ബെ്ളിപട്ട കാര്യ 8 - സാമി സേദിഏ്ളാവാദ് മുദ്ദുറെ 1 കൊറ്യാഡ് കുട്ടി ഏ്ളാവദ് മുദ്ദുറെന ത്‌റാക്കാട്ടി മേലോഗാത്ത്‌ല് ഒപ്പതപ്പ അരെ മണി നേര സപ്പെന്റിന്താര്. 2 അദുക്കുള സാമി മുന്നുക്കു ഏ്ള് ദൂദാന്‌മ് നിന്റ്‌റ്‌ക്കുവാദ്‌നാമ് അവാര്‌ക്ക് കൊമ്പൂദുവ ഏ്ള് ജാദിഗാള് കെ്ഡേത്ത്‌റ്‌ക്കുവാദ്‌നാമ് നാന് കണ്ടെ. 3 ബേ്റൊന്റു ദൂദാന് പൊന്നുലു ഉണ്ടാക്ക്‌ന തുമ്മ പൊഗേസുവ ദൊഡ്ഡ തൊട്ട്യോഡ ബന്ത് മദ്‌ലര്‌ഗെ നിന്റിന്താന്. അയാള്‌ക്ക് മൊത്തന തുമ്മ കെ്ഡേത്ത്‌ദ്. അദ് സാമിഗാറാര് പരേസത്തോഡൊപ്പ സേത്തി കുറിഞ്ചിക്ക് മുന്നുക്കു ഇര്‌ക്കുവ പൊന്നുലു ഉണ്ടാക്ക്‌ന മദ്‌ല് കുദ്ദാക്ക് ബെക്ക്യാത്തെ. 4 ദൂദാന് കയിലിന്ത് തുമ്മ പൊഗേസുവ പൊഗെ സാമിഗാറാര് പരേസത്തോഡൊപ്പ സാമി ഇര്‌ക്കുവ പട്ട്‌ക്ക് പോറ്റു. 5 പ്‌റ ദൂദാന് അയി തുമ്മ പൊഗേസുവ ദൊഡ്ഡ തൊട്ടിക്ക് മദ്‌ല്‌ല തീ കെ്ണ്ടന തുമ്പിസി ബൂമിക്ക് എ്റിന്താന്. അദുക്കുള ഇ്ഡി ബെ്ട്ടുവ ജദ്ദഗാള്‌മ്, ഓസെഗാള്‌മ്, മിച്ചുവ ബെ്ള്‌സഗാള്‌മ് ബന്ത്‌ദ്, ബൂമിമ് കുലുങ്കുറ്റു. കൊമ്പൂദുവ ഏ്ള് ദൂദനാമ് 6 കൊമ്പൂദുവ ജാദിഗാള് പ്‌ഡിത്തിന്ത ഏ്ള് ദൂദനാമ്‌മ് കൊമ്പൂദ്യ ഒരുങ്കുനാര്. 7 ഒണ്ണാവാദ് ദൂദാന് കൊമ്പൂദുഗാട്ടി സോരെ കലാന്ത കല്ല് മഗേമ് തീയിമ് ഉണ്ടായി അദ് ബൂമിക്ക് അഡിത്ത്‌ദ്. മൂറുലു ഒന്റു ബാഗ ബൂമി ബെന്ത് ബൂദ്യാറ്റ്, മരഗാള്‌ല് മൂറുലു ഒന്റു ബാഗ ബെന്ത് കരിന്ത്‌ദ്, പച്ചെ പുല്ലുഗാള് ഒട്ടുക്കു ബെന്ത് കരിന്ത്‌ദ്. 8 റണ്ടാവാദ് ദൂദാന് കൊമ്പൂദുഗാട്ടി തീ കത്തുവ ദൊഡ്ഡ മലെന പാസെ ഇര്‌ക്കുവ എന്തോ ജാദിന കഡാല്‌ക്ക് എ്റിന്താര്. അദുക്കുള മൂറുലു ഒന്റു ബാഗ കഡാല് സോരെ ആറ്റ്. 9 കഡാല്‌ല് ഇര്‌ക്കുവ ഉജുരുകെ്ളെഗാള്‌ല് മൂറുലു ഒന്റു ബാഗ സത്ത് പോറ്റു. മൂറുലു ഒന്റു ബാഗ കപ്പാല്‌ഗാള്‌മ് അളിന്ത് പോറ്റു. 10 മൂറാവാദ് ദൂദാന് കൊമ്പൂദുഗാട്ടി സൂട്ടെ തീന പാസെ കത്തി എരേവ ദൊഡ്ഡൊന്റു ബെ്ള്ളി ബാന്‌ലിന്ത് അലേന്ത്‌ദ്. അദ് മൂറുലൊന്റു ബാഗ പെര്‌വാനിഗാള്‌ക്ക്‌മ് നാലിഗാള്‌ക്ക്‌മ് ബ്‌ന്ത്‌ദ്. 11 കജാപ്പെ എന്റ്‌ത്തെ അയി ബെ്ള്ളിക്ക് പേര്. മൂറുലു ഒന്റു ബാഗ നീര് കജാപ്പ്യായി തള്ള്‌ട്ട്. അയി നീര് കജാപ്പെ ആനാദ്‌നാലെ അദ്‌ന കുഡിത്ത് എഞ്ചോ ആള്‌ഗാള് സത്ത് പോനാര്. 12 നാലാവാദ് ദൂദാന് കൊമ്പൂദുഗാട്ടി മൂറുലു ഒന്റു ബാഗ നേരനാമ് നിലാവുനാമ് ബെ്ള്ളിഗാള്‌നാമ് അദ് കേ്ഡ് ബര്‌സ്സ്‌റ്റ്. അദ്‌നാലെ അദ്‌ഗാള്‌ക്ക് ഇര്‌ക്കുവ ബെ്ള്‌സാത്ത്‌ല് മൂറുലു ഒന്റു ബാഗ ഇ്റ്‌ട്ടാറ്റ്. അദേപാസെ പഗാല് അഡിക്കുവ ബെ്ള്‌സാത്ത്‌ല് മൂറുലു ഒന്റു ബാഗാമ് ജാമാക്ക് അഡിക്കുവ ബെ്ള്‌സാത്ത്‌ല് മൂറുലു ഒന്റു ബാഗാമ് ഇല്ലാദാറ്റ്. 13 പ്‌റ നാന് നോഡുഗാട്ടി എത്ത്‌റാഗോ ഉജരാത്ത്‌ല് ബാന്‌ല് പറാക്കുവ ഒന്റു പാറ്‌ന കണ്ടെ. <<ഇന്ന്യുള്ള മൂറു ദൂദനാമ് ഊദ്യ പോവ കൊമ്പൂദുവ ജദ്ദാത്ത്‌ല് ബൂമില് ഇര്‌ക്ക്‌ന്റവാര്‌ക്ക് കജട്ട, കജട്ട, കജട്ട>> എന്റ് അയി പാറ് ദൊഡ്ഡാക്ക് ആലാക്കുവാദ്‌ന നാന് കേ്ട്ടെ. |
New Life Computer Institute