റോമഗാറാര് 8 - സാമി സേദിസാമിനിഗാല് നഡാത്ത്‌ന്റവാര് ആയിര്‌ന് 1 അദ്‌നാലെ ഇന്നാല് ക്‌റ്‌സ്‌ത്ത് ഏസ്സോഡ ഒന്റായി പെ്ളേക്ക്‌ന്റവാര്‌ക്ക് പാവാക്ക് കെ്ഡേക്കുവ ദെ്ണ്ടണെ ഇല്ലെ. 2 ക്‌റ്‌സ്‌ത്ത് ഏസ്സ്‌ല് ഒന്റായിര്‌ക്കുവാദ്‌നാലെ നമാക്ക് സാമിനിഗാല് തരുവ പുദ്യ പെ്ളേപ്പ് കെ്ഡേത്തിര്‌ക്ക്‌ന്റ്. അത്തെ പാവാക്ക്‌മ് സാവുക്കുമു ആളാക്കി ബെത്ത്‌റ്‌ക്കുവ സട്ടാത്ത്‌ലിന്ത് സാമിനിഗാല് നമാന ബ്‌ഡിസിര്‌ക്ക്‌ന്റ്. 3 ആന സാമി സട്ടപഡി നഡാന്ത് പാവാത്ത്‌ലിന്ത് തപ്പിസി കഡാക്ക്യ നമാക്ക് ആവാദില്ലെ. എന്ത്‌ക്കെന്റ് സൊന്ന മന്‌സാരാന നമ്മ കുറ്റകൊറേവുള്ളവാര് ആനാദ്‌നാലെ സാമി സട്ടപഡി നഡാക്ക്യ മുഡിവാദില്ലെ. അദ്‌നാലെ നമ്മ് പാവാന തീര്‌ക്ക്യ ബേ്ണ്ടി നമ്മ് ഉരുവാത്ത്‌ല് നമാന പാസെ ഇര്‌ക്കുവ ഒന്റു മന്‌സാനായി സാമി തന്ന് മഗാന്‌ന ഉലഗാക്ക് സൊല്ലി ബ്‌ട്ടാന്. നമ്മ് പാവാക്ക് കെ്ഡേക്കുവ ദെ്ണ്ടണെന അയാള് ഏറ്റെഡ്‌ത്താന്. 4 അത്തെ നമ്മോഡിര്‌ക്കുവ പാവ പളാക്കാക്ക് കെ്ട്ട്‌പട്ട് നഡാക്കാദെ സാമിനിഗാല്‌ക്ക് കെ്ട്ട്‌പട്ട് നഡാക്കുവ നമാക്ക് സാമി സട്ടാത്ത്‌ല് സൊല്ലിര്‌ക്കുവ നേര്‌മെ ഉള്ള കാര്യഗാള്‌ന ഗേയ മുഡിമ്. 5 പാവ പളാക്കാത്ത്‌ല് പെ്ളേക്ക്‌ന്റവാര് തമ്മ് പാവ പളാക്കാക്ക് തഗ്‌ന്ത ആസെപഡി നഡാക്ക്‌ന്റാര്. സാമിനിഗാല് സൊല്ലുപഡിക്ക് പെ്ളേക്ക്‌ന്റവാര് സാമിനിഗാല് ആസെപട്ട കാര്യഗാള്‌നത്തെ നെനേക്ക്‌ന്റാര്. 6 പാവ പളാക്കാക്ക് കെ്ട്ട്‌പട്ട് നഡാക്ക്‌ന്റവാര് സാവുക്കാളാവാര്. സാമിനിഗാല് സൊല്ലുക്കു കെ്ട്ട്‌പട്ട് നഡാക്ക്‌ന്റവാര്‌ക്ക് നിമ്മ്‌ദിമ് ഉജുരുമു കെ്ഡേക്ക്‌മ്. 7 മന്‌സാന്‌ക്ക് ഇര്‌ക്കുവ പാവ പളാക്ക സാമിക്ക് പോട്ടി നില്ല്ന്റ്. അദ് സാമി സട്ടാക്ക് കെ്ട്ട്‌പഡുവാദില്ലെ. സാമി സട്ടാക്ക് കെ്ട്ട്‌പഡ്യ മുഡ്യാമ്‌മാട്ട. 8 മന്‌സാന്‌ക്ക് ഇര്‌ക്കുവ പാവ പളാക്കുള്ളവാര്‌ക്ക് സാമിന പിര്യപഡിസ്യ മുഡ്യാമാട്ട. 9 സാമിനിഗാല് നിമ്മോഡ ഇര്‌ക്കുവദാന നിമ്മ മന്‌സാന്‌ക്ക് ഇര്‌ക്കുവ പാവ ഗേവ പളാക്കുള്ളവാരല്ല, സാമിനിഗാല് സൊല്ലുപഡി നഡാക്ക്‌ന്റവാര്‌ത്തെ. ക്‌റ്‌സ്‌ത്ത് നിഗാല് ഇല്ലത്തവാര് ക്‌റ്‌സ്‌ത്ത്‌ക്കുള്ളവാനല്ല. 10 ആന ക്‌റ്‌സ്‌ത്ത് നിമ്മോഡ ഇന്തദാന, പാവ ഗേവാദ്‌നാലെ നിമ്മ് സരിഗല അളിന്ത് പോനാല്‌മ് സാമി നിമാന നേര്‌മെഗാറാര് മാഡ്‌നാദ്‌നാലെ നിമ്മ് നിഗാല് കുട്ടി പെ്ളേക്ക്‌മ്. 11 സാമി ഏസ്സ്‌ന സത്തവാര്‌ലിന്ത് ഉജുര്‌ളാക്ക്‌നാന്. അയി സാമിനിഗാല് നിമ്മോഡിര്‌ക്കുവദാന, ക്‌റ്‌സ്‌ത്ത് ഏസ്സ്‌ന സത്തവാര് പട്ട്‌ലിന്ത് ഉജുര്‌ളാക്ക്‌ന സാമി നിമ്മോഡിര്‌ക്കുവ തന്ന് നിഗാല്‌ന ബെത്ത് അളിന്ത് പോവ നിമ്മ് സരിഗലാക്ക്‌മ് ഉജുരു കൊഡുക്കുവാന്. 12 അദ്‌നാലെ ഏസ്സ്‌ഗാറാരെ, ഇന്നി നമ്മ മന്‌സാന്‌ക്ക് ഇര്‌ക്കുവ പാവ ഗേവ പളാക്കാക്കുള്ള ആസെപഡി പെ്ളേക്ക്യ നമ്മ അയി പളാക്കാക്ക് കഡാമെ പട്ടവാരല്ല. 13 എന്ത്‌ക്കെന്റ് സൊന്ന മന്‌സാന്‌ക്ക് ഇര്‌ക്കുവ പാവ ഗേവ പളാക്കാക്കുള്ള ആസെപഡി പെ്ളേത്തദാന കണ്ടിപ്പായിമ് നിമ്മ സാവുറു. ആന സാമിനിഗാല്‌ക്ക് കെ്ട്ട്‌പട്ട് നഡാന്ത് നിമ്മ് സരിഗല ആസെപഡുവ കെ്ട്ട കാര്യഗാള്‌ന തള്ള്‌ന നിമ്മ പെ്ളേക്കുവുറു. 14 സാമിനിഗാല് നഡാത്ത്‌ന്റവാര് ഒട്ടുക്കു സാമി പ്‌ള്ളെഗാള്‌ത്തെ. 15 പിന്നേമ് നിമാന അഞ്ചിക്കെ പ്‌ഡ്‌സി അഡിമെ മാഡുവ നിഗാലല്ല നിമാക്ക് കെ്ഡേത്താദ്. ആന നിമാന സാമി മഗാന്‌മ് സാമി മഗാള്‌മ് മാഡുവ നിഗാല്‌ത്തെ നിമാക്ക് കെ്ഡേത്താദ്. അയി സാമിനിഗാല്‌ല് നമ്മ സാമിന <<അപ്പാ, എന്നപ്പാ>> എന്റ് ബ്‌ളിക്ക്‌ന്റാമ്. 16 സാമിനിഗാല്‌മ് നമ്മ് മനേസ്സ് കുളാക്കിന്ത് നമാന സാമി മഗാന്‌മ് സാമി മഗാള്‌മ് എന്റ് ഒറേപ്പ് തന്റ്. 17 നമ്മ സാമിക്ക് പ്‌ള്ളെഗാള് ആയിന്തദാന സാമി കൊഡുക്കുവാദ്‌ക്ക് നമ്മ ഉരിമെഗാറാര്‌മ്‌ത്തെ, ക്‌റ്‌സ്‌ത്തോഡൊപ്പ നമാക്ക് അദ് കെ്ഡേക്ക്‌മ്. അയാള്‌ക്കിര്‌ക്കുവ മദ്‌പ്പ്‌മ് പേര്‌പെരിമേമ് നമാക്ക് കെ്ഡേക്ക്യ ബേ്ണ്ടി അയാള് കജട്ട പട്ട പാസെ നമ്മാമ് കജട്ട പഡുഡൊ. സാമി തരുവ മദ്‌പ്പ് 18 നമാക്ക് തര്യ പോവ സാമി മദ്‌പ്പ്‌നാമ് പേര്‌പെരിമെനാമ് നെനേത്തദാന ഈ കാലാത്ത്‌ല കജട്ടഗാള് ദൊഡ്ഡ കജട്ടഗാളല്ല എന്റ് നാന് കണാക്ക് മാഡ്‌ന്റെ. 19 തന്ന് പ്‌ള്ളെഗാള് ആരെല്ല എന്നുവാദ്‌ന സാമി കാട്ടി കൊഡുക്ക്യ ബേ്ണ്ടി സാമി ദ്‌ട്ടിസി ബെത്ത്‌റ്‌ക്കുവാദ് ഒട്ടുക്കു നെഞ്ചഡോഡ കാത്ത്‌കൊണ്ട് ഇര്‌ക്ക്‌ന്റ്. 20-21 അദ്‌താനേമല്ല, ദ്‌ട്ടിസിര്‌ക്കുവാദെല്ലാമ് അളിന്ത് പോയ സിക്കിര്‌ക്കുവാദ്‌ലിന്ത് തപ്പിസി കഡാക്കുഡൊ എന്റ്‌മ് സാമിപ്‌ള്ളെഗാള് എന്നുവ മദ്‌പ്പ്‌ക്ക് പങ്ക്‌ഗാറാരാവ സദുവു കെ്ഡേക്കുഡൊ എന്റ്‌മ് നെഞ്ചഡോഡ അയി നാള്‌ക്ക് ബേ്ണ്ടി കാത്ത് കൊണ്ട്‌റ്ക്ക്‌ന്റ്. എന്ത്‌ക്കെന്റ് സൊന്ന, അവനവാന് പിര്യാക്കല്ല, സാമി പിര്യാക്ക്‌ത്തെ ദ്‌ട്ട്‌സ്‌നാദെല്ല അളിവ ബിദിക്ക് സിക്ക്‌നാദ്. 22 ദ്‌ട്ടിസിര്‌ക്കുവാദെല്ലാമ് ഇന്നാവരിദിക്ക് ഒരുത്തി പ്‌ള്ളെ്ഡ്‌ക്കുവ ഉറുസുക്കു അനാങ്കുവ പാസെ ബിജാക്ക് അഗാറി കൊണ്ടു ഇര്‌ക്ക്‌ന്റ്. 23 സാമിനിഗാല് എന്നുവ ദാനന മുദാല് കെ്ഡേസിര്‌ക്കുവ നമ്മാമ് അളിവിര്‌ക്കുവ ഈ സരിഗലാത്ത്‌ലിന്ത് തപ്പിസി കഡാന്ത് സാമി മഗാനാര്‌മ് മഗളാര്‌മ് ആയ ബേ്ണ്ടി കാത്ത്‌കൊണ്ടു മനേസ്സ്‌കുള്ളുക്കു മുട്ടുമുട്ടുത്തു കൊണ്ടു ഇര്‌ക്ക്‌ന്റാമ്. 24 ഈ നെഞ്ചഡെനാലെത്തെ നമ്മ തപ്പിസി കഡാന്ത്‌റ്‌ന്റാമ്. കാണുവ എന്തൊന്റുക്കു ബേ്ണ്ടി നെഞ്ചഡെ ബെക്കുവ തേവില്ലെ. കണ്ണ്‌ക്ക് കാണുവ എന്തൊന്റുക്കു ബേ്ണ്ടി നമ്മ എന്ത്‌ക്ക് നെഞ്ചഡെ ബെക്കുവാദ്? 25 കാണാത്ത എന്തൊന്റുക്കു ബേ്ണ്ടി നമ്മ നെഞ്ചഡെ ബെക്കാട്ടി അദ്‌ക്ക് ബേ്ണ്ടി നമ്മ പൊറിമോഡ കാത്ത്‌റ്‌ക്ക്‌ന്റാമ്. 26 അദേപാസെ താനെ നമ്മ കുറ്റകൊറേവുഗാറാര് ആയിര്‌ക്കുവാദ്‌നാലെ സാമിനിഗാല് നമാന കയിതാങ്ക്യ ബന്റാന്. സെരിക്ക്‌മ് എന്ത്‌ക്കെല്ല ബേ്ണ്ടി പരേസുഡൊ എന്റ് നമാക്ക് തെര്യ. ആന സാമിനിഗാല് നമാക്ക് ബേ്ണ്ടി അനാങ്കി കൊണ്ടു പരേസ്‌ന്റാന്. അദ് നമാക്ക് നെപ്പ്‌കെ്ഡേക്കുവാദില്ലെ. 27 ആന സാമിനിഗാല് സാമിക്ക് പട്ടവാര്‌ക്ക് ബേ്ണ്ടി സാമി ആസെപഡുവ കാര്യനത്തെ ബേ്ണ്ട്‌ന്റാന് എന്റ് മന്‌സാര് നെഞ്ച്‌ന സോദണെ ഗേവ സാമിക്ക് തെരിമ്. 28 ആന സാമി സീവാന്‌ബെത്ത് താന് നെനേത്ത്‌റ്‌ക്കുവ കാര്യാക്ക് ബേ്ണ്ടി ബ്‌ളിത്ത് ബെത്ത്‌റ്‌ക്കുവ ആള്‌ഗാള്‌ക്ക് ബേ്ണ്ടി എല്ലാ കാര്യഗാള്‌നാമ് സാമി നല്ലാദ്‌ക്ക് ബേ്ണ്ടി ഗേന്റാന് എന്റ് നമാക്ക് തെരിമ്. 29 എന്ത്‌ക്കെന്റ് സൊന്ന, സാമി താന് മുന്നുക്കെ തെരിന്തിന്തവാര്‌ന തന്ന് മഗാന്‌ക്ക് ഇര്‌ക്കുവ ഉരുവാന പാസെ ആയ ബേ്ണ്ടി സാമി അവാര്‌ന അലാക്ക പ്‌റ്‌ത്ത് ബെത്ത് അവാര്‌ക്ക് തന്ന് മഗാന്‌ന തലെകോഡി അണ്ണാന് മാഡ്‌നാന്. 30 താന് അലാക്ക പ്‌റ്‌ത്ത് ബെത്ത്‌റ്‌ക്ക്‌ന്റവാര്‌ന അയാള് ബ്‌ളിത്താന്, താന് ബ്‌ളിത്തവാര്‌ന നേര്‌മെഗാറാര് മാഡ്‌നാന്, നേര്‌മെഗാറാര് മാഡ്‌നവാര്‌ന അയാള് തന്ന് മദ്‌പ്പ്‌ക്ക് പങ്ക്‌ഗാറാര്‌മ് മാഡ്‌നാന്. മ്‌ഗ്‌ന്ത സാമി സീവാന് 31 ഇദ്‌ന പറ്റി നമ്മ ഇന്നി എന്തെന്റ് സൊല്ല്യ? സാമി നമ്മ് സാരി ഇന്തദാന പിന്നെ ആര്‌ക്ക് നമ്മോഡ മുട്ട്യ മുഡിമ്? 32 തന്ന് സൊന്തമഗാന് എന്റ്‌ഗുഡി നോഡാദെ അയാള്‌ന നമാക്ക് എല്ലാവാര്‌ക്ക് ബേ്ണ്ടി ഒപ്പിസി കൊഡുത്ത സാമി അയാളോഡൊപ്പ തനാക്കിര്‌ക്കുവാദ് എന്ത്‌നാമ് നമാക്ക് തരാദിര്‌ക്കുവാന? 33 സാമി തെരിന്തെ്ഡ്‌ത്തവാര്‌ന ആര്‌ക്ക് കുറ്റ സൊല്ല്യ മുഡിമ്? സാമി താനെ അവാര്‌ന കുറ്റഗാറാര് അല്ല എന്റ് സൊന്റാന്. 34 അന്നാപ്പ് ആര്‌ക്ക് അവാര്‌ന കുറ്റഗാറാര് എന്റ് ബിദിക്ക്യ മുഡിമ്? ക്‌റ്‌സ്‌ത്ത് ഏസ്സ് സത്തവാന്, സത്തിന്ത് ഉജുര്‌ളാഗി ഇര്‌ക്ക്‌ന്റവാന്‌ത്തെ. അയാള് സാമി ബല സാരി ഇന്ത്‌കൊണ്ടു നമാക്ക് ബേ്ണ്ടി ബേ്ണ്ട്‌ന്റാന്. 35 ക്‌റ്‌സ്‌ത്ത് നമ്മോഡ ബെത്ത്‌റ്‌ക്കുവ സീവാന്‌ലിന്ത് ആര്‌ക്ക് നമാന പ്‌റ്‌ക്ക്യ മുഡിമ്? കജട്ടഗാള്‌ക്കൊ, സങ്കഡഗാള്‌ക്കൊ, കൊഡിമെഗാള്‌ക്കൊ, പജിപട്ടിണിക്കൊ, ഉഡുപ്പുസഡ്‌പ്പ് ഇല്ലാത്ത ഗെദിഗാള്‌ക്കൊ, ആവാത്ത്‌ഗാള്‌ക്കൊ, ബാള്‌ക്കൊ നമാന പ്‌റ്‌ക്ക്യ മുഡിമ? മുഡ്യാഗേ മാട്ട. 36 <<നിനാക്ക് ബേ്ണ്ടി എമ്മ ഉജുരുക്കു ബരുവ ആവാത്ത്‌ഗാള്ന നാള്‌ക്ക് താങ്കി കൊണ്ടു ഇര്‌ക്ക്‌ന്റേമ്, അറ്‌ക്ക്യ ബെത്ത്‌റ്‌ക്കുവ കൊറ്യാഡ്‌ഗാള്‌ന പാസെത്തെ എമാന നെനേക്ക്‌ന്റാര്>> എന്റ് എ്ള്‌ദിര്‌ക്ക്‌ന്റല്ല. 37 ആന നമ്മാഗൊ, നമ്മോഡ സീവാന്‌ബെത്ത്‌റ്‌ക്ക്‌ന്റവാന്‌നാലെ ഈ കാര്യഗാള്‌ലിന്തെല്ല ഒന്റേപെ്ട്ട് ഗെലിസി കഡാക്ക്‌ന്റാമ്. 38 സാവുക്കൊ, ഉജുരുക്കൊ, ദൂദാര്‌ഗാള്‌ക്കൊ, മാഗെലോഗന ആളുവ കെ്ട്ട നിഗാല്‌ഗാള്‌ക്കൊ, അദിഗാരിഗാള്‌ക്കൊ, 39 ഇന്നാല് ഇര്‌ക്കുവാദ്‌ക്കൊ, ബര്യ ഇര്‌ക്കുവാദ്‌ക്കൊ, മേലോഗാക്കൊ, കീ്ലോഗാക്കൊ ദ്‌ട്ടിസി ബെത്ത്‌റ്‌ക്കുവ ബേ്റെ ഏദ് ജാദിക്ക്‌മ് നമ്മ് ആണ്ടവാന് ഏസ്സ് ക്‌റ്‌സ്‌ത്ത് കാട്ട്‌ന സാമി സീവാന്‌ലിന്ത് നമാന അലാക്ക പ്‌റ്‌ക്ക്യ മുഡ്യാമാട്ട എന്റ് എനാക്ക് ഒറേപ്പിര്‌ക്ക്‌ന്റ്. |
New Life Computer Institute