1 சாமுயேல் 9 - Saurashtra Bible (BSI)

சாமுயேலுக் தெக்கரிய சவுல்

¹ பென்யமீன் கோத்ரும் கீஸ் மெனி ஒண்டெதெனொ ஹொதெஸ். தெனொ ஜுகு பலசாலிகன், ம:ட்ட தனவான்கன் ஹொதெஸ். தெனொ அபியேல்கெ பெடொ. சேரோர்கெ நத்யெ; பெகொராத்கெ போட் நத்யெ; அபியாகெ பாட் நத்யெ.

² தெல்லெ கீஸுகெ பெடோஸ் சவுல். தெனொ ஜுகு ஸிங்கார் ஜவ்ணொ. இஸ்ரயேல்கெ ஜவ்ணானும் எனோஸ் ஜுகு ஸிங்கார். அஸ்கினா ஸொம்மர் எனொ வேன் உஞ்சொ ரா:ய். துஸ்ர அஸ்கின் தெகொ காந்துஸோரு ரா:ன்.

³ ஒண்டெதி கீஸுகெ கெதடுன் கம்டஜ்ஜியொ. தெப்பொ தெனொ அபுல் பெடொ சவுலுக் பொவி, “தூகின் துரெ காம்கெரெ கெதடுனுக் வெக்கிலி ஜவொ” மெனி ஸங்கி தட்டியெஸ்.

⁴ த்யெதானுக் தெனு நிகிளி எப்பிராயீம் தொங்கரு கா³முக் தடி சலீஷா கா³ம் பூரா வெக்கிலி ஜியாஸ். தேட் கொட்டி தெங்கொ கெதடுன் ஹொதெனி. தெனு சலீஷா கா³ம்ரீ: பென்யமீன் தேஸுக் தடி ஜியாஸ். தேட் மெளி அப்பெனி.

⁵ தெனு சூப் தேஸ் லெங்கு ஜீ வெக்கிலி ஜீ மெளி கெதடுன் அப்பெனி. தேஹாலிம் சவுல் அபுல் காம்கெரெஜோள் “கம்டயெ கெதடுகெ விசார் ஸொம்மர் அம்ரெகுர்சி மொர் பா³ப் வேன் விசார் பொடரா:ன். தேஹாலிம் அமி பிரி கே⁴ருக் ஜேடியேன்” மெனி மெனெஸ்.

⁶ தெல்லெகொ காம்கெரெ, “எல்லெ கா³மும் பகவான்கெ தீர்கதரிஸி ஒண்டெதெனு ஸே. தெனு ஜுகு கெனம் பொந்த்யாஸ்தெனு. தெனு ஸங்கரியதானுக் அஸ்கி சலய். தேஹாலிம் அமி தெங்கொஜோள் ஜீ புஸியேன். அமி கொங்குட் ஜீ வெக்குனொ மெனி தெனு ஸங்கன்” மெனி மெனெஸ்.

⁷ சவுல் தெகொஜோள், “ஸெர்க, அமி ஜியேன். ஹொயெதி தெங்கொ அமி காய் தேஸ்த? ஒண்டெ அப்பம் மெளி அம்ரெஜோள் நீ:னா. பகவான்கெ தீர்கதரிஸிக் தேஸ்தக் அம்ரெஜோள் தட்சண மெளி நீ:னா” மெனி மெனெஸ்.

⁸ தெப்பொ காம்கெரெ சவுல்ஜோள், “மொர்ஜோள் சொவ்தொ சேக்கல் ருப்பொ ஸே. தெல்லெ தெங்கொ தட்சணகன் தெவாய். அமி கொங்குட் ஜனொ மெனி தெனு அம்கொ ஸங்கன்” மெனி மெனெஸ்.

⁹ முல்லா காலும் இஸ்ரயேல்னு தேவ்ஜோள் காய்தி புஸி களைளுனொ மெனெதி “அவொ, அமி தர்ஸனவானுக் தெக்கஸ்தக் ஜியேன்” மெனி மெனன். தெல்லெ காலும் பகவான்கெ தீர்கதரிஸிக் மெளி தர்ஸனவான் மெனி பொவன்.

¹⁰ தெல்லெகொ சவுல் அபுல் காம்கெரெஜோள், “தூ சொக்கட்கன் ஒண்டெ யோஜன ஸங்கிரியொ. ஆவ், அமி கா³ம் பிஸ்தர் ஜியேன்” மெனி மெனெஸ். த்யெதானுக் தெனு பகவான்கெ தீர்கதரிஸிக் வெக்கிலி கா³ம் பிஸ்தர் ஜியாஸ்.

¹¹ தெனு தெல்லெ கா³முகெ தொங்கர் ஹொல்லெ ஹிங்கஸ்தவேளு பனி தெர்லி அவரிய பெட்கினுக் தெக்கி தெங்கொஜோள், “தர்ஸனவான் ஏட் ஸேகீ?” மெனி புஸ்யாஸ்.

¹² தெல்லெகொ தெனு, “ஹாய், தெனு எடூஸ் ஸே. துமி அவஸ்தக் முல்லோஸ் தெனு அவ்டியாஸ். ஸெணம் ஜவொ. மென்க்யான் பலி தீ³, பகவானுக் பாய்ம் பொடஞ்ஜாரியஹால் தெனு ஹிந்தொ கா³முக் அவ்ரியாஸ்.

¹³ துமி ஸெணம் கா³ம் பிஸ்தர் ஜவொ; தெப்போஸ் துமி தெங்கொ தெக்கன் முஸய். தெனு ஜெமனுக் ஜாஸ்தக் முல்லோஸ் துமி ஜீ தெக்குதுவொ. மென்‍க்யான் பலி தியெ க²வ்ணமுக் தெனு ஆஸீர்வாத் கெரெ பல்சோஸ் அஸ்கின் கான். தெனு ஆஸீர்வாத் கெரஸ்த லெங்கு கொன்னின் கானான். தேஹாலிம் துமி அத்தோஸ் ஜியெதி தெங்கொ தெக்குதுவாய்” மெனி மென்யாஸ்.

¹⁴ த்யெதானுக் சவுல்கின், தெகொ காம்கெரெ ஸெணம் கா³ம் பிஸ்தர் ஜியாஸ். தெனு கா³மு தார் லெகுத்த அவெவேளு சாமுயேல் பலி பீடம் ஸேஸ்தெ தொங்கருக் ஜாஸ்தக் வெதுர் அவெஸ்.

¹⁵ சவுல் தெல்லெ கா³முக் அவஸ்தக் ஒண்டெதீ முல்லோஸ் பகவான் சாமுயேல்ஜோள்,

¹⁶ “ஸொந்தொ ஈ கெ⁴டி பென்யமீன் கோத்ரு மெனிக் ஒண்டெதெகாக் மீ துரெஜோள் தட்டு. மொர் மென்க்யானுக் ராஜ்ஜலஸ்தக் தெகொ தூ ரஜொகன் அபிஷேக் கேர். தெனொ இஸ்ரயேல்னுக் பெலிஸ்தியர்னுஜோள்ரீ: கபடய். மொர் மென்க்யான் ‘அம்கொ கபடுவொ’ மெனி ரொடரிய ஸெத்து³க் மீ அய்கெஸ். தெனு பொடரிய பாதாக் மீ ஸியெஸ்” மெனி ஸங்கி ஹொத்யாஸ்.

¹⁷ சாமுயேல் சவுலுக் தெக்கஸ்தக்கின், பகவான் சாமுயேல்ஜோள், “மீ தொகொ ஸங்கி ஹொதெ மெனிக் எனோஸ். எல்லெ மெனிகூஸ் மொர் மென்க்யானுக் ராஜ்ஜலய்” மெனி மென்யாஸ்.

¹⁸ சவுல் சாமுயேல்ஜோளூஸ் அவி, “தர்ஸனவான்கெ கே³ர் கோட் ஸே” மெனி புஸெஸ்.

¹⁹ சாமுயேல் சவுல்ஜோள், “தர்ஸனவான் மீஸ். துமி தீ³தெனு முல்லொகன் சலி ஜீ, பலி பீடம் ஸேஸ்தெ தொங்கரு தாமுக் ஜவொ. ஹிந்தொ மொர் ஸெங்கொ க²வ்ணம் கவொ. ஸொந்தொ ஸொளபார் துமி நிகுளஸ்தக் முல்லொ தும்ரெ மொன்னும் காய் ஸே மெனஸ்த மீ ஸங்குஸ்.

²⁰ தீ²ன் தின்னு முல்லொ கம்டயெ கெதடுனுகுர்சி விசார் பொடுங்கன். தெல்லெ அப்பில்டியொ. ஹொயெதி இஸ்ரயேல்கெ ஆஸ்தின் பூரா தொகொகின், துரெ கொ⁴ம்மா மென்க்யானுக் பாத்யம்கன் அப்பஞ்ஜாரெஸ்” மெனி மெனெஸ்.

²¹ தெல்லெகொ சவுல், “இஸ்ரயேலும் பென்யமீன் கோத்ருஸ் ந:ன்னயெ. தெல்லெ பென்யமீன் கோத்ரும் ஜுகு ந:ன்ன குடும்பம் அமீஸ். திஸொ ர:த மொர்ஜோள் துமி இஸனி மெனராஸ்னா?” மெனி மெனெஸ்.

²² பல்சொ சாமுயேல், சவுலுக்கின், தெகொ காம்கெராக் ஜெமனு தாமுக் பெல்லி ஜியெஸ். பொவ்னான்கன் அவ்ரிய 30 (தீஸ்) மென்க்யானும் எங்கொ முக்ய தாம் தியெஸ்.

²³ தீநா:ஸ்தக் சாமுயேல் ஹந்தப் கெரெஜோள் “மீ அலக்க³ ஹெடி தோ²வ் மெனி ஸங்கெ பொ³ஸுலானுக் ஏட் கள்ளி ஆவ்” மெனி மெனெஸ்.

²⁴ ஹந்தப்கெரெ ஜீ ஒண்டெ மடி பொ³ஸுலாக் கள்ளி அவி சவுல்ஜோள் தொவெஸ். தெப்பொ சாமுயேல் சவுல்ஜோள், “எல்லெ பொ³ஸுலாக் மீ விஷேஸ்கன் தொகொகுர்சி ஹெடி தொவ்ரியொ. துஸ்ர அஸ்கினாக் ஜெமனுக் பொவஸ்தக் முல்லோஸ் மீ தொகொ மெனி விஷேஸ்கன் எல்லெ பொஸுலாக் அலக்க³ ஹெடி தொவ்தியொ” மெனி மெனெஸ். தெந்துஸ்தி சவுல் சாமுயேல் ஸெங்கொ பி³ஸி க²வ்ணம் கயெஸ்.

²⁵ பல்சொ தெனு தொங்கரும்ரீ: கா²ல் ஹுத்திரி அவ்யாஸ். சாமுயேல் அபுல் கொ⁴ம்மொ உஞ்சொ வித்தெ³ர் சவுலுக் பெல்லி ஜியெஸ். தேட் ருவ்வொ கெ⁴டி தீ³தெனு வத்தொ கெர்லேத் ஹொத்யாஸ். தெந்துஸ்தி ராத் சவுல்கின், தெகொ காம்கெரெ தெடூஸ் நிஞ்ஜில்டியாஸ்.

²⁶ சாமுயேல் பல்திபார் ஹுடி அவி வித்தெ³ர் நிஞ்ஜி ஹொதெ சவுலுக் ஸீ, “ஹூட், ஸெணம் நிகிளி ஆவ்” மெனி மெனெஸ். சவுல் ஹுடி க²ல்லெ அவெஸ். பல்சொ தீ³தெனு வத்தொ கெர்லேத் சலி ஜியாஸ்.

²⁷ தெனு கா³மு ஸொவட் லெங்கு ஜியாஸ். சாமுயேல் சவுல்ஜோள், “துரெ காம்கெராக் ஸொம்மர்கன் ஜா மெனி ஸங்கி” மெனி தட்டியெஸ். பல்சொ சாமுயேல் சவுல்ஜோள், “எடூஸ் ஹிப்பி ரா: பகவான் மொர்ஜோள் ஸங்கெ ஸமசாருக் மீ தொகொ ஸங்குனொ ஸே” மெனி மெனெஸ்.