உபாகமம் 14 - Saurashtra Bible (BSI)

து³க்குகன் ரா:ஹோனா

¹ துமி தும்ரெ தேவ் பகவானுக் பாத்யம். தேஹாலிம் துமி மொஜ்ஜியெ மென்க்யானுக் ஹவ்டி தும்ரெ ஆங்குக் கட்லஹோனா. தொஸ்காகெ ஸொம்மர் கேஸுக் சிவ்லஹோனா.

² காமெனெதி துமி தும்ரெ தேவ் பகவானுக் பாத்யம் ஹொயெ பரிஸுத்த ஜெனுல்னு; புலோகு மென்க்யானும் தும்கோஸ் தெனு பாத்யம்கன் களைள்ரியாஸ்.

காஸ்தக் தெனி பொடெ மூகுன்

³ அஸுத்த⁴ மூகுனுக் துமி காஹோனா.

⁴ துமி காஸ்தக் தெனி பொடெ மூகுன்: கா³யுன், மெ:டி பெண்டுன்,

⁵ ஸெளி பெண்டுன், ராணு ஹரின், பொ³ட்டு ஹரின், ராணு பெண்டுன், ஸிங்க்³டா ஹரின், ராணு பெய்ஸுன், ராணு மெ:டி பெண்டுன்,

⁶ மூகுனும் ப²ங்கிலின் தி³ய்யெகன் பா²ட் ஹொயி, ஸேஸ்தெ லுமரிய மூகுனுக் கவாய்.

⁷ ஹொயெதி லுமரிய மூகுனும்கின், ப²ங்கிலின் ஸேஸ்தெ மூகுனும் முயி, குந்தல், க²ணி குந்தல் இத்யாதினுக் காஹோனா. காமெனெதி தெல்லெ மூகுன் லுமய். ஹொயெதி தெகொ ப²ங்கிலின் ஜுண்ணா. தேஹாலிம் தெல்லெ தும்கொ அஸுத்த⁴ மூகுன்.

⁸ து³க்கருக் ப²ங்கிலின் ரா:ய். ஹொயெதி தெல்லெ லுமுனா; தேஹாலிம் தெல்லெ மெளி அஸுத்த⁴ மூகு. தெல்லெ மூகுக் துமி காஹோனா. மொஜ்ஜிய து³க்கருக் ஹண்டஹோனா.

⁹ பனி ஜீவுனும் பிங்குடொ³கின், பொக்கு ஸேஸ்தெ ஜீவுனுக் துமி கவாய்.

¹⁰ பிங்குடொ³கின் பொக்கு நீ:ஸ்த ஜீவுனுக் துமி காஹோனா. தெல்லெ அஸ்கி தும்கொ அஸுத்தி⁴கன் ரா:ய்.

¹¹ அஸுத்தி⁴ நீ:ஸ்த அஸ்கி பக்ஷினுக் துமி கவாய்.

¹² ஹொயெதி தெமாம் மெளி துமி கா²ன் ஹோனாஸ்த ஜீவுன் ஸே. தெல்லெ காயொ மெனெதி:

¹³ திஸ்ளொ, கெ⁴ருட், ராணு பக்ஷி, மாம்ஸ பக்ஷி, ஸகல வித கெ⁴ருடுன்,

¹⁴ ஸகல வித கவ்ளான்,

¹⁵ விஸ்தவு குடின், ராணு குடின், செம்பு பக்ஷி, ஸகல வித ராணு பக்ஷின்,

¹⁶ கூ⁴கொ, ராணு கூ⁴கொ, குக்ரொ,

¹⁷ ம:ளி பக்ஷி, பனி கவ்ளான், பனி குடின்,

¹⁸ ப⁴கொ, லம்பு பாய்ஞ் பக்ஷின், கிடா பக்ஷின், கொ³வ்டாய் இத்யாதினுக் காஹோனா.

¹⁹ ஹுடரிய கிடானுக் மெளி காஹோனா. தெல்லெஅஸ்கி தும்கொ அஸுத்தி⁴ ஹொயெஸ்தெ.

²⁰ அஸுத்தி⁴ நீ:ஸ்த ஸகல பக்ஷினுக் துமி கவாய்.

²¹ மொஜ்ஜியெ மூகுனுக் துமி காஹோனா. தெல்லெ மூகுக் தும்ரெ கா³மும் ஸேஸ்தெ விதேஸினுக் தீடுவொ. நீ:மெனெதி அந்யத்ரான்ஜோள் விக்குதுவொ. பெண்டு பில்லாக் தெக மாயு தூதும் ஹந்தஹோனா. காமெனெதி துமி பகவானுக் பாத்யம் ஹொயெ பரிஸுத்த ஜெனுல்னு. (லேவி 7:24)

தட்சணகன் தெனி பொடரிய தான்யமுன்

²² ஒண்டொண்டெ ஒர்ஸு தும்ரெ பு⁴ஞிர் ஹொடரிய அஸ்கி தான்யமுனும் தெ³ஸ்ஸும் ஒண்டெ வடொ பகவானுக் தீடுவொ.

²³ தும்ரெ தேவ் பகவான் அபுல் நாவ் கீர்த்தி பொந்தஸ்தக் நிர்ணயம் கெரரிய ஸ்தலமும் தும்ரெ தான்யமுனும்கின், திராட்செ ரெஸ்ஸுனும்கின், தேலும் தெ³ஸ்ஸும் ஒண்டெ வடொ தட்சணான் கள்ளி அவொ. தும்ரெ கா³ய் பெண்டுன்கெ பெ²ய்லட்னுக் பகவான்கெ ஸந்நிதிம் பலி தெ³னொ. திஸனி கெரெதி துமி தும்ரெ தேவ் பகவானுக் கெனம் தேராஸ் மெனி அர்து.

²⁴ தும்ரெ தேவ் பகவான் தும்கொ ஆஸீர்வாத் கெரஸ்தவேளு, அபுல் நாவ் கீர்த்தி பொந்தஸ்தக் நியமுன் கெரெ புண்ய ஸ்தலம் தும்கொ ஜுகு துதூர் ர:வாய். தெப்பொ துமி ஜுகு தூர் ப்ரயாண் கெரஸ்தக் ஸ்ரமொ லகி, தும்ரெ தட்சணான் பா⁴ர்கன் ஸேஸ்தெஹால் கள்ளி ஜான் முஸுனா ஜியெதி,

²⁵ தெல்லெ தட்சணானுக் விக்கி, ஹன்னவ்கன் கள்ளி, தும்ரெ தேவ் பகவான்கெ புண்ய ஸ்தலமுக் ஜீலி அவொ.

²⁶ தேட் துமி ப்ரேவ் பொடரியதானுக் கா³ய் பெண்டுன், திராட்செ ரெஸ்ஸு, பொள்ளா ரெஸ்ஸு அங்குன் தும்ரெ மொன்னுக் ஒப்பயெஸ்தெ அஸ்கி மோலுக் க²டி கவொ. துமிகின், தும்ரெ குடும்பமுன் தும்ரெ தேவ் பகவான்கெ ஸந்நிதிம் கய்தி ஸொந்தோஷ்கன் ர:வொ.

²⁷ லேவியர்னுக் ஆஸ்தின் தெனி பொட்னாஸ்தஹால் தெங்கொ பஜெ ஸேஸ்தெ தேஸ்தக் துமி ஹவ்டன் ஜவள்ளஹோனா.

²⁸ தி²ன்வ ஒர்ஸு முஸரிய ம:டாம், தெல்லெ தீ²ன் ஒர்ஸும் ஹொடெ அஸ்கி தான்யமுனும் தெ³ஸ்ஸும் ஒண்டெ வடொ அலக்க³ ஹெடி தும்ரெ பட்ணமும் ஸேஸ்தெ கிட்டங்கிம் செர்சி தொவொ.

²⁹ தும்கொ அப்பரியஸோன் ஆஸ்திம் பாத்யம் அப்புனாஸ்த லேவியர்னுக்கின், தும்ரெ பட்ணமுனும் ஜிவரிய அந்யத்ரான், அநாதென், விதவென் தெல்லெ தான்யமுனுக் உபயோக் கெல்லந்தக். தெப்போஸ் தும்ரெ தேவ் பகவான் துமி கெரரிய அஸ்கி காமுனும் தும்கொ ஆஸீர்வாத் கெரன்.