1 சாமுயேல் 29 - Saurashtra Bible (BSI)

தாவீதுக் அவெ கஷ்டம்

¹ பெலிஸ்தியர்னு அபுல் ராணுவமுக் ஆப்பெக் கா³மும் ஒண்டேஸ்கன் மிளட்யாஸ். இஸ்ரயேல்னு அபுல்நு ராணுவமுக் யெஸ்ரயேல் பனிகஸு லெகுத்த மிளட்யாஸ்.

² பெலிஸ்தியர்னுகெ ராணுவம் தெல்லெ தெல்லெ ராஜ்யமுகெ அதிபதின் கா²ல் ஸோன்னு லெ:க்க வீருடுன்கின், ஸஸர்னு லெ:க்க வீருடுன் ஒண்டேஸ்கன் மிளி ஹிப்யாஸ். தாவீதுகின், தெகொ யுத்த வீருடுன் காத் தேஸு ரஜொ ஆக்கிஸ் ஸெங்கொ ஹிப்பி ஹொத்யாஸ்.

³ தெப்பொ பெலிஸ்தியர்னுகெ ராணுவ அதிபதின் ஆக்கிஸ்ஜோள், “எல்லெ எபிரேயர்னு ஏட் ககொ விருதாகன் ஹிப்பி ரா:ஸ்தெ? மெனி புஸ்யாஸ். தெல்லெகொ ஆக்கிஸ், “எனொ இஸ்ரயேல்கெ ரஜொ சவுல்ஜோள் யுத்த வீருடுன் ஹொதெ தாவீது. அத்தொ எனொ மொர் ஸெங்கொ ஜுகு தின்னுகன் ஸே. மொர் ஸெங்கொ ஹொதெ எல்லெ தின்னுநும் மீ எகொஜோள் ஒண்டெ சூக் மெளி தெக்கிரெனி” மெனி மெனெஸ்.

⁴ தெப்பொ பெலிஸ்திய ராணுவ அதிபதின் ஆக்கிஸுக் ஸீ ராக்³ பொடி, “தூ தெகொ கோட்ரீ: பெல்லி அவெஸ்கீ தெடூஸ் பிரி தட்டிடெ. தெனொ அம்ரெ ஸெங்கொ அவஹோனா. காமெனெதி தெனொ யுத்தமும் இஸ்ரயேல்னு ஸெந்தொ மிளி அம்கொ நாஸ் கெரெத் மெளி கெர்துகய். திஸனி கெரி தெனொ அபுல் எஜமான்ஜோள் சொக்கட்தெனொ நாவ் கள்ளஸ்தக் ஸாய்.

⁵ ‘சவுல் 1,000 (ஸஸர்) தெங்காக் மொரடெஸ்; தாவீதுகீ 10,000 (தெ³ஸ்ஸு ஸஸர்) தெங்காக் மொரடெஸ்’ மெனி எல்லெ தாவீதுகுர்சீஸ் அம்மான் நச்சி கீத் க³வ்யாஸ்தெ?” மெனி மென்யாஸ். (1 சாமு 18:7; 21:11)

⁶ தெப்பொ ஆக்கிஸ் தாவீதுக் பொவி, “தூ மொர்ஜோள் அவெ தின்னுரீ: எல்லெ தின்னு லெங்கு துரெஜோள் ஒண்டெ சூக் மெளி மீ தெக்கிரெனி மெனி ஜீவ் ஸேஸ்தெ பகவான் ஹொல்லெ ஸெத்து கெரி ஸங்கரியொ. தூ மொர் ஸெங்கொ யுத்தமுக் அவஸ்த மொகொ கொன்னி ப்ரசன நீ: ஹொயெதி பெலிஸ்திய ராணுவ அதிபதினுக் ஒப்பாரெனி.

⁷ பெலிஸ்தியர்னுகெ மொன்னுக் விரோத்கன் தூ ககொ ஏட் ர:னொ? தேஹாலிம் தூ ஸமதான்கன் கே⁴ர் ஜா” மெனி மெனெஸ்.

⁸ தாவீது தெகொஜோள், “தும்கொ மொன்னு விசார் லகஸ்ததானுக் எல்லெ தின்னு லெங்கு கொப்பதி மீ காய்தி கெர்ரெஸ்கீ? மொர் ரஜொகின், எஜமான்கன் ஸேஸ்தெ தும்ரெ ஸெங்கொ மிளி தும்ரெ விரோதின் ஸெங்கொ யுத்தம் கெரஸ்தக் அவஹோனா மெனி ஸங்கஸ்தக் மீ காய் சூக் கெரெஸ்” மெனி புஸெஸ்.

⁹ தெல்லெகொ ஆக்கிஸ், “தூ தேவு தூதுஸோன் சூக் நீ:ஸ்தெனொ மெனி மொகொ சொக்கட் களாய். ஹொயெதி பெலிஸ்திய ராணுவ அதிபதின், ‘எனொ அம்ரெ ஸெங்கொ யுத்தமுக் அவஹோனா’ மெனி மெனராஸ்னா. மீ காய் கெரன் முஸய்.

¹⁰ தேஹாலிம் தூகின், துரெ யுத்த வீருடுன் பல்திபார் ஸெணம் ஹுடி ஏட்ரீ: ஜேடுவொ” மெனி மெனெஸ்.

¹¹ பல்சொ ஆக்கிஸ் ஸங்கெதானுக் தாவீதுகின், தெகொ யுத்த வீருடுன் பல்திபார் ஹுடி பெலிஸ்திய தேஸுக் ஜியாஸ். பல்சொ பெலிஸ்தியர்னு யுத்தம் கெரஸ்தக் யெஸ்ரயேல் பட்ணமுக் ஜியாஸ்.