1 Lkorinto 2 - Samburu

Ngolon e Nkai eitacheyie nkurukoto inchi

¹ Kore sii apa nanu payie alotu nitii lalachera o nkanachera ainien, eitu aliki ntae inia dedei e Nkai naisudoro apa eji atuwuana laiguanani oisul pooki ara, naisul sii te ng'eno.

² Amu kore apa atii tenebo o ntae, katudung'o nchere mayieu paayielou ntoki mara ake inia naipirita Yeso Kristo otechoki to lmusalaba.

³ Kayewuo nanu nitii achal naikirikira tankaraki ngureticho.

⁴ Mara ng'eno ai naichoo ntae iruko, kake rerei lai o likoroto ai nataasa inia to ngolon e Ltau Sinyati,

⁵ payie meaku ng'eno ee ltung'ana eitacheyie nkurukoto inchi, kake ngolon e Nkai.

Ng'eno e Nkai

⁶ Kake keatae ng'eno nikilikoo kitii atua lolo ootubulutua, neteyieloutua mbaa e Nkai. Naa kore ana ng'eno mara nana kop namara naa larikok lenyena ooidaaya.

⁷ Ikiimaki ng'eno e Nkai too nkoitieii nemening'u ltung'ana pooki. Ketegelua Nkai inia ng'eno ewuon eitu eitibir ana kop, payie kitum iyioo aatijing atua nkitoo enye te inia ng'eno enye.

⁸ Meatae hoo loaata nkitoo tana kop oteyielo inia ng'eno, amu tanaa apa keteyielto anata apa eitu eche Laitoriani openy nkisisa to lmusalaba.

⁹ Kake kore nikilikoo naa inia naigero too Lkigerot Sinyat nchere, <>

¹⁰ Kake iyioo eiteyielo Nkai nenia baa naaisudoro, aimunyie Ltau lenye Sinyati. Amu Ltau Sinyati osipu ntokitin pooki metabaki nenia naagut e Nkai.

¹¹ Ng'ae oidim ateyielo mbaa naatii atua ltung'ani mara ake ilo tau otii atua ninye? Nejia sii etiu, meatae looidim ateyielo naatii atua Nkai mara ake Ltau le Nkai.

¹² Eitu naa king'amaa iyioo ltau oaata ltung'ana le nkop, kake Ltau Sinyati ooing'uaa Nkai payie kitum aateyielo nenia baa /naichoo iyioo Nkai pecheu.

¹³ Ikilikoo kuna mbaa, namara tee rereii ooing'uaa ng'eno e ltung'ani, kake tee rereii ooing'uaa Ltau Sinyati kinteng'enicho, nikilimu nenia mbaa enyena to nkoitiei enye.

¹⁴ Kore ltung'ani lemeata Ltau le Nkai, nemeng'amaa sipat naing'uaa ninye amu madai nenia te ninye, nemeidim ateyielo amu mbaa nenia naasipuni ta ltau le Nkai.

¹⁵ Kore ltung'ani oaata Ltau le Nkai nesipu mbaa pooki, kake meatae loidim atisipu ninye.

¹⁶ Ana naigero too Lkigerot Sinyat nchere, <> Kake kore iyioo naa ikiyielo mparrunot e Kristo.