മര്‌ക്കോസു 11 - സാമി സേദിഏസ്സ് എര്‌സലേമ്‌ക്ക് ഒന്റു രാജാവുന പാസെ ബന്തെജ്ജ്‌നാന് 1 ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് എര്‌സലേമ്‌ക്ക് അര്‌ഗെ എജ്ജ്‌നാര്. ബെദന്യ ഊരുക്കുമു ബേദ്‌പാഗെ ഊരുക്കുമു അര്‌ഗെ ഇര്‌ക്കുവ ഒലിവു മലേക്ക് അവാര് ബന്താര്. അദ്‌ക്ക് പ്‌റ ഏസ്സ് റാഡ് സൊല്ലുപഡി നഡാക്ക്‌ന്റവാര്‌ന ബ്‌ളിത്ത് 2 അവാര്‌ക്ക് ഇത്തെ സൊന്നാന്: <<നിമ്മ മുന്നുക്കു കാണുവ ഊരുക്കു പോനു. നിമ്മ ഊരുക്കു കഡാക്കാട്ടി താനെ ഇന്നമാട്ട്‌ക്ക് ആര്‌മ് ഏ്റാത്ത ഒന്റു കള്‌ദെ കുട്ടിന കെ്ട്ടി ബെത്ത്‌റ്‌ക്കുവാദ്‌ന നിമ്മ കാണുവുറു; അദ്‌ന ഉക്കി എ്ഡ്‌ത്ത് ബാന്. 3 <നിമ്മ എന്ത്‌ക്ക് അദ്‌ന എ്ഡ്‌ത്ത് പോന്റുറു> എന്റ് ആരാറ്റ കേ്ട്ടദാന <ഇദ്‌ന ആണ്ടവാന്‌ക്ക് ബേ്ഡ്‌മ്. ലേസ കളിന്ത് ഇദ്‌ന തിരിക്കി എ്ഡ്‌ത്ത് ബന്ത് തരുവെ> എന്റ് സൊല്ലുനു.>> പ്‌റ അവാര്‌ന സൊല്ലി ബ്‌ട്ടാന്. 4 അദ്‌ന കേ്ട്ട് അവാര് അയി ഊരുക്കു പോനാര്. അദ്‌ല് ഒന്റു ബീ്ഡ്‌ക്ക് മുന്നുക്കു ബട്ടേക്കര്‌ഗെ താനെ കെ്ട്ടിന്ത കള്‌ദെ കുട്ടിന അവാര് കണ്ടാര്. അവാര് അദ്‌ന ഉക്ക്യെ്ഡ്‌ത്താര്. 5 <<കള്‌ദെ കുട്ടിന എന്ത്‌ക്ക് ഉക്കുന്റുറു?>> എന്റ് അദ്‌ല് നിന്റിന്ത ലേസ ആള്‌ഗാള് അവാര്‌ന കേ്ട്ടാര്. 6 ഏസ്സ് സൊന്ന പാസെ അവാര് അദ്‌ല് നിന്റിന്തവാര്‌ക്ക് ബദ്‌ല് സൊന്നാര്. അവാര് കള്‌ദെന എ്ഡ്‌ത്ത് പോയ സൊല്ലുപഡി നഡാക്ക്‌ന്റവാര്‌ക്ക് സൊന്നാര്. 7 അയി സൊല്ലുപഡി നഡാക്ക്‌ന്റവാര് കള്‌ദെ കുട്ടിന ഏസ്സ് പട്ട്‌ക്ക് എ്ഡ്‌ത്ത് ബന്താര്. അവാര് തമ്മ ബെ്ളിഗെ ഇക്കുവ സീലെസിലാപ്പ്‌ഗാള്‌ന അയി കള്‌ദെ കുട്ടി കുദ്ദാക്ക് ബിര്‌സ്സ്‌നാര്. ഏസ്സ് കള്‌ദെ കുട്ടി കുദ്ദാക്ക് ഏ്റി കുക്കാന്തിന്താന്. 8 എഞ്ചോ ആള്‌ഗാള് തമ്മ് സീലെസിലാപ്പ്‌ഗാള്‌ന ബട്ടേക്ക് ബിര്‌സ്സ്‌നാര്. ബേ്റെ ലേസ ആള്‌ഗാള് ദോട്ടഗാള്‌ലിന്ത് സപ്പഗാള്‌ന ബെ്ട്ടി ബട്ടേക്ക് പാസ്സ്‌നാര്. 9 അയാള് മുന്നുക്കുമു പിന്ന്‌ക്ക്‌മ് നഡാക്ക്‌ന്റവാര്: <<ഓസാന! <ആണ്ടവാന് പേര്‌ല് ബന്റവാന് ബാഗ്യകേ്ട്ടവാന്!>. 10 ബര്യ പോവ നമ്മ് പാട്ടാന് ദാവീദ് രാജ്യ ബാഗ്യകേ്ട്ടാദ്. എല്ലാദ്‌ക്ക്‌മ് ബ്‌ഡ ഉജാന്ത്‌റ്‌ക്ക്‌ന്റവാന്‌ക്ക് ഓസാന!>> എന്റ് ദൊഡ്ഡുദൊഡ്ഡാദ്‌ക്ക് ആലാത്ത് ക്‌ളാമ്പ്‌നാര്. 11 അത്തെ ഏസ്സ് എര്‌സലേമ്‌ക്ക് എജ്ജി നേരെ സാമിബീ്ഡ്‌ക്ക് പോനാന്. ആങ്കെജ്ജി അയാള് സാമിബീ്ഡ്‌ല് ഇര്‌ക്കുവാദ്‌ന ഒട്ടുക്കു സുറ്റുമു നോഡുനാന്. ആന നേര മജാക്കെ ആനാദ്‌നാലെ അയാള് പന്നന്റ് സൊല്ലുപഡി നഡാക്ക്‌ന്റവാരോഡ ബെദന്യാക്ക് പോനാന്. ഏസ്സ് ഒന്റു അത്തി മരാന സാപ്പ ഇക്ക്‌ന്റാന് 12 മറ്‌നാള് ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് ബെദന്യാലിന്ത് തിരിഗി ബര്‌ഗാട്ടി ഏസ്സ്‌ക്ക് പജി പ്‌ഡിത്ത്‌ദ്. 13 എലെ തുമ്പ ഇര്‌ക്കുവ ഒന്റു അത്തി മര ദൂരാത്ത്‌ല് ഇര്‌ക്കുവാദ്‌ന ഏസ്സ് കണ്ടാന്. മരാത്ത്‌ല് അത്തി പഗ ഇര്‌ക്ക്‌മ് എന്റ് നെനേത്ത് അയാള് അര്‌ഗെ പോനാന്. ആന അദ് അത്തി പഗ ഗളിഗെ അല്ലത്താദ്‌നാലെ എലെ അല്ലാദെ അയി മരാത്ത്‌ല് ഒന്റുനാമ് കാണാലെ. 14 അദ്‌നാലെ അയാള് അത്തി മരന നോഡി: <<ഇന്നിമുദാല് എന്നാല്‌ക്ക്‌മ് നിന്ന് പഗാന ആര്‌മ് തിന്നാദെ ഇര്‌ക്കുഡൊ>> എന്റ് സൊന്നാന്. ഇദ്‌ന സൊല്ലുപഡി നഡാക്ക്‌ന്റവാര്‌മ് കേ്ട്ടാര്. ഏസ്സ് സാമിബീ്ഡ്‌ക്ക് പോന്റാന് 15 അവാര് എര്‌സലേമ്‌ക്ക് എജ്ജ്‌ന പ്‌റ ഏസ്സ് സാമിബീ്ഡ്‌ക്ക് പോനാന്. അയാള് ഏവര ഗേന്റവാര്‌നാമ് ബാങ്ക്‌ന്റവാര്‌നാമ് ബെ്ളിഗെ മുഡിക്കി ബ്‌ഡ്യ പ്‌ഡിത്താന്. പണ കയിമാറ്‌ന്റവാര് മേസെഗാള്‌നാമ് സോറെ പക്കിഗാള്‌ന ബിക്ക്‌ന്റവാര് ഇര്‌ക്കുവ ബെഞ്ചിഗാള്‌നാമ് ഉന്തി ബീ്ക്ക്‌നാന്. 16 അയി സാമിബീ്ഡ് മേലെ ഒന്റു ജാദിനാമ് എ്ഡ്‌ത്തര്യ ആര്‌നാമ് അയാള് ബ്‌ഡാലെ. 17 അദ്‌ക്ക് പ്‌റസാരി ഏസ്സ്: << <എന്ന് ബീ്ഡ്‌ന എല്ലാ ജാദിഗാള്‌മ് പരേസുവ ബീ്ഡ് എന്റ് സൊല്ലുവാര്> എന്റ് എ്ള്‌ദിര്‌ക്ക്‌ന്റല്ല? ആന നിമ്മ അദ്‌ന <ത്‌റ്‌ട്ടാര് ഇര്‌ക്കുവ അളെ> മാഡി ബെത്ത്‌റ്‌ക്ക്‌ന്റ്‌റ്>> എന്റ് അവാര്‌ക്ക് ബുദ്ദി സൊന്നാന്. 18 ഇദ്‌ന കേ്ട്ട് എഗുദാര് പൂസാരി തലെവാര്‌ഗാള്‌മ് ബേദബാത്ത്യനാമ്‌ഗാള്‌മ് ഏസ്സ്‌ന എത്തെ കൊല്ലുഡൊ എന്നുവാദ്‌ന പറ്റി ഓസണെ കെ്ട്ട്‌നാര്. ആള്‌ഗാളൊട്ടുക്കു അയാള് സൊല്ലുവ ബുദ്ദിനായന കേ്ട്ട് അദിസ്യപട്ടിന്താര്. അദ്‌നാലെ എഗുദാര് പൂസാരി തലെവാര്‌ഗാള്‌മ് ബേദബാത്ത്യനാമ്‌ഗാള്‌മ് അയാള്‌ന അഞ്ച്‌നാര്. 19 സന്ത്യോഡ ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് പട്ടണാത്ത്‌ലിന്ത് പോനാര്. നമ്പിക്കേക്ക് ഇര്‌ക്കുവ പവുറു ഏസ്സ് കാട്ട്‌ന്റാന് 20 മറ്‌നാള് റാവെ താനെ അവാര് പോഗാട്ടി സാപ്പ ഇക്ക്‌ന അത്തി മര ബേരോഡ ഉണാന്ത് തള്ള്‌നാദ്‌ന അവാര് കണ്ടാര്. 21 അയി സമ്യ പത്ത്‌റോസു ഏസ്സ് സൊന്നാദ്‌ന നെനേത്താന്. <<ഗുരുവെ നീ നെന്നെ സാപ്പ ഇക്ക്‌ന അത്തി മര ഉണാങ്കി തള്ള്‌നാദ്‌ന നോഡു>> എന്റ് ഏസ്സ്‌ക്ക് സൊന്നാന്. 22 ഏസ്സ് അവാര്‌ക്ക് ഇത്തെ സൊന്നാന്: <<നിമ്മ സാമിന നമ്പുഡൊ. 23 നിമ്മ ആരാറ്റ മനേസ്സ്‌ല് സന്തേഗപഡാദെ നാന് സൊല്ലുവാദ് നഡാക്ക്‌മ് എന്റ് നമ്പിക്കോഡ ഈ മലെന <പ്‌ഡാങ്കി പോയി കഡാല്‌ക്ക് ബീ്ഗ്> എന്റ് സൊന്ന അദ് അദേപാസെ നഡാക്ക്‌മ് എന്റ് നാന് സത്ത്യമായിമ് നിമാക്ക് സൊന്റെ. 24 അദ്‌നാലെ നാന് നിമാക്ക് സൊന്റെ, നിമ്മ എന്താറ്റാക്ക് ബേ്ണ്ടി പരേസ്‌ഗാട്ടി അദ് നിമാക്ക് കെ്ഡേത്ത്‌ദ് എന്റ് നമ്പ്‌ന്. എന്റ് നിമാക്ക് അദ് കെ്ഡേക്ക്‌മ്. 25 നിമ്മ പരേസ്യ നിന്റ്‌റ്‌ക്കാട്ടി ഏവരാറ്റോഡ എന്താറ്റ മനേസ്സ്‌ല് ഇന്തദാന അയാള്‌ന നിമ്മ പൊറുത്തു ബ്‌ഡ്‌ഡൊ. അന്നാപ്പ് മേലോഗാത്ത്‌ലിര്‌ക്കുവ നിമ്മ് അപ്പാന്‌മ് നിമ്മ് പാവഗാള്‌ന പൊറുക്കുവാന്.>> ഏസ്സോഡ ഇര്‌ക്കുവ അദിഗരാന എഗുദാര് കേ്ള്‌വി കേ്ള്‌ക്ക്‌ന്റാര് 27 ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് പിന്നേമ് എര്‌സലേമ്‌ക്ക് ബന്താര്. ഏസ്സ് സാമിബീ്ഡ്‌ല് നഡാന്ത് കൊണ്ടിന്താന്. അദുക്കുള എഗുദാര് പൂസാരി തലെവാര്‌ഗാള്‌മ്, ബേദബാത്ത്യനാമ്‌ഗാള്‌മ്, എഗുദാര് മൂപ്പനാമ്‌ഗാള്‌മ്, ഏസ്സ് പട്ട്‌ക്ക് ബന്താര്. 28 അത്തെ അവാര്: <<നീ എന്ത് അദിഗരാത്ത്‌ല് ഈ കാര്യഗാളെല്ല ഗേന്റായി? ഈ അദിഗര ആര് നിനാക്ക് തന്താദ്?>> എന്റ് ഏസ്സ്‌ന കേ്ട്ടാര്. 29 അദുക്കുള ഏസ്സ്: <<നാന്‌മ് നിമാന ഒന്റു കേ്ള്‌വി കേ്ള്‌ക്ക്‌ന്റെ, അദ്‌ക്ക് നിമ്മ എനാക്ക് ബദ്‌ല് സൊല്ലുനു. അന്നാപ്പ് എന്ത് അദിഗരാത്ത്‌ല് നാന് ഇദ് ഗേന്റെ എന്റ് നാന്‌മ് നിമാക്ക് സൊല്ലുവെ; 30 ഓഗന്നാന്‌ക്ക് നീര്‌ക്ക് മുളുഗുസുവാദ്‌ക്കുളള അദിഗര കെ്ഡേത്താദ് സാമിലിന്തോ മന്‌സാന് എ്ഡേലിന്തൊ എന്റ് എനാക്ക് സൊല്ലുനു>> എന്റ് അവാര്‌ന കേ്ട്ടാന്. 31 അവാര് തമാക്ക് തമാക്ക് ഓസണെ മാഡി നോഡുനാര്. << <സാമിലിന്ത്> എന്റ് നമ്മ സൊന്നദാന <പിന്നെ നിമ്മ എന്ത്‌ക്ക് ഓഗന്നാന്‌ന നമ്പാലെ> എന്റ് ഏസ്സ് നമാന കേ്ള്‌ക്കുവാന്. 32 <മന്‌സാര്‌ഗാള്‌ലിന്ത്> എന്റ് നമ്മ സൊന്നദാന ആള്‌ഗാള് ഒട്ടുക്കു ഓഗന്നാന്‌ന ഒന്റു സാമിദാസ് എന്റ് നമ്പിന്താദ്‌നാലെ ആള്‌ഗാള് ഒട്ടുക്കു നമാന മൊനേക്ക് തെ്ട്ടുവാര്>> എന്റ് നെനേത്ത് അവാര് ആള്‌ഗാള്‌ക്ക് അഞ്ച്‌നാര്. 33 അദ്‌നാലെ <<എമാക്ക് തെര്യ>> എന്റ് അവാര് ഏസ്സ്‌ക്ക് സൊന്നാര്. <<അന്നാപ്പ് നാന് എന്ത് അദിഗരാത്ത്‌ല് ഇദെല്ല ഗേന്റേന് എന്റ് നാന്‌മ് നിമാക്ക് സൊല്ലുവാദില്ലെ>> എന്റ് ഏസ്സ് അവാര്‌ക്ക് സൊന്നാന്. |
New Life Computer Institute