யாத்ராகமம் 27 - Saurashtra Bible (BSI)

பலி பீடம்

¹ “சீத்திம் ஜாட்ஹால் ஒண்டெ பலி பீடம் கேர். தெக லம்பு பாஞ்ச் மூரொகின், ரு:ந்தி பாஞ்ச் மூரொ ர:னொ. பலி பீடம் சரு பொங்குட் ஒண்டே லெ:க்ககன் ர:னொ. உஞ்சொ கெத்தி³ தீ²ன் மூரொ ர:னொ.

² தெல்லெ பலி பீடமுகெ சரு கொநாம் சார் ஸிங்க்³டான் ர:னொ. பலி பீடம்கின் ஸிங்க்³டான் ஒண்டே பல்காம் கெர்னி பொட்னொ. பலி பீடமுக் கஸா தகட்ஹால் ஜா²க்.

³ பலி பீடமுகெ ராக் வரரிய ஸண்கி, பொலான், ஹவ்கான், பிங்கணின், க²டா பொலான், விஸ்தவ் வரரிய ஹண்டின் இத்யாதினுக் கஸாம் தயார் கேர்.

⁴ பல்சொ கஸாம் ஒண்டெ ஜெல்லடுக் கெரி, தெல்லெ ஜெல்லடுகெ சரு கொநாம் சார் கஸா வளையமுனுக் ஸம்டாட்.

⁵ பலி பீடமுகெ பிஸ்தர் பொங்குட் ம:த்தி³ கா²ட்னும் தெல்லெ ஜெல்லடுக் பிஸாட்.

⁶ பலி பீடமுகெ த³ண்டுனுக் சீத்திம் ஜாட்ஹால் கெரி, தெல்லெ த³ண்டுனுக் கஸா தகட்ஹால் ஜா²க்.

⁷ பலி பீடமுக் துக்கிலி ஜாஸ்தக் தோத்கன், தீ³பொங்குட் ஸேஸ்தெ வளையமுனும் த³ண்டுனுக் துராட்.

⁸ தெல்லெ பலி பீடமுக் சரு பொங்குட் பல்கொ ஹனி, பிஸ்தர் ரிக்த தாம் ரா:ஸ்ததானுக் கேர். தொங்கரும் தொகொ தெக்கடெ தெல்லே ரீதிதானுக் அஸ்கி உபகரணுக் தயார் கேர்.

டேராகெ ப்ரஹார்

⁹ பல்சொ பரிஸுத்த டேரா சுட்டுர் படுத்தாமூஸ் ஒண்டெ ப்ரஹார் பந்தி. தக்ஷிண் திக்கு ப்ரஹாருக் ஜ²கஸ்தக் நா:ன் பீளு பஷுதும் படுத்தான் தயார் கேர். தெக லம்பு ஸோவு மூரொ ர:னொ.

¹⁰ தெல்லெ படுத்தான் லொம்படஸ்தக் கஸாம் வீஸ் கா²ம்புனுக்கின், வீஸ் பாத பீடமுனுக் கேர். கா²ம்புன்கெ உஞ்சா பீடமுனுக்கின், கொல்கினுக் ருப்பாம் கேர்.

¹¹ திஸோஸ் உத்தர் திக்கு ப்ரஹாருக் ஜ²கஸ்தக் படுத்தான் தயார் கேர். தெக லம்பு ஸோவு மூரொ ர:னொ. தெல்லெ படுத்தானுக் பந்தஸ்தக் வீஸ் கா²ம்புனுக்கின், வீஸ் பாத பீடமுனுக் கஸாம் கேர். தெல்லெ கா²ம்புனுகெ உஞ்சா பீடமுனுக்கின் கொல்கினுக் ருப்பாம் கேர்.

¹² ஒஸ்த திக்கு ப்ரஹாருக் ஜ²கஸ்தக் கெரரிய படுத்தான் பந்நாஸ் மூரொ லம்பு ர:னொ. தேட் தெ³ஸ்ஸு கஸா கா²ம்புன்கின், தெ³ஸ்ஸு பாத பீடமுன் ர:னொ.

¹³ க²வ்நஸ் திக்கு ப்ரஹாருகெ துர்னி பந்நாஸ் மூரொ உலாஸ் ர:னொ.

¹⁴ எல்லெ ப்ரஹாருகெ துர்னிம் ஒண்டெ பொங்குட் ப²ந்தர் மூரொ லம்பு படுத்தான், தீ²ன் கஸா கா²ம்புன், தீ²ன் பாத பீடமுன் ர:னொ.

¹⁵ திஸோஸ் ப்ரஹாருகெ துர்னிம் அங்குண்டெ பொங்குட் ப²ந்தர் மூரொ லம்பு படுத்தான், தீ²ன் கா²ம்புன், தீ²ன் பாத பீடமுன் ர:னொ.

ப்ரஹாருகெ துர்னி

¹⁶ எல்லெ ப்ரஹாருகெ படுத்தொ நிலொ, கெம்பு, லொ:வ்வா தொரிம்கின், நா:ன் பீளு பஷுதும் கெர்னொ. தெல்லெ படுத்தொ வீஸ் மூரொ லம்பு ர:னொ. தெமாம் ஸிங்கார் பு³ட்டான் ஜுகுயெ ர:னொ. தெக மெனி சார் கா²ம்புன்கின், சார் பாத பீடமுன் கஸாம் கேர்.

¹⁷ ப்ரஹாருக் சுட்டுர் ஸேஸ்தெ கா²ம்புனுக் ருப்பொஹால் ஜா²க். தெக கொல்கினுக் ருப்பாம்கின், பாத பீடமுனுக் கஸாம் கேர்.

¹⁸ ப்ரஹாருகெ லம்பு ஒண்டெ ஸோவு மூரொகின், ரு:ந்தி பந்நாஸ் மூரொகின், உஞ்சொ பாஞ்ச் மூரொ ர:னொ. படுத்தான் நா:ன் பீளு பஷுதும் கெர்னொ. பாத பீடமுனுக் கஸாம் கேர்.

¹⁹ பரிஸுத்த டேராகெ உபகரணுன், டேராக் உட்சி பந்தரிய கு²டான், ப்ரஹாருக் உட்சி பந்தரிய கு²டான் இத்யாதினுக் கஸாம் கெர்னொ.

தி³வா தேல்

²⁰ தி³வொ பொவ்ரஸ்தக் ஒலிவ ஜாடு கய்லாக் தெஸ்கி ஹெடெ தேலுக் சொக்கட் ஸுத்தி⁴ கெரி கள்ளி அவ்னொ மெனி இஸ்ரயேல்னுஜோள் தூ ஸங்கி.

²¹ பரிஸுத்த டேராம் நியமந்த் பெடி ஸேஸ்தெ மஹா பரிஸுத்த ஸ்தலமுக் பராட் எல்லெ தி³வொ ர:னொ; பகவான்கெ ஸந்நிதிம் ராத் தீ³ஸ் எல்லெ தி³வொ கொப்பிம் லகிலேத் ராஸ்ததானுக் ஆரோன்கின் தெகொ பெடான் ஸீல்னொ. தோ²ர் தோ²ர்னுகன் இஸ்ரயேல்னு எல்லே நியதின்தானுக் சல்த கெல்லுனொ.