2 Yoana 1 - Samburu

Nkirorokino

¹ Kore ana palai naa keing'uaa lochi payian arrarri. Kairoroki nkitok nageluno o nkera enyena nacham katukul, namara nanu ake apeny oacham, kake kecham abaki lolo pooki ooyielo ndedei,

² nikicham ninche tankaraki ndedei nawuon taatua iyioo, netii tenebo o iyioo ntarasi.

³ Metaa munyani o lng'ur o sotua oing'uaa Nkai Papa o Yeso Kristo Nkerai e Nkai, tenebo o iyioo te sipata o te nchaman.

Embung'a ndedei niwuenini taatua nchaman

⁴ Kating'ide oleng payie atum mbata ee nkera inono eirukurukore ndedei, ana apa naitaarriyianaka iyioo Papa.

⁵ Kore taata naomon iyie nkitok nageluno, matachamata maate. Namara ketuwuana nkitanapata ng'ejuk ana naaigerokita, kake inia apake nikiata ta ng'asunoto.

⁶ Naa inji eikununo nchaman, nchere payie kirukurukore nkitanapat enyena. Ana naa nkitanapata, nchere payie ipoyieyie nchaman ana nitining'o apake ta ng'asunoto.

⁷ Amu ketijing'a lasapak kumo nkop lemeibalunyie aajo kore Yeso Kristo naa keyewuo era ltung'ani katukul oata sesen. Kore ilo naa lasapani nera loiba Kristo.

⁸ Errita ate payie miminienie inia nikitonyuaa aas, kake oi payie elaakini ntae ebore.

⁹ Kore pooki ng'ae olo kue nemewuon taatua nkiteng'ena e Kristo naa meata Nkai. Kake kore pooki owuon taatua inia kiteng'ena naa keata ꞉ninye Papa o Nkerai.

¹⁰ Kore teneatae ltung'ani olotu nitii nemeyau ana kiteng'ena, emintoomon ninye ta nkaji tanaa irorokiki.

¹¹ Amu kore loiroroki ninye naa kechulare tee nenia torrok enyena.

Nkirorokino e siedi

¹² Kore abaki duo aata mbaa kumo naigeroki ntae, kake mayieu naigeroki ntae ta lkalamu o ta mpalai. Kore naa siligi laata, naa payie airorie ntae kiduaa nkomomi neboreii taa ng'ida ang.

¹³ Keiroroki naa ntae nkera e nkanache ino nageluno.