ബെ്ളിപട്ട കാര്യ 15 - സാമി സേദികഡേസി ബ്‌ഡുവ ദൊഡ്ഡ ദെ്ണ്ടണെഗാള് 1 നാന് മേലോഗാത്ത്‌ല് ദൊഡ്ഡാദ്‌മ് അദിസ്യപഡുവാദ്‌മ് ആന ബേ്റൊന്റു അഡ്യാള കണ്ടേന്. ഏ്ള് ദൂദനാമ് കഡേസി ബ്‌ഡുവ ഏ്ള് ദൊഡ്ഡ ദെ്ണ്ടണെഗാളോഡ ബന്റാര്. എന്ത്‌ക്കെന്റ് സൊന്ന അദോഡ സാമി മൊനെ തീന്ത്‌ദ്. 2 തീ കലാന്ത ഒന്റു കന്നാഡി കഡാല്‌ന പാസെ ഇര്‌ക്കുവാദ്‌ന നാന് കണ്ടെ. ബേ്ണ്ട്‌നാമ്, അയി ബേ്ണ്ട് സെലെനാമ്, അയാള് പേര്‌ന കാട്ടുവ എ്ണ്ണനാമ് സോലുസുനവാര് അയി കഡാല്‌ക്ക് അര്‌ഗെ നിന്റിന്താര്. അവാര് തമ്മ് കയില് സാമി കൊഡുത്ത ബീ്ണെഗാള്‌നാമ് പ്‌ഡിത്തിന്താര്. 3 സാമി ഗിലാസഗാറാന് ആന മോസെ പാട്ട്‌മ് കൊറ്യാഡ് കുട്ടി പാട്ട്‌മ് അവാര് പാഡ്‌നാര്. അദ് ഇത്തേത്തെ, എല്ലാ ബിലാമ് ഇര്‌ക്കുവ ആണ്ടവാനാന സാമ്യെ, നീ ഗേന്ത കാര്യഗാള് മ്‌ഗ്‌ന്താദ്‌മ് അദിസ്യമാനാദ്‌മ്‌ത്തെ, ഉലഗാത്ത്‌ല് ഇര്‌ക്കുവ എല്ലാ ആള്‌ഗാള്‌ത്ത്‌മ് രാജാവെ, നീ ഗേവ കാര്യഗാള് നേര്‌മെ ഉള്ളാദ്‌മ് സത്ത്യമുള്ളാദ്‌മ്‌ത്തെ. 4 ആണ്ടവാനെ, നിനാന അഞ്ചാത്തവാര് ആര് ഇര്‌ക്ക്‌ന്റാര്? നിന്ന് പേര്‌ന മദ്‌സാത്തവാര് ആര് ഇര്‌ക്ക്‌ന്റാര്? എന്ത്‌ക്കെന്റ് സൊന്ന നീ ഒരുത്താന് തനെത്തെ സുത്താപ്പുള്ളവാന്. നീ നേര്‌മ്യോഡ ഗേവാദ്‌ന എല്ലാവാര്‌മ് കണ്ടാദ്‌നാലെ ഉലഗാത്ത്‌ല് ഇര്‌ക്കുവ എല്ലാ ആള്‌ഗാള്‌മ് നിന്ന് പട്ട്‌ക്ക് ബന്ത് നിനാന കുമ്മുഡുവാര്. 5 അദ്‌ക്ക് പ്‌റ നാന് നോഡുഗാട്ടി മേലോഗാത്ത്‌ല സാമിബീ്ഡ് എന്നുവ സാമി ഗുഡുസുലു ത്‌റാന്ത്‌റ്‌ക്കുവാദ്‌ന കണ്ടേന്. 6 ഏ്ള് ദൊഡ്ഡ ദെ്ണ്ടണെഗാള്‌ന കഡേസി ബ്‌ഡുവ ഏ്ള് ദൂദനാമ് സാമിബീ്ഡ്‌ലിന്ത് ബെ്ളിഗെ ബന്താര്. ദഗദഗാത്ത് മിന്നുവ ബെ്ള്ളെ ഉഡുപ്പു ഇക്കിമ് മാര്‌ക്ക് പൊന്നു കച്ചെ കെ്ട്ടിമ് അവാര് ഇന്താര്. 7 അദുക്കുള നാക്ക് ഉജുരുകെ്ളെഗാള്‌ലിന്ത് ഒന്റു എന്നാല്‌ക്ക്‌മ് പെ്ളേക്ക്‌ന്റവാനാന സാമി മൊനെ തുമ്പിര്‌ക്കുവ ഏ്ള് പൊന്നു സട്ടിഗാള്‌ന അയി ഏ്ള് ദൂദനാമ്‌ക്ക്‌മ് കൊഡുത്തുദു. 8 സാമി മദ്‌പ്പ്‌നാമ് സക്‌തിനാമ് കാട്ടുവ പൊഗെ സാമിബീ്ഡ് ഒട്ടുക്കു തുമ്പുറ്റു. അയി ഏ്ള് ദൂദനാമ് ബ്‌ഡുവ ഏ്ള് ദൊഡ്ഡ ദെ്ണ്ടണെഗാള്‌ന അവാര് ബ്‌ട്ട് തീര മാട്ട്‌ക്ക് ആര്‌ക്ക്‌മ് സാമിബീ്ഡ്‌ക്ക് കഡാക്ക്യ മുഡ്യാദിന്ത്‌ദ്. |
New Life Computer Institute