1 Ltesalonike 5 - Samburu

Enterretenata nimiurieichocho

¹ Lalachera o nkanachera, kore mbaa naaipirita nkatitin o ng'amat, naa meyiere nikingeroki ntae,

² amu kore ntae maate, naa iyielolo katukul aajo kelotu mparri e Laitoriani ana neiko lapurroni tenelotu meitekini kuarie.

³ Kore ewueni ltung'ana aajo, <>, kore ta nkata nemeitekini, neirrachu mutai ninche ana neiko saisai teneirrachu ntomononi natunute, nemeata hoo nepaachereyie.

⁴ Kake lalachera o nkanachera, mitii naa ntae atua naimin eji paa keirrachu ntae inia parri ana lapurroni.

⁵ Amu irara ntae pooki nkera e wong'an, nirara sii nkera e mparkiji. Mikira ne nkuarie anaa ne naimin.

⁶ Naaku naa, mikilura ana neiko lkulie kake matirripicho nikiparricho aaitibiraki!

⁷ Amu kore looilura naa kuarie eilura, kore sii loomera naa kuarie emera.

⁸ Kake kore amu ikira le mparkiji, mataa loaaparricho aaitibiraki! Maichopo naa nkurukoto o nchaman ana nchuret e lgoo, nikinchop sii siligi le njeunoto ana nkopiyia e senkei.

⁹ Amu eitu egelu iyioo Nkai payie emut iyioo ngoro enye, kake payie kitum njeunoto naimu Laitoriani lang Yeso Kristo,

¹⁰ ilo otua tankaraki iyioo paa kore tanaa ikinchu tanaa kilurate, naa ikinchu tenebo o ninye.

¹¹ Naaku entaarriyianata, nintogololo ltauja ana ninkunitata.

Nkitaarriyiana o nkirorokino e siedi

¹² Naa ikisai ntae lalachera o nkanachera, payie ianyitinyit lolo oonyokita eas siaai taatua ntae, nerikoo ntae taatua Laitoriani, neing'ode ntae payie miasias ntorrok.

¹³ Ninchocho ninche nkanyit te nchaman kitok oleng tankaraki siaai enche. Entubulai seriani taatua ntae!

¹⁴ Lalachera o nkanachera, ikilej ntae! Eng'odia lolo lemeyieu neas siaai, entogolo lolo ootigilete ltauja, niretret loaachal tee seseni, ning'iriri too ltung'ana pooki.

¹⁵ Entodol metaa, meata linchi oitalaku ntorno to ntorno, kake entonyok entaasata maate o lkulie tung'ana pooki mbaa supati nkata pooki.

¹⁶ Enting'idata nkata pooki.

¹⁷ Emipal aikata miomonmon.

¹⁸ Kore taatua mbaa pooki, enchoo Nkai nache, amu inia eyiewuoki ninye ntae taatua Kristo Yeso.

¹⁹ Emiar nkima e Ltau Sinyati.

²⁰ Emimen naibon e Nkai,

²¹ kake entetem ntoki pooki, nintirrichakiki aaibung inia supat.

²² Entapaachere mpukunot pooki torrok.

²³ Naa enchoo meitisinya ntae katukul Nkai e sotua makoon. Kore mpukunoto inchi pooki, aa nkiyeng'et o nkichui o seseni linchi, naa enchoo metaa meata ntioto to lotunoto e Laitoriani lang Yeso Kristo.

²⁴ Kore ilo oipoto ntae naa keisiligai, naa keas ninye.

²⁵ Lalachera o nkanachera, entoomonoki iyioo.

²⁶ Eroroki lalachera o nkanachera pooki to ngusoto e nchaman.

²⁷ Kaitanap ntae ta nkarna e Laitoriani payie eisomakini ana palai lalachera o nkanachera pooki.

²⁸ Metaa munyani e Laitoriani lang Yeso Kristo tenebo o ntae.