1 Yoana 1 - Samburu

Rerei le nkichui

¹ Kore ilo otii apake ta ng'asunoto, nikitining'o, nikitoduaa too nkonyek ang, nikimbung'a taa nkaik ang, naa ninye ilo rerei le nkichui likilikoo.

² Kore inia kichui naa /keibalunyieki, nikitoduaa, nikilimu, nikilikoo sii aajo nchere ninye nkichui ee ntarasi natii apa tenebo o Papa, neinyiaka sii aipung'oki iyioo.

³ Ninye kitoduaa, nikitining'o, naa ninye kiliki ntae payie itumtum nchula o iyioo. Naa kore nchula ang naa nchula e Nkai Papa lang o ne Nkerai enye Yeso Kristo.

⁴ Ikingerito iyioo ana, payie eitabari ng'ida aang.

Nchula nikiata o Nkai o looiruko Yeso

⁵ Naa ele taa lkilikuai likitining'o te ninye nikimbalie taa ntae aajo, kore Nkai naa wong'an, nemeatae naimin taatua ninye katukul.

⁶ Kore tinikijo ikiata nchula o ninye nikipuoito taatua naimin, naa ikisapicho nimikiasichere ndedei te nkichon ang.

⁷ Kake kore tinikitii atua wong'an ana payie etii ninye atua wong'an, naa ikiata nchula maate. Naa kore lodo le Nkerai enye Yeso, neitukoo ng'ok ang pooki.

⁸ Kore tinikijo mikiata ng'ok, naa ate kisapita nemeti ndedei atua iyioo.

⁹ Kore tinikimbalie ng'ok ang, naaku kepaliki ninye iyioo, neitoki aitukoo iyioo ntorroni pooki, amu keisiligai ninye nera lopeny sipat.

¹⁰ Kore tinikijo eitu kias ng'ok, nikintaa ninye losapicho, naaku meti rerei lenye atua iyioo.