ஏசாயா 46 - Saurashtra Bible (BSI)

பாபிலோன் தேஸுகெ தெய்வுன்

¹ பகவான் ஸங்கராஸ்: பாபிலோன்கெ தெய்வுனுக் ஸெத்ல தின்னுன் அவ்டியொ; பேல் தெய்வுக்கின், நேபோ தெய்வுக் அத்தெங்குட் கொன்னின் பாய்ம் பொட்னான். தெல்லெ தெய்வுனுக் மூகுன் ஹொல்லெகின், கெதடுன் ஹொல்லெ தொவி துக்கிலி ஜியாஸ். ஹொயெதி துமி பாய்ம் பொடெ தெல்லே தெய்வுன் அத்தொ தும்கொகின், தும்ரெ மூகுனுக் பா⁴ர் ஹொயெஸ்.

² தெல்லெ விக்ரகமுன் கொங்கினாக் கபட்னா; ஹுடொ க⁴லய் கா²ல் பொள்ளுடய். ப⁴ந்தைதுன் ஸெங்கொ ப⁴ந்தைத்கன் தெல்லெ விக்ரகமுனுக் மெளி கள்ளி ஜேடன்.

³ யாக்கோபுகெ ஸந்ததினு, அய்குவொ. இஸ்ரயேல்கெ வம்ஸமும் அத்தொ ஜீவ் ஸெந்தொ ஸேஸ்தெ மென்க்யானு, மீ ஸங்கரிய வத்தானுக் அய்குவொ. துமி மாயு போடும் ர:தோஸ், துமி உஜுனா முல்லொரீ: மீ தும்கொ கபடெஸ்.

⁴ தும்கொ ஒர்ஸு ஹொயெத் மெளி மீ தும்கொ கபடு. ஆயுஸு பூரா மீ தும்கொ ஸீலு. மீஸ் தும்கொ உருகெரெஸ். மீஸ் தும்கொ பெல்லு. தும்கொ ஸீலு; தும்கொ கபடு.

⁵ கொங்கக் நிகர்கன் துமி மொகொ ஸங்கன்? மெனி பகவான் புஸராஸ். மொகொஸோன் ஸர்வ ஸக்தி பகவான் கோன்தி ஸேகீ?

⁶ மென்க்யான் கொள்டி போர் ஸொந்நாக் கள்ளி அவி லுச்சராஸ்; ருப்பாக் ஜொகி கள்ளி அவராஸ். கஸாருக் பொவி தெய்வுனுக் உருகெரராஸ். தெனு உருகெரெ விக்ரகமுனுக் தெனூஸ் பாய்ம் பொடராஸ்.

⁷ தெனு தெல்லெ விக்ரகமுனுக் காந்துர் துக்கிலி ஜாராஸ்; கோட் தொவ்னொ மெனி ஹவ்டராஸ்கி தேட் தொவராஸ். தெல்லெ தெடூஸ் ரா:ய். கொட்டி ஜானா. கோன்தி ரெச்சொ தகி பொ³வெத் மெளி தெல்லெ ஜவாப் ஸங்குனா. கொங்கினா கஷ்டமுனுக் ஜவட்னா. கொங்கினாக் கபட்னா.

⁸ துஷ்டுடுனு, மீ ஸங்கரிய விவர்னுக் அய்குவொ; மீ மெனரிய வத்தானுக் ஹவ்டன் தொவ்லுவொ.

⁹ பூர்வ தின்னுகெ ஸம்பவமுனுக் ஹவ்டி ஸவொ; மீஸ் தேவ்; மொகொ ஜத துஸ்ர தேவ் கொன்னின் நீ: மொகொ நிகர்கன் கொன்னின் நீ:

¹⁰ ஸெத்ல தின்னுநும் சலஞ்ஜாரிய கார்யமுனுக் மீ முல்லோஸ் தும்கொ ஸங்கிரியொ. அத்தெங்குட் சலஞ்ஜாரிய அஸ்கி கார்யமுனுக் ஆதி காலுமூஸ் மீ தும்கொ ஸங்கிரியொ. மொர் தீர்மான்தானுக் அஸ்கி சலய்; மீ ஹவ்டெதானுக் அஸ்கி பூர்தி ஹோய்” மெனி மென்யாஸ்.

¹¹ க²வ்நஸ் திக்கும்ரீ: ஒண்டெ மெனிகுக் மீ பொவன் தட்டிரியொ; துதூர் தேஸும்ரீ: அவரிய தெல்லெ மெனிக் மீ ஸங்கரியதானுக் கெரய். சொரொ காஸ்தக் அவரிய ராணு பக்ஷிஸோன் தெனொ அவி அஸ்கினாக் ஹனய். இஸனி சலய் மெனி ஸங்கெஸ்தெனொ மீஸ்; மீ ஸங்கெதானுக் கெரி முஸடு.

¹² ஹடவாதினு! ஜீக் பொந்தஸ்தக் ஜுகு ஒர்ஸுன் ஹோய் மெனி மெனஸ்தென்வோ, மீ ஸங்கரிய வத்தானுக் அய்குவொ.

¹³ மீ ஜீக் பொந்தரிய தின்னு ஜுகு லெகுத்த ஸே; தெல்லெ தின்னு துதூர் நீ; தெகொ ஜுகு கெ⁴டி லகுனா. மீ எருசலேமுக் ஸொடுவி கெரு; இஸ்ரயேல்கெ நாவ் ப்ரபல்யம் ஹோய்.