியர்னு, பெலிஸ்‍தியர்னுஜோள்ரீ: கபடெஸ்னா?

¹² தீநா:ஸ்தக் சீதோனியர்னு, அமலேக்கியர்னு, மாகோனியர்னு, தும்கொ ஹிம்ஸொ கெரெவேளு துமி மொகொ ஸீ ப்ரார்தன கெர்யாஸ். மீ தும்கொ தெங்கொஜோள்ரீ: கபடெஸ்.

¹³ ஹொயெதி துமி மொகொ ஸொட்டி துஸ்ர தெய்வுனுக் பாய்ம் பொட்யாஸ். தேஹாலிம் மீ தும்கொ பீர் கபட்னா.

¹⁴ துமி பாய்ம் பொடரிய தெய்வுன்ஜோளூஸ் ஜீ மெல்லுவொ; தும்ரெ ப்ரசனாம்ரீ: தெல்லெ தெய்வுன் தும்கொ கபடந்தக்” மெனி மென்யாஸ்.

¹⁵ தெப்பொ இஸ்ரயேல்னு பகவானுக் ஸீ, “அமி பாப் கெர்திகியாஸ். அம்கொ தண்டன தீ³ ஸெர்கொ கெருவொ. ஹொயெதி அம்கொ விரோதின்ஜோள்ரீ: கபட்னா ரே:டுங்கன்” மெனி மெல்லியாஸ்.

¹⁶ பல்சொ தெனு துஸ்ர தெய்வுனுகெ விக்ரகமுனுக் பொடி தொப்பிதி பகவானுக் பாய்ம் பொட்யாஸ். தெப்பொ பகவான் மெளி இஸ்ரயேல்னு பொந்தரிய ஹிம்ஸானுக் ஹவ்டி மொன்னு பாத பொட்யாஸ்.

¹⁷ தெப்பொ அம்மோனியர்னு அஸ்கின் மிளி கீலேயாத் தேஸுக் அவ்யாஸ். இஸ்ரயேல்னு ஒண்டேஸ்கன் மிளி கீலேயாத்தும் ஸேஸ்தெ மிஸ்பா கா³முக் அவ்யாஸ்.

¹⁸ தெப்பொ கீலேயாத்துகெ அதிபதின், “அம்மோனியர்னுக் விரோத்கன் யுத்தம் கெரஸ்தக் அம்கொ கோன் சல்த கெரன்கீ தெனோஸ் அம்கொ அதிபதிகன் ரா:ய்” மெனி மென்யாஸ்.