ஏசாயா 20 - Saurashtra Bible (BSI)

எகிப்துக்கின் எத்தியோப்பியாக் தெனி பொடெ தீர்கதரிஸனம்

¹ அசீரிய தேஸு ரஜொ சார்கோன் அபுல் ஸேனாதிபதி தர்த்தானுக் தட்டி பெலிஸ்திய தேஸும் ஸேஸ்தெ அஸ்தோத் பட்ணமுக் ஜெகிஞ்செ ஒர்ஸும்,

² ஆமோத் பெடொ ஏசாயாஜோள் பகவான் தீ²ன் ஒர்ஸு முல்லொ ஸங்கி ஹொதெ வத்தான்: “தூ பில்லிரிய கெச்சந்தி வஸ்தருக் ஹெடி தாக்; துரெ பாய்ஞ்கெ செப்னிக் ஹேட்” மெனி மென்யாஸ். பகவான்கெ வத்தாதானுக் தெனொ மெளி கெச்சந்தி வஸ்தருக் ஹெடி தகிதி கஷ்டொ க⁴ல்லி, செப்னி தகுல்னாஸ்தக் சலி ஜியெஸ்.

³ தெப்பொ பகவான், “மொர் ஸெவ்கன் ஏசாயா கஷ்டொ க⁴ல்லி செப்னி தகுல்னாஸ்தக் தீ²ன் ஒர்ஸு சல்ரியொ; எகிப்துக்கின், எத்தியோப்பியா தேஸுக் காய் ஹோய் மெனி உஷார் கெரி, ஒண்டெ கு³ர்துகன் ரா:ஸ்தக் தெனொ இஸனி கெரெஸ்.

⁴ எல்லெ தீ³ தேஸு மென்க்யானுக் அசீரிய தேஸு ரஜொ ப⁴ந்தைதுன்கன் பெல்லி ஜாய்; தெனொ எகிப்தியர்னுக் அவ்மான் கெர்னொ மெனி தெங்கொ தேஸுகெ ம:ட்டானுக்கின், ஜவ்ணானுக் ப²ட்டெ வஸ்தர் தகடி பாய்ஞ்ர் செப்னி மெளி நீ:ஸ்தக் சலடி க³ண்த்‍ரி தெக்காஸ்ததானுக் உட்சிலி ஜாய்.

⁵ தெப்பொ பெலிஸ்தியர்னு, “அமி எகிப்துக்கின் எத்தியோப்பியாக் நொம்மி ஜுகு ம:ட்டபோன் பொந்த்யாஸ். அத்தொ அமி தெங்கொஜோளுஸ் அவ்மான் பொந்தராஸ்” மெனி மெனன்.

⁶ தெல்லெ தின்னும் ஏட் ஜிவரிய ஸெந்துரு தேஸு மென்க்யான், “ஏலா, அமி கொங்க நொம்மி ஹொத்யாஸ்கீ, அம்கொ கபட்னொ மெனி அமி கொங்கஜோள் மெல்லியாஸ்கீ தெல்லெ அசீரியர்னூஸ் அத்தொ நிர்கதிகன் ஹிப்பிரியாஸ்! அத்தொ அமி காய் கெரன் முஸய்” மெனி ரொடன்.