മത്തായി 24 - സാമി സേദിഎര്സലേമ് അളിവാദ്‌ന പറ്റി ഏസ്സ് സൊന്റാന് 1 സാമിബീ്ഡ്‌ലിന്ത് ഏസ്സ് പോഗാട്ടി തന്ന് സൊല്ലുപഡി നഡാക്ക്‌ന്റവാര് സാമിബീഡ് കെ്ട്ടിര്‌ക്കുവാദ്‌ന പറ്റി ഏസ്സ്‌ക്ക് കാട്ട്യ അയാള് പട്ട്‌ക്ക് ബന്താര്. 2 അയാള് അവാര്‌ക്ക്: <<നിമ്മ ഇദ്‌നെല്ല കാണ്‌ന്റ്‌റല്ല. ഈ കെ്ട്ടിര്‌ക്കുവ കല്ല്‌ഗാള് കല്ല് കുദ്ദാക്ക് ഒന്റു കല്ല് ബീസാക്ക് നില്ലാദെ ഇ്ഡിന്ത് തള്ള്‌മ് എന്റ് നാന് സത്ത്യമായി നിമാക്ക് സൊന്റെ>> എന്റ് സൊന്നാന്. കഡേസി നാള്‌ന പറ്റി സൊന്റാന് 3 ഏസ്സ് ഒലിവു മലേല് കുക്കാന്ത്‌റ്‌ക്കാട്ടി തന്ന് സൊല്ലുപഡി നഡാക്ക്‌ന്റവാര് അയാള് പട്ട്‌ക്ക് തനിസി ബന്ത്: <<അദ് എന്നാല്‌ക്ക് നഡാക്ക്‌മ് എന്റ്‌മ് നീ ബരുവാദ്‌ക്ക്‌മ് ഉലഗ അളിവാദ്‌ക്ക്‌മ് അഡ്യാളഗാള് എന്തെല്ല എന്റ്‌മ് സൊല്ലി തരുഡോമെ>> എന്റ് കേ്ട്ടാര്. 4 അദ്‌ക്ക് ഏസ്സ് ഇത്തെ സൊന്നാന്: <<ആര്‌മ് നിമാന ഏമാത്താദിര്‌ക്ക്യ സൂസാരിത്തിര്‌ന്. 5 എന്ത്‌ക്കെന്റ് സൊന്ന <നാന്‌ത്തെ ക്‌റ്‌സ്‌ത്ത്> എന്റ് സൊല്ലികൊണ്ടു എഞ്ചോ ആള്‌ഗാള് എന്ന് പേരെ്ഡ്‌ത്ത് ബരുവാര്. അത്തെ അവാര് എഞ്ചോ ആള്‌ഗാള്‌ന ഏമാത്തുവാര്. 6 നിമ്മ ജുദ്ദഗാള്‌നാമ് ജുദ്ദ ഗേവ സേദിഗാള്‌നാമ് കേ്ള്‌ക്കുവുറു. അത്തെ നഡാക്കുവാദ്‌ന നെനേത്ത് അര്‌ക്കപഡാദിര്‌ക്ക്യ സൂസാരിത്തിര്‌ന്. അത്തെല്ല നഡാക്കുഡൊ. എന്റാല്‌മ് അദ് എല്ലാദ്‌ക്ക്‌മ് മുഡിവുത്തെ എന്റ്‌മ് നെനേക്ക ബേ്ഡ. 7 ഒന്റൊന്റു ജാദിഗാള് ആങ്കീങ്ക് ജുദ്ദ ഗേവാര്. ഒന്റൊന്റു നാഡ്‌ഗാള് ആങ്കീങ്ക് ജുദ്ദ ഗേവാര്. പഞ്ചാമ് ബൂമികുലുക്കാമ് പല എ്ഡേക്ക്‌റാഗ നഡാക്ക്‌മ്. 8 എന്റാല്‌മ് ഇദെല്ല പ്‌ള്ളെ ഉറുസ്സു ഇ്ളാഗുവാദ്‌ക്ക് സമാത്തെ. 9 അയി ഗളിഗേക്ക് അവാര് നിമാന കൊഡിമെപഡിസ്യ കൊഡുക്കുവാര്. അവാര് നിമാന കൊല്ലുവാര്. നിമ്മ എനാന പറ്റി സൊല്ലുവാദ്‌നാലെ എല്ലാ ജാദിഗാള്‌മ് നിമാന തൊറേന്ത് തള്ളുവാര്. 10 എഞ്ചോ ആള്‌ഗാള് നമ്പിക്കേന ബ്‌ട്ട്‌തള്ളി ആങ്കീങ്ക് കാട്ടി കൊഡുത്തു ആങ്കീങ്ക് തൊറേവാര്. 11 സാമിനിഗാല് സൊന്റു എന്റ് സൊല്ലി ഉറുട്ടു സൊല്ലുവ എഞ്ചോ സാമിദാസ്‌ഗാള് ബന്ത് എഞ്ചോ ആള്‌ഗാള്‌ന ഏമാത്തുവാര്. 12 കെ്ട്ട കാര്യഗാള് പെ്ര്‌ഗുവാദ്‌നാലെ എഞ്ചോ ആള്‌ഗാള്‌ക്കിര്‌ക്കുവ സീവാന് കൊറേന്ത് പോമു. 13 ആന കഡേഗല മാട്ടക്ക് നമ്പിക്കേല് ഒറേത്ത് നില്ല്‌ന്റവാന് തപ്പിസി കഡാക്കുവാന്. 14 സാമി ആളുവാദ്‌ന പറ്റി സൊല്ലുവ ഈ നല്ല സേദിന ഉലഗാത്ത്‌ലിര്‌ക്കുവ എല്ലാ ജാദിഗാള്‌മ് തെര്യ ബേ്ണ്ടി ഉലഗാക്കൊട്ടുക്കു സൊല്ലുവാര്. അന്നാപ്പ് കഡേസി നാള് ആവു.>> അപ്പാര കൊഡിമെ കാല 15 <<ആന ദാനിയേല് സാമിദാസ് എല്ലാദ്‌നാമ് അളിത്ത് തള്ളുവ അപ്പാര കെ്ട്ട കാര്യന പറ്റി സൊല്ലിര്‌ക്ക്‌ന്റാന്. അദ്‌ന നിമ്മ നെലെ പട്ട്‌ല് കാണുവുറു. (അദ് എന്ത് എന്റ് അദ്‌ന പറ്റി പഡിക്ക്‌ന്റവാന് നെപ്പ്‌കെ്ഡേസുഡൊ.) 16 അദുക്കുള എഗുദ നാഡ്‌ലിര്‌ക്ക്‌ന്റവാര് മലെഗാള് സാരി ഓഡി പോഡൊ. 17 ബീ്ഡ് മ്‌ഗാള് കുദ്ദാക്ക് ഇര്‌ക്ക്‌ന്റവാന് തന്ന് ബീ്ഡ്‌ലിര്‌ക്കുവ സാമനസട്ടെഗാള്‌ന എ്ഡ്‌ക്ക്യ അഡി ഇ്റാഗ ബേ്ഡ. 18 ഗദ്ദേല് ഗിലാസ ഗേന്റവാന് തന്ന് നല്ല സീലെന എ്ഡിക്ക്യ ഗുഡി തിരിഗി പോഗ ബേ്ഡ. 19 ബേ്റ്‌ഗാറാര്‌ക്ക്‌മ് പച്ചെപ്‌ള്ളെഗാറാര്‌ക്ക്‌മ് അയി കാല അപ്പാര കജട്ടാത്തെ. 20 ആന നിമ്മ ഓഡി പോവാദ് സളിഗളിഗേക്കൊ ഒയിവു നാള്‌ക്കൊ ആഗാദിര്‌ക്ക്യ പരേസ്‌ന്. 21 എന്ത്‌ക്കെന്റ് സൊന്ന, അയി കാലാക്ക് ഉലഗ ഉണ്ടാനാദ്‌ലിന്ത് ഇന്നമാട്ട്‌ക്ക് ബരാത്ത ഒന്റു ദൊഡ്ഡ കജട്ട ബര്‌മ്. ഇദേപാസെ ഒന്റു കജട്ട ഇന്നി ബരാമ്‌മാട്ട. 22 ആന സാമി അയി നാള്‌ഗാള്‌ന കമ്മി മാഡാദിന്ത ആര്‌ക്ക്‌മ് താങ്ക്യ മുഡ്യാമാട്ട. ആന താന് തെരിന്തെ്ഡ്‌ത്തവാര്‌ന നെനേത്ത് സാമി അയി നാള്‌ഗാള്‌ന കമ്മി മാഡിര്‌ന്റാന്. 23 അയി ഗളിഗേക്ക് ആരാറ്റ നിമാക്ക്: <ക്‌റ്‌സ്‌ത്ത് ഇദാ, ഇദ്‌ലിര്‌ന്റാന്> എന്റ്‌മ് ഇല്ലപോന <ക്‌റ്‌സ്‌ത്ത് അദാ, അദ്‌ലിര്‌ന്റാന്> എന്റ്‌മ് സൊന്നദാന നിമ്മ നമ്പാദേന്. 24 പഗ്‌ദ്യാള്‌ഗാള് തമ്മാത്തെ ക്‌റ്‌സ്‌ത്ത് എന്റ്‌മ് ബേ്റെ പഗ്‌ദ്യാള്‌ഗാള് തമ്മാത്തെ സാമിദാസ്‌ഗാള് എന്റ്‌മ് ഉറുട്ടു സൊല്ലി ബരുവാര്. അവാര് സാമി പട്ട്‌ലിന്ത് ബന്തവാര് എന്റ് കാട്ട്യ ദൊഡ്ഡുദൊഡ്ഡ അദിസ്യഗാള് ഗേവാര്. മുഡിന്തളാവുക്കു സാമി തെരിന്തെ്ഡ്‌ത്തവാര്‌ന ഗുഡി ഏമാത്ത്യ ബേ്ണ്ടി അവാര് ഇദെല്ല ഗേവാര്. 25 നാന് നിമാക്ക് ഇദ്‌ന മുദാല് താനെ സൊല്ലിര്‌ക്ക്‌ന്റേന് എന്റ് നെനേത്ത്‌റ്‌ന്. 26 അദ്‌നാലെ നിമാക്ക്: <ക്‌റ്‌സ്‌ത്ത് അദാ, ബെ്ട്ടെകാഡ്‌ല് ഇര്‌ന്റാന്> എന്റ് സൊന്നദാന ആങ്ക് പോഗാദേന്. <ഇദാ, കുച്ചുകുളാക്ക് ഇര്‌ന്റാന്> എന്റ് അവാര് സൊന്നദാന അദ്‌ന നമ്പാദേന്. 27 മിന്നുവ മിച്ച ബാന്‌ല് ക്‌ളാക്ക് സാരിന്ത് മേക്ക് സാരി മാട്ട്‌ക്ക് മിന്നുവാദ്‌ന കാണുവ പാസെത്തെ മന്‌സാനായി പ്‌റാന്തവാന് ബരുവാദ്. 28 സാവു ഏദ്‌ല് ഇര്‌ക്ക്‌ന്റൊ അദ്‌ക്ക് സാവു തീനി പാറ്‌ഗാള് ബന്ത് കൂഡുമു>> മന്‌സാനായി പ്‌റാന്തവാന് ബരുവ അഡ്യാള 29 <<അയി കാലാത്ത്‌ല കജട്ടഗാള് തീന്താദ്‌മ് അന്നാല് താനെ, <നേര ഇ്റ്‌ണ്ട് പോമു, നിലാവു ബെ്ള്‌സ അദിഗ നാള് അഡിക്കമാട്ട, ബാന്‌ലിന്ത് ബെ്ള്ളിഗാള് അലേന്ത് കൊണ്ടു ഇര്‌ക്കുവു, ബാന്‌ല് ഇര്‌ക്കുവാദ് ഒട്ടുക്കു അദ്‌റ്‌സിതള്ളുവു.> 30 അയി ഗളിഗെ മന്‌സാനായി പ്‌റാന്തവാന് ബാന്‌ലിന്ത് ബരുവ അഡ്യാളഗാള് കാട്ട്‌മ്. അയി സമ്യ ഉലഗാത്ത്‌ല എല്ലാ ജാദിഗാള്‌മ് നെഞ്ച്‌നമാര്‌ന അഡിത്ത് കൊണ്ടു അഗാറുവാര്. അത്തെ മന്‌സാനായി പ്‌റാന്തവാന് മഞ്ച്‌ല് സക്‌ത്യോഡാമ് നോഡ്യ മുഡ്യാത്ത ബെ്ള്‌സത്തോഡാമ് ബരുവാദ്‌ന അവാര് കാണുവാര്. 31 മന്‌സാനായി പ്‌റാന്തവാന് തന്ന് ദൂദാര്‌ഗാള്‌ന ദൊഡ്ഡ ആലാപ്പോഡ ഊദുവ കൊമ്പൂദത്തോഡ സൊല്ലി ബ്‌ഡുവാന്. അവാര് സാമി തെരിന്തെ്ഡ്‌ത്തവാര്‌ന ബൂമിക്ക് നാക്ക് സാരിന്ത്‌മ് എല്ലാ എ്ഡെഗാള്‌ലിന്ത്‌മ് കൂട്ടി ഒന്റുക്കു സേത്തുവാര്.>> അത്തി മര പഡുസുവ ഒന്റു കാര്യ 32 <<അത്തി മര നിമാക്ക് ഒന്റു കാര്യ പഡിസി തന്റ്. അത്തി മര താറ്‌ഗാള് സില്ല് പൊഡിന്ത് തള്‌ത്തദാന ബേസഗെ പ്‌റാക്ക്യ ആറ്റ് എന്റ് നിമാക്ക് തെരിവു. 33 ഇദേപാസെ നാന് സൊന്ന കാര്യഗാള് നഡാക്കുവാദ്‌ന നിമ്മ കാണ്‌ഗാട്ടി അയാള് ബരുവാദ്‌ക്ക് നേര ആറ്റ് എന്റ് നിമാക്ക് തെരിവു. 34 ഈ കാര്യഗാളെല്ല നഡാന്ത് തീര മാട്ട്‌ക്ക് ഈ കാലാത്ത്‌ലവാര് ഇല്ലാദാഗമാട്ടാര് എന്റ് നാന് സത്ത്യമായി നിമാക്ക് സൊന്റെ. 35 ബാന്‌മ് ബൂമിമ് അളിന്ത് പോമു. ആന നാന് സൊന്ന സൊല്ലുസുലാക്കഗാളൊ അളിന്ത് പോഗമാട്ട.>> നാള്‌മ് ഗളിഗേമ് ആര്‌ക്ക്‌മ് തെര്യ 36 <<അയി ബര്യ പോവ നാള്‌മ് ഗളിഗേമ് എന്നാല്‌ക്കെന്റ് ആര്‌ക്ക്‌മ് തെര്യാമാട്ട. മേലോഗാത്ത്‌ല് ഇര്‌ക്കുവ ദൂദാര്‌ഗാള്‌ക്കൊ സാമി മഗാന്‌ക്കൊ അദ് തെര്യാമാട്ട. അദെല്ല അപ്പാനാന സാമി ഒരുത്താന്‌ക്ക്‌ത്തെ തെരിമ്. 37 നോഗെ പെ്ളേത്തിന്ത കാലാത്ത്‌ല് നഡാന്ത പാസെ ആയിര്‌ക്ക്‌മ് മന്‌സാനായി പ്‌റാന്തവാന് ബരുവ ബരാവുമു. 38 സമ്‌ത്ത്‌റ പൊങ്കുവാദ്‌ക്ക് മുദാല്‌ല കാലാത്ത്‌ല്, നോഗെ ദൊഡ്ഡ പെ്ട്ടിക്ക് നൊഗേന്ത നാള് മാട്ട്‌ക്ക് ഉലഗാത്ത്‌ല ആള്‌ഗാള് തിന്റ്‌കുഡിത്ത് കൊണ്ടുമു, പെ്ണ്ണെ്ഡ്‌ത്ത് കൊണ്ടുമു, പെ്ണ്ണ് കൊഡുത്തു കൊണ്ടുമു ഇന്താര്. 39 സമ്‌ത്ത്‌റ പൊങ്കി എല്ലാവാര്‌നാമ് അളിക്ക മാട്ട്‌ക്ക് അവാര്‌ക്ക് ഒന്റുമു തെര്യാദിന്ത്‌ദ്. അദേപാസെത്തെ ആയിര്‌ക്ക്‌മ് മന്‌സാനായി പ്‌റാന്തവാന് ബരുവ ബരാവുമു. 40 അയി ഗളിഗേല് റാഡ് ഗണ്ടാള് ഗദ്ദേല് ഗിലാസ ഗേന്ത് കൊണ്ടു ഇര്‌ക്കുവാര്. എനാന നമ്പുവ ഒരുത്താന്‌ന എ്ഡ്‌ത്ത് പോവാര്. നമ്പാത്തവാന്‌ന തള്ളി പോവാര്. 41 റാഡ് പെ്ണ്ണ്‌മക്കാള് ഒന്റു ബീസ്‌ങ്കല്ല്‌ല് ബീസികൊണ്ടു ഇര്‌ക്കുവാര്. എനാന നമ്പുവ ഒരിത്തിന എ്ഡ്‌ത്ത് പോവാര്. നമ്പാത്തവാള്‌ന തള്ളി പോവാര്. 42 നിമ്മ് ആണ്ടവാന് ബരുവാദ് ഏദ് ഗളിഗെ എന്റ് നിമാക്ക് തെര്യാത്താദ്‌നാലെ നിമ്മ ഒപ്പ ഒരിങ്കിര്‌ക്ക്‌ന്റവാരായി ഇര്‌ന്. 43 ആന നിമ്മ ഈ കാര്യ തെരിന്ത്‌റ്‌ക്കുഡൊ. ത്‌റ്‌ട്ടാന് ഏദ് ഗളിഗേക്ക് ബരുവാനെന്റ് ബീ്ഡ്‌ഗാറാന്‌ക്ക് തെരിന്തിന്തദാന അയാള് ഉറങ്കാദിന്ത് തന്ന് ബീ്ഡ്‌ന ത്‌റാക്ക്യ ബ്‌ഡമാട്ടാന്. 44 അത്തെ നിമ്മ നെനേക്കാത്ത ഗളിഗേക്ക് മന്‌സാനായി പ്‌റാന്തവാന് ബരുവാദ്‌നാലെ നിമ്മാമ് ഒരിങ്കിര്‌ന്.>> നമ്പ്യ മുഡിവ ഗിലാസഗാറാന്‌മ് നമ്പ്യ മുഡ്യാത്ത ഗിലാസഗാറാന്‌മ് 45 <<തന്ന് ബീ്ഡ്‌ല ഗിലാസഗാറാര്‌ക്ക് അദാദ് ഗളിഗേക്ക് തീനി കൊഡുക്ക്യ ബേ്ണ്ടി പണ്ണാഡിക്ക് നമ്പ്യ മുഡിന്റവാനായി എ്ഡ്‌ത്ത് ബെത്ത്‌റ്‌ക്കുവ ബുദ്ദ്യുള്ള ഗിലാസഗാറാന് ആര്? 46 പണ്ണാഡി ബര്‌ഗാട്ടി തനാക്ക് കൊഡുത്ത ഗിലാസാന അദേപഡി ഗിലാസഗാറാന് ഗേന്ത്‌റ്‌ക്കുവാദ്‌ന കണ്ട അയാള് ബാഗ്യകേ്ട്ടവാന്. 47 അത്തെ ഗേന്തവാന്‌ന അയി പണ്ണാഡി തനാക്കിര്‌ക്കുവാദ്‌ന ഒട്ടുക്കു നോഡിനഡാത്ത്‌ന്റവാന് മാഡി ബെക്കുവാന് എന്റ് നാന് സത്ത്യമായി നിമാക്ക് സൊന്റെ. 48 ആന അയാള് കേ്ഡ്‌ഗെ്ട്ട ഗിലാസഗാറാനായിന്ത, <എന്ന് പണ്ണാഡി ബര്യ ഗളിഗ്യാമ്> എന്റ് മനേസ്സ്‌ല് നെനേത്ത് കൊണ്ടു 49 തന്നോഡൊപ്പ ഗിലാസ ഗേന്റവാര്‌ന അഡിത്ത്‌പ്‌ഡിത്ത് കൊണ്ടുമു കുഡിഗാറാരോഡ എ്ണേന്ത് തിന്റ്‌കുഡിത്ത് കൊണ്ടുമു ഇര്‌ക്ക്യ പ്‌ഡിക്ക്‌ന്റാന്. 50 അദുക്കുള അയി ഗിലാസഗാറാന് നെനേക്കാത്ത നാള്‌ക്ക്‌മ് തെര്യാത്ത ഗളിഗേക്ക്‌മ് അയാള് പണ്ണാഡി ബരുവാന്. 51 പ്‌റ അയി പണ്ണാഡി അയാള്‌ന ദെ്ണ്ടിത്ത് ബക്‌തിഗാറാരായി നഡിക്ക്‌ന്റവാര് കൂട്ടാക്ക് സേത്തുവാന്. അദ്‌ല് കേ്സിമ് ഇര്‌ക്ക്‌മ്, പല്ല്‌ന ന്‌റ്‌ന്‌റ കഡിക്കുവാദ്‌മ് ഇര്‌ക്ക്‌മ്.>> |
New Life Computer Institute