മര്‌ക്കോസു 7 - സാമി സേദിപാട്ടിപാട്ടനാമ് സട്ട്‌മെ്ട്ട് 1 പരിസാര്‌ഗാള്‌മ് ലേസ ബേദബാത്ത്യനാമ്‌ഗാള്‌മ് എര്‌സലേമ്‌ലിന്ത് ഏസ്സ് പട്ട്‌ക്ക് ബന്ത് അയാള്‌ക്ക് സുറ്റുമു കൂഡുനാര്. 2 അയാള് സൊല്ലുപഡി നഡാക്ക്‌ന്റവാര്‌ല് ലേസ ആള്‌ഗാള് എഗുദാര് ഗേവ സട്ടപഡി തമ്മ് കയിന നലമായി കച്ചാദെ തിന്നുവാദ്‌ന അവാര് കണ്ടിന്താര്. 3 പരിസാര്‌ഗാള്‌മ് എഗുദാര് ജാദിഗാള്‌മ് തമ്മ് സട്ടപഡി കയി കച്ചാദെ തീനി തിന്നമാട്ടാര്. അവാര്‌ക്ക് മുന്നുക്കു പെ്ളേത്തിന്ത പാട്ടിപാട്ടനാമ്‌മ് അവാര്‌ന അത്തേത്തെ പഡിസി ബെത്തിന്താര്. അദ്‌നാലെത്തെ അവാര് അത്തെ ഗേന്തിന്താദ്. 4 സന്തേക്ക് പോയി ബന്താല്‌മ് നീരാഡ്‌ന പ്‌റാത്തെ അവാര് തീനി തിന്റിന്താര്. നീര്‌സെമ്പ്, ഗുമ്പ, കഞ്ച് പാത്ത്‌റഗാള്‌നെല്ല അവാര് നലമായി കച്ചി ബെത്തിന്താര്. ഇദ് അവാര്‌ക്ക് ഒന്റു സട്ട ആയിന്ത്‌ദ്. 5 അദ്‌നാലെ പരിസാര്‌ഗാള്‌മ് ബേദബാത്ത്യനാമ്‌ഗാള്‌മ്, <<നിന്ന് സൊല്ലുപഡി നഡാക്ക്‌ന്റവാര് പാട്ടനാമ് ബെത്ത സട്ട്‌മെ്ട്ട്‌ന തെ്റിന്ത് കയി കച്ചാദെ തിന്റാര്. ഇദ് സെര്യ?>> എന്റ് ഏസ്സ്‌ന കേ്ട്ടാര്. 6 അദ്‌ക്ക് ഏസ്സ് ഇത്തെ സൊന്നാന്: <<ബക്‌തിഗാറാരായി നഡിക്കുവ നിമാന പറ്റി ഏസ്സയ്യ സാമിദാസ് സൊല്ലിര്‌ക്കുവാദ് സെരിത്തെ. അയാള് ഇത്തെ എ്ള്‌ദിര്‌ക്ക്‌ന്റാന്, <ഇവാര് എനാന കുമ്മുഡുന്റാര് എന്റ് ബായില് സൊല്ലുവാദല്ലാദെ നാന് ഇവാര് മനേസ്സ്‌ല് ഇല്ലെ. 7 മന്‌സാന് സൊല്ലുവ നായഗാള്‌ന സട്ടഗാളായി അവാര് പഡുസുവാദ്‌നാലെ ബെറ്‌ദേത്തെ അവാര് എനാന കുമ്മുഡി നഡാക്കുവാദ്.> 8 നിമ്മ സാമി സൊല്ലുവ സട്ടാന തെ്റിന്ത് തള്ളി മന്‌സാന് സൊല്ലുവ സട്ടാന കേ്ട്ട് നഡാക്ക്‌ന്റ്‌റ്.>> 9 പിന്നേമ് അയാള് ഇത്തെ സൊന്നാന്: <<നിമ്മ് സട്ടഗാള്‌ന ഗേന്ത് നഡാക്ക്യ ബേ്ണ്ടി സാമി ബെത്ത സട്ടാന നിമ്മ ഓസണോഡ തെ്റിന്ത് തള്ള്‌ന്റ്‌റ്, ഇദ് നല്ല കണാക്കാറ്റ്. 10 എന്ത്‌ക്കെന്റ് സൊന്ന <നീ നിന്ന് അവ്വ്യപ്പാന്‌ന മദ്‌സുഡൊ> എന്റ്‌മ് <അപ്പാന്‌നാഗൊ അവ്വെനാഗൊ കുറ്റ സൊന്റവാന്‌ന കൊല്ലുഡൊ> എന്റ്‌മ് മോസെ പാട്ടാന് സൊല്ലിര്‌ന്റാന്. 11 ആന നിമ്മ ഒരുത്താന്‌ക്ക് അയാള് അപ്പാനവ്വേക്ക് കൊഡുക്ക്യ ഇര്‌ക്കുവാദ്‌ന <നാന് നിമാക്ക് തര്യ ഇര്‌ക്കുവാദ്‌ന കൊറുബ്ബാന്> എന്റ് സൊന്ന മദി എന്റ് സൊല്ലി പഡ്‌സ്‌ന്റ്‌റ്. ഇദ്‌ക്ക് അര്‌ത്ത <അദ്‌ന സാമിക്ക് നേര്‌സെ കൊഡുത്ത്‌റ്‌ന്റെ> എന്റ്‌ത്തെ. 12 അത്തെ അപ്പാനവ്വേക്ക് ഒന്റുമു ഗേന്ത് കൊഡുക്ക്യ നിമ്മ അയാള്‌ന പ്‌റ ബ്‌ഡുവാദ്‌മില്ലെ. 13 നിമ്മ പഡുസുവ സട്ട്‌മെ്ട്ട്‌ഗാള്‌നാലെ സാമി സട്ടാന ഇല്ലാദെ മാഡ്‌ന്റ്‌റ്. ഇത്തെ പല കാര്യഗാള്‌മ് നിമ്മ ഗേന്റ്‌റ്.>> മന്‌സാന്‌ന കെ്ഡ്‌സുവാദ് എന്ത്? 14 പിന്നേമ് ഏസ്സ് ആള്‌ഗാള്‌ന അര്‌ഗെ ബ്‌ളിത്ത് ബരിസ്സി: <<നാന് സൊല്ലുവാദ്‌ന സൊക്കാന കേ്ട്ട് നെപ്പ്‌കെ്ഡേസ്‌ന്. 15 ബെ്ളിഗിന്ത് ഉളാക്ക് പോവാദ് ഒന്റുമു മന്‌സാന്‌ന കെ്ഡ്‌സുവാദില്ലെ. ഉളാക്കിന്ത് ബെ്ളിഗെ ബരുവാദ്‌ത്തെ ഒന്റു മന്‌സാന്‌ന കെ്ഡ്‌സ്‌ന്റ്>> എന്റ് സൊന്നാന്. 17 ഏസ്സ് ആള്‌ഗാള്‌ന ബ്‌ട്ട് ബീ്ഡ്‌ക്ക് ബന്ത പ്‌റ സൊല്ലുപഡി നഡാക്ക്‌ന്റവാര് അയാള് സൊന്നാദ്‌ക്ക് അര്‌ത്ത എന്ത് എന്റ് കേ്ട്ടാര്. 18 ഏസ്സ് അവാര്‌ക്ക് ഇത്തെ സൊന്നാന്: <<നിമാക്ക് ഇന്നിമ് അദ്‌ഗാള്‌ന നെപ്പ്‌കെ്ഡേസ്യ മുഡിവാദില്ലേഗ? ബെ്ളിഗിന്ത് ഉളാക്ക് പോവാദ് ഒന്റുമു മന്‌സാന്‌ന കെ്ഡ്‌സുവാദില്ലെ എന്റ് നിമാക്ക് തെരിവാദില്ലേഗ? 19 തിന്നുവ തീനി മന്‌സാന് ബേ്റ് കുളാക്ക് പോന്റു, പ്‌റ അദ് ബെ്ളിഗെ പോയി തള്ള്‌ന്റ്. മനേസ്സ്‌കുളാക്ക് പോവാദില്ലെ.>> (ഏസ്സ് ഇത്തെ സൊന്നാദ്‌നാലെ തിന്നുവ തീന്യെല്ല നല്ലാദ്‌ത്തെ എന്റ് അര്‌ത്ത മാഡ്‌നാന്.) 20 ഏസ്സ് പിന്നേമ് ഇത്തെ സൊന്നാന്: <<മന്‌സാന് മനേസ്സ് കുളാക്കിന്ത് ബെ്ളിഗെ ബരുവാദ് ഒന്റു മന്‌സാന്‌ന കെ്ഡ്‌സ്‌ന്റ്. 21 മന്‌സാന് മനേസ്സ് കുളാക്കിന്ത് കെ്ട്ട എ്ണ്ണ, ബേസ്യാഡുവാദ്, ത്‌റ്‌ട്ട്, കൊലെ ഗേവാദ്, 22 ഗണ്ട്‌പെ്ണ്ണ് ആഡ്‌മാഡ്‌ന പാസെ ഏ്റി നഡാക്കുവാദ്, ആസെപാഡ്, പോക്കിരിത്തന ഗേവാദ്, ബഞ്ചണെ, ദാറ്‌ബൂറ ഗേവാദ്, കണ്ണ്‌കഡി, കുറ്റ സൊല്ലുവാദ്, മേനാമ്പ് കാട്ടുവാദ്, തിരുവത്താന്‌ന പാസെ ഗേവാദ് എല്ലാ ബെ്ളിഗെ ബന്റ്. 23 മന്‌സാന് മനേസ്സ് കുളാക്കിന്ത് ബരുവ ഇദ്‌ഗാള്‌ത്തെ ഒന്റു മന്‌സാന്‌ന കെ്ഡ്‌സുവാദ്.>> ഏസ്സ് കെ്ട്ടജാദി തട്ടിര്‌ക്കുവ ഒന്റു പ്‌ള്ളെന തെ്ള്‌സ്‌ന്റാന് 24 ഏസ്സ് അയി എ്ഡെന ബ്‌ട്ട് സോരു എന്നുവ പട്ടണാക്ക് പോനാന്. അയാള് അദ്‌ലൊന്റു ബീ്ഡ്‌ക്ക് നൊഗേന്ത് ഇന്താന്. തനാന ആര്‌മ് തെര്യാദിര്‌ക്കുഡൊ എന്റ് നെനേത്ത്‌ത്തെ അയാള് അത്തെ പോയി ഇന്താദ്. അത്തെ ഇന്ത് ഗുഡി ഏസ്സ്‌ക്ക് ഒളിന്തിരിക്ക്യ മുഡ്യാലെ. 25 കെ്ട്ടജാദി തട്ടിര്‌ക്കുവ ഒന്റു പ്‌ള്ളെ അവ്വേസി ഏസ്സ്‌ന പറ്റ്യുള്ള സേദിന കേ്ട്ടാള്. അന്നാല് താനെ അവാള് ഏസ്സ് പട്ട്‌ക്ക് ബന്ത് അയാള് കാല്‌ക്ക് ബ്‌ന്താള്. 26 അവാള് എഗുദ ജാദിഗാറിസി അല്ല. സ്‌റിയ എന്നുവ നാഡ്‌ല് പൊയിനിക്ക്യ എന്നുവ എ്ഡേല് പ്‌റാന്ത് ബളാന്ത ഒന്റു എവന നാഡ്‌ഗാറിസി. <<എന്ന് മഗാള്‌ക്ക് തട്ടിര്‌ക്കുവ കെ്ട്ടജാദിന സെറ്റെ തട്ടിസി തള്ള്‌ഡൊ>> എന്റ് അവാള് ഏസ്സ്‌ന കേ്ട്ടാള്. 27 അവാള്‌ക്ക് ഏസ്സ്: <<മക്കാള് അഡേന എ്ഡ്‌ത്ത് നായി കുട്ടിഗാള്‌ക്ക് കൊഡുക്കുവാദ് നല്ലാദല്ല. മുദാല് മക്കാള്‌ഗാള്‌ന തിന്ന്യ ബ്‌ഡ്‌ഡൊ>> എന്റ് സൊല്ലി കൊഡുത്താന്. 28 <<ആണ്ടവാനെ, അദ് സെരിത്തെ. ആന മക്കാള് തിന്ന്‌ഗാട്ടി പീങ്കാത്ത്‌ലിന്ത് പൊഡിന്ത് അലേവ അഡെഗാള്‌ന നായി കുട്ടിഗാള് ഗുഡി തിന്ന്‌ന്റല്ല?>> എന്റ് അവാള് ഏസ്സ്‌ക്ക് സൊന്നാള്. 29 <<നീ ഇത്തെ സൊന്നാദ്‌നാലെ നീ കേ്ട്ടാദ്‌ന നാന് നിനാക്ക് തന്ത്‌റ്‌ന്റെ. ഇന്നി നീ പൊ. നിന്ന് മഗാള്‌ക്ക് തട്ടിര്‌ക്കുവ കെ്ട്ടജാദി അവാള്‌ന ബ്‌ട്ട് പോയിര്‌ന്റ്>> എന്റ് ഏസ്സ് അവാള്‌ക്ക് സൊന്നാന്. 30 അവാള് ബീ്ഡ്‌ക്ക് ബന്ത് നോഡുഗാട്ടി മഗാള്‌ക്ക് തട്ടിര്‌ക്കുവ കെ്ട്ടജാദി ഇ്റാഗി പോയിര്‌ക്കുവാദ്‌ന കണ്ടാള്. പ്‌ള്ളെ നലമായി മദ്‌ല് കുദ്ദാക്ക് കെ്ഡെബ്‌ന്ത് ഇന്ത്‌ദ്. ഏസ്സ് ഒന്റു സെ്ഗ്‌ഡാന്‌ന തെള്‌സ്‌ന്റാന് 31 അദ് കളിന്ത് ഏസ്സ് സോരു നാഡ്‌ലിന്ത് സീദോനു മേലെ പോയി ദെക്കെപൊലി കഡാന്ത് ഗലീല കഡാലോരാക്ക് തിരിഗി എജ്ജ്‌നാന്. 32 ലേസ ആള്‌ഗാള് ഒന്റൊരുത്താന്‌ന ഏസ്സ് പട്ട്‌ക്ക് എ്ഡ്‌ത്ത് ബന്താര്. അയാള് സെ്ഗ്‌ഡ്‌മ് തൊത്തലേമ് ബ്‌ന്തിന്താന്. <<അയാള് തലേക്ക് സെറ്റെ കയി ബെത്ത് തെ്ളിസി ബ്‌ഡ്‌ഡൊ>> എന്റ് അവാര് ഏസ്സ്‌ക്ക് സൊന്നാര്. 33 ഏസ്സ് അയാള്‌ന ആള് പട്ട്‌ലിന്ത് അത്തഗ എ്ഡ്‌ത്ത് പോയി നില്ല്‌സ്‌നാന്. പ്‌റ അയാള് കാദ്‌ക്ക് ഏസ്സ് തന്ന് ബിരാല്‌ന നൊഗേസ്‌നാന്. അദ്‌ക്ക് പ്‌റ തുപ്പിന്ത് അയാള് നാലങ്കെന അണ്ണ്‌നാന്. 34 ഏസ്സ് മേലോഗന നോഡി സുഗിത്ത പ്‌റ <<ത്‌റാന്ത് ബാ>> എന്റ് അര്‌ത്ത മാഡുവ <<എപദ>> എന്റ് അയാള്‌ക്ക് സൊന്നാന്. 35 അന്നാല് താനെ അയാള്‌ക്ക് നലമായി നായനൊഡ്യാമ് കാദ് കേ്ള്‌ക്ക്യാമ് മുഡിന്ത്‌ദ്. 36 <<ഇദ്‌ന ആര്‌ക്ക്‌മ് സൊല്ല ബേ്ഡ>> എന്റ് ഏസ്സ് ആള്‌ഗാള്‌ക്ക് സൊന്നാന്. ഏസ്സ് എത്തെ സൊന്നാനൊ അദേപാസെ അവാര് ബേ്റെ ആള്‌ഗാള്‌ക്ക് പൂര സൊല്ലി പജാത്ത്‌നാര്. 37 ഇദ്‌ന കേ്ട്ടവാരെല്ല അദിസ്യപട്ടാര്. <<ഏസ്സ് ഗേന്താദെല്ലാമ് നലമായിത്തെ ഗേന്താന്. സെ്ഗ്‌ഡ് ബ്‌ന്തവാര്‌നാമ് ഊമെബ്‌ന്തവാര്‌നാമെല്ല തെ്ള്‌സ്‌നാന്>> എന്റ് അവാര് സൊന്നാര്. |
New Life Computer Institute