ബെ്ളിപട്ട കാര്യ 10 - സാമി സേദിദൂദാന്മ് സ്‌ന്ന ബൊക്കുമു 1 പ്‌റ നാന് നോഡുഗാട്ടി സക്‌തി ഇര്‌ക്കുവ ബേ്റെ ഒന്റു ദൂദാന് മേലോഗാത്ത്‌ലിന്ത് ഇ്റാഗി ബരുവാദ്‌ന നാന് കണ്ടേന്. അയി ദൂദാന് മഞ്ച്‌ന ഉഡുപ്പു മാഡി ഇക്കിന്താന്. അയാള് തലെ കുദ്ദാക്ക് കാമ ബില്ല്‌മ് ഇന്ത്‌ദ്. അയി സാമിദൂദാന് മൂഞ്ചി നേരന പാസേമ് കാല്‌ഗാള് തീ കമ്പന പാസേമ് ഇന്ത്‌ദ്. 2 അയി ദൂദാന് കയില് ത്‌റാന്ത്‌റ്‌ക്കുവ ഒന്റു സ്‌ന്ന ബൊക്കുമു ഇന്ത്‌ദ്. അയാള് ബല കാല്‌ന കഡാല് കുദ്ദാക്ക്‌മ് ഇ്ഡ കാല്‌ന ബൂമിക്ക്‌മ് ബെത്തിന്താന്. 3 അയി ദൂദാന് സിങ്ക മൊരേവ പാസെ ദൊഡ്ഡാദ്‌ക്ക് അഗാറി ആലാത്താന്. അയി അഗാറി ആലാക്കുവ ജദ്ദോഡ ഏ്ള് ഇ്ഡിമ് ബെ്ട്ട്‌റ്റ്. 4 അയി ഏ്ള് ഇ്ഡി ബെ്ട്ട്‌ഗാട്ടി സൊല്ലുവാദ്‌ന നാന് എ്ള്‌ദ്യ പട്ടെ. അദുക്കുള മേലോഗാത്ത്‌ലിന്ത് <<ഏ്ള് ഇ്ഡി ബെ്ട്ട്‌ഗാട്ടി സൊന്നാദ്‌ന മറേസി ബെയി, അദ്‌ന എ്ള്‌ദദേന്>> എന്റ് സൊല്ലുവ ജദ്ദന നാന് കേ്ട്ടെ. 5 കഡാല്‌ക്ക്‌മ് ബൂമിക്ക്‌മ് കാല്‌ബെത്ത് നിന്റ്‌റ്‌ക്ക്‌ന്റവാനായി നാന് കണ്ട അയി ദൂദാന് ബല കയിന ബാന്‌ക്ക് ഉജാത്ത്‌നാന്. 6 പ്‌റ ബാന്‌നാമ് അദ്‌ല് ഇര്‌ക്കുവാദ്‌ന ഒട്ടുക്കുമു, ബൂമിനാമ് അദ്‌ല് ഇര്‌ക്കുവാദ്‌ന ഒട്ടുക്കുമു, കഡാല്‌നാമ് അദ്‌ല് ഇര്‌ക്കുവാദ്‌ന ഒട്ടുക്കുമു ദ്‌ട്ട്‌സ്‌നവാന്‌മ് എന്നാല്‌ക്ക്‌മ് ഇര്‌ക്ക്‌ന്റവാന്‌മ് ആന സാമി പേര്‌ല് സത്ത്യഗേന്ത് ഇത്തെ സൊന്നാന്, <<ഇന്നി അദിഗ ഗളിഗെ കാത്ത്‌റ്‌ക്ക ബേ്ഡ, 7 ഏ്ളാവാദ് ദൂദാന് കൊമ്പൂദുവ നാള്‌ല് സാമി മറേസി ബെത്ത്‌റ്‌ക്കുവ കാര്യ അദേപാസെ താനെ നഡാക്ക്‌മ്. സാമി ഗിലാസഗാറാരാന സാമിദാസ്‌ഗാള്‌ക്ക് താന് കാട്ടി കൊഡുത്ത കാര്യത്തെ അദ്>> എന്റ് സൊന്നാന്. 8 ബാന്‌ലിന്ത് മുദാല് എന്നോഡ നായ നൊഡിന്ത അദേ ജദ്ദ, <<നീ പോയി കഡാല്‌ക്ക്‌മ് ബൂമിക്ക്‌മ് കാല്‌ബെത്ത് നിന്റ്‌റ്‌ക്കുവ ദൂദാന് കയില് ത്‌റാന്ത്‌റ്‌ക്കുവ ബൊക്കുന ഏല്>> എന്റ് എനാക്ക് പിന്നേമ് സൊല്ലുറ്റു. 9 നാന് അയി ദൂദാന് പട്ട്‌ക്ക് പോയി <<അയി സ്‌ന്ന ബൊക്കുന തരുഡോമെ>> എന്റ് കേ്ട്ടെ. അദുക്കുള അയി ദൂദാന് <<നീ ഇദ്‌ന ഏറ്റ് തിന്ന്, അദ് നിന്ന് ബേ്റ്‌ക്ക് കജാപ്പെ ആയിര്‌ക്ക്‌മ്, എന്റാല്‌മ് ബായിക്ക് തേന്‌ന പാസെ ഇന്‌പ്പിര്‌ക്ക്‌മ്>> എന്റ് എനാക്ക് സൊന്നാന്. 10 നാന് ദൂദാന് കയിലിന്ത് അയി സ്‌ന്ന ബൊക്കുന ഏറ്റ് തിന്റേന്. അദുക്കുള അദ് എന്ന് ബായിക്ക് തേന്‌ന പാസെ ഇന്‌പ്പിന്ത്‌ദ്. ആന തിന്റ് തീര്‌ഗാട്ടി ബേ്റ്‌ക്ക് കജാപ്പ്യാറ്റ്. 11 അയാള് എനാക്ക് <<നീ ഇന്നിമ് എഞ്ചോ ബമ്മേസഗാള്‌നാമ്, ജാദിഗാള്‌നാമ്, നായഗാറാര്‌നാമ്, രാജാവുഗാള്‌നാമ് പറ്റി സാമിക്ക് സൊല്ല്യ ഇര്‌ക്കുവ കാര്യഗാള്‌ന സൊല്ലുഡൊ>> എന്റ് സൊന്നാന്. |
New Life Computer Institute