ജൂദാന് 1 - സാമി സേദി1 അപ്പാന് സാമി സീവാന്‌ബെത്ത് തെരിന്തെ്ഡ്‌ത്ത് ഏസ്സ് ക്‌റ്‌സ്‌ത്ത്‌ക്ക് ബേ്ണ്ടി പേ്ണിസി ബെത്ത്‌റ്‌ക്ക്‌ന്റവാര്‌ക്ക് ഏസ്സ് ക്‌റ്‌സ്‌ത്ത് ഗിലാസഗാറാന്‌മ് ആക്കോവു തമ്പിമ് ആയിര്‌ക്കുവ ജൂദാന് എ്ള്‌ദുവ എ്ള്‌ത്ത്. 2 സാമി നിമാന ഗവപട്ട് നിമ്മ് പെ്ളേപ്പ്‌ല് നിമാന സേത്തി സേത്തി നിമ്മ്‌ദ്യോഡാമ് പെ്ളേസുഡൊ, സേത്തി സേത്തി സീവാന്‌ബെത്ത്‌മ് പെ്ളേസുഡൊ. 3 എനാക്ക് മെച്ച്‌പ്‌ഡിത്തവാരെ, ഏസ്സ് ക്‌റ്‌സ്‌ത്ത്‌ന ബെത്ത് സാമി നമ്മ് പെ്ളേപ്പ്‌ന എത്തെ കാപാറ്റ്‌ന്റാന് എന്നുവ കാര്യന പറ്റി നിമാക്ക് എ്ള്‌ദ്യ ബേ്ണ്ടി നാന് മുദാല് ആസെപട്ടിന്തെ. അത്തെ നാന് ആസെപട്ട്‌റ്‌ക്കാട്ടി ഏസ്സ്‌ന നമ്പി സാമിക്ക് പട്ടവാര് ആനവാര് ഏസ്സ് സൊന്ന നായഗാള്‌ന ഉറുദ്ദ്യായി നമ്പി പെ്ളേക്കുഡൊ എന്നുവ കാര്യന പറ്റി എ്ള്‌ദുവാദ്‌ത്തെ ദൊഡ്ഡ കാര്യ എന്റ് നാന് നെനേത്തെ. അദ്‌നാലെ അദ്‌ന പറ്റി എ്ള്‌ദ്യ നാന് ആസെപട്ടെ. 4 എന്ത്‌ക്കെന്റ് സൊന്ന ഏസ്സ് ക്‌റ്‌സ്‌ത്ത്‌ന ബെത്ത് സാമി നമാന ഗവപഡുവാദ്‌നാലെ മൊറെ തപ്പി നഡാന്താല്‌മ് സാമി നമാന ദെ്ണ്ടിക്കമാട്ടാന് എന്റ് സൊല്ലുന്റവാര്‌ഗാള് ഏസ്സ്‌ഗാറാര് കൂട്ടായിര്‌ക്കുവ നിമ്മ് കൂട്ടാക്ക് ഓസണോഡ എ്ണേന്റാര്. അത്തവാള്‌ഗാള് സാമിനാമ് ഏസ്സ് ക്‌റ്‌സ്‌ത്ത്‌ന ബെത്ത് സാമി നമാക്ക് ഗേന്ത കാര്യഗാള്‌നാമ് ആള്‌ഗാള്‌ക്ക് തപ്പായി സൊല്ലി കൊഡുക്കുന്റവാര്‌ത്തെ. അത്തവാള്‌ഗാള്‌ക്ക് എത്തവ ദെ്ണ്ടണെ കെ്ഡേക്ക്യ പോന്റെന്റ് സാമി ബൊക്കുലു മുന്നുക്കെ എ്ള്‌ദിര്‌ക്ക്‌ന്റ്. 5 അദ് എത്തവ ദെ്ണ്ടണെ എന്റ് സൊന്ന, മിസ്‌റേമ് നാഡ്‌ല് അഡിമ്യായിന്തവാര്‌ന ഒട്ടുക്കു സാമി ബ്‌ഡ്‌സ്‌ന പ്‌റ തനാന നമ്പാത്തവാര്‌ന എത്തെ അളിത്താനൊ അദേപാസെ ഇവാര് പെ്ളേപ്പ്‌നാമ് അളിക്കുവാന്. ഇദ് നിമാക്ക് മുദാല് താനെ തെരിമല്ല. 6 അദ്‌താനേമല്ല തമാക്ക് ബേ്ണ്ടി സാമി കൊഡുത്ത പദാവിപട്ടഗാള് മദി എന്റ് നെനേക്കാദെ പാവ ഗേന്ത് അയി പദാവിപട്ടഗാള്‌ന ബ്‌ട്ട് തള്ള്‌ന ദൂദാര്‌ഗാള്‌ന ആര്‌ക്ക്‌മ് പോയി ബെ്ളിഗെ എ്ഡ്‌ത്ത് ബര്യ മുഡ്യാത്ത ഇ്റ്‌ട്ട് കുളാക്ക് ഇര്‌ക്കുഡൊ എന്നുവ ദെ്ണ്ടണേക്ക് ബേ്ണ്ടി സൂസാരിത്ത് ബെത്ത്‌റ്‌ക്ക്‌ന്റാന്. അദേ ദെ്ണ്ടണെത്തെ ഇവാര്‌ക്ക്‌മ് കെ്ഡേക്ക്‌മ്. 7 അദേപാസെ സോദോമു പട്ടണാത്ത്‌ലവാര്‌മ് ഗൊമോറ പട്ടണാത്ത്‌ലവാര്‌മ് അദ്‌ക്ക് സുറ്റീല് ഇര്‌ക്കുവ ഊരുലവാര്‌ഗാള്‌മ് ഗണ്ടെന്റില്ലാദേമ് പെ്ണ്ണെന്റില്ലാദേമ് മൊറെതലെ നോഡാദെ കാണ്‌ന്റവാരോഡെല്ല ബേസ്യാഡികൊണ്ടു നഡാന്ത് തമാന താനെ കെ്ഡ്‌സ്‌നാര്. അദ്‌നാലെ സാമി അവാര്‌ന തീക്കിക്കി അളിത്താന്. അദേപാസെത്തെ ഇവാര്‌ക്ക്‌മ് എന്നാല്‌ക്ക്‌മ് കെ്ഡാദിര്‌ക്കുവ തീക്കിക്കി ദെ്ണ്ടിക്കുവ ദെ്ണ്ടണെ കെ്ഡേക്ക്‌മ്. 8 എന്ത്‌ക്കെന്റ് സൊന്ന അവാര്‌ന പാസെത്തെ ഇവാര്‌മ് തമ്മ് പെ്ളേപ്പ്‌ന കെ്ഡിസി കൊണ്ടു തമ്മ കണ്ട കനേസ്‌ല്‌ഗാള്‌നാമ് തമ്മ കണ്ട കാര്യഗാള്‌നാമ് ദൊഡ്ഡ കാര്യ എന്റ് നെനേക്ക്‌ന്റാര്. സാമി അവാര്‌ക്ക് ബെത്ത്‌റ്‌ക്കുവ തലെവാര്‌ഗാള്‌നാമ് അയി തലെവാര്‌ഗാള് സൊല്ലുപഡിക്ക് ഇര്‌ക്കുവാദ്‌നാമ് അവാര് ദൊഡ്ഡാദെന്റ് നെനേക്കാദെ തമ്മ നല്ല മദിസി നഡാക്കുവ കാര്യഗാള്‌ന ബെലെ ഇല്ലാത്ത കാര്യഗാളെന്റ് സൊല്ലി നഡാക്ക്‌ന്റാര്. 9 ആന ദൂദാര്‌ഗാള്‌ല് മുമ്പാനായിര്‌ക്കുവ മിഗായേല് മോസെ സാവുന പറ്റി സെയിത്താനോഡ തറ്‌ക്കുവ ഗളിഗേല് അയി സെയിത്താന് ഗേവ കുറ്റന കണ്ട് താന് അയാള്‌ന നൊഡിവാദ് സെര്യല്ല എന്റ് നെനേത്ത് ആണ്ടവാന് നിനാന ദെ്ണ്ടിക്കുഡൊ എന്റ്‌ത്തെ സൊന്നാന്. 10 ആന ഇവാരൊ, സാമി തമാക്ക് മേല് ബെത്ത്‌റ്‌ക്കുവ അദിഗരഗാള്‌ന തെര്യാദെ അദ്‌ന പറ്റി ബെലെ ഇല്ലാത്താദായി സൊല്ലുവാദ്‌നാലെ തമാക്ക് എന്ത് ബര്യ പോന്റു എന്നുവ അറുവില്ലാദെ സൊന്റാര്. തമാക്ക് ഒഡ്ഡി ബെത്ത്‌റ്‌ക്കുവ കണ്ണിന തെര്യാദെ അദ്‌ക്ക് സിക്കി അളിന്ത് പോവ അറുവില്ലാത്ത ബേ്ണ്ട്‌ഗാള്‌ന പാസെത്തെ ഇവാര്‌മ് അളിന്ത് പോന്റാര്. 11 എത്തെന്റ് സൊന്ന, തന്ന് തമ്പി കാണിക്കെ സാമിക്ക് മെച്ച്‌പ്‌ഡിത്ത്‌ദ്, ആന തന്ന് കാണിക്കെ സാമിക്ക് മെച്ച്‌പ്‌ഡിക്കാലെ. അദ്‌നാലെ അയാളോഡ കണ്ണ്‌കഡി ബെത്ത് പാവ ഗേന്ത കയീന്‌ന പാസേമ് സാമിന ബ്‌ഡ പണ ദൊഡ്ഡാദെന്റ് നെനേത്ത് പാവ ഗേന്ത ബിലെയാമ്‌ന പാസേമ് തനാക്ക് സാമി ബെത്ത തലെവാന് മോസെന എദ്‌റ്‌ത്ത് സൊല്ലി കെ്ട്ട് പോന കോരാഗ്‌ന പാസേമ് ഇവാര് അളിന്ത് പോവ പെ്ളേപ്പ് പെ്ളേക്ക്‌ന്റാര്. ഇവാര്‌ക്ക് ബരുവ ആവാത്ത് ദൊഡ്ഡ ആവാത്ത്‌ത്തെ. 12 ഇത്തവാള്‌ഗാള് സാമിക്ക് അഞ്ചാദെ സാമിക്ക് അഞ്ചി പെ്ളേക്കുവ നിമ്മോഡ എ്ണേന്ത് നിമ്മ പിര്യരിമോഡ ഗേവ ബിര്‌ന്ത്‌ക്ക് പങ്ക്‌ഗാറാര് ആവാദ്‌നാലെ നല്ല ബെല്ലാത്ത്‌ല് കല്ല്‌റ്‌ക്കുവ പാസെ ഇര്‌ക്ക്‌ന്റവാര്‌ത്തെ ഇവാര്. മുക്ക്യമാന മാട്ട്യാന്‌ക്ക്‌മ് ഏസ്സ്‌ഗാറാര് കൂട്ടന നഡാത്തുവ മാട്ട്യനാമ്‌ക്ക്‌മ് കെ്ട്ട്‌പട്ട് നഡാക്കാദെ തമ്മ തമാക്ക് താനെ തലെവാര്‌ഗാളായിമ് മാട്ട്യനാമ്‌ഗാളായിമ് ഇവാര് പെ്ളേക്ക്‌ന്റാര്. അദ്‌നാലെ കാറ്റഡിത്ത് പോവ നീരില്ലാത്ത മഞ്ച്‌ന പാസെത്തെ ഇവാര്. അദ്‌താനേമല്ല നാട്ട്‌ന മരന പ്‌ഡിങ്കി പിന്നേമ് നാട്ടി ഉണാങ്കി തള്ള്‌ന മരന പാസെ ഇവാര് ഒന്റുക്കുമു ഉവഗരപഡാദെ പെ്ളേക്ക്‌ന്റാര്. 13 കഡാല്‌ക്ക് എജ്ജുസുവ എ്ള്‌ക്ക് പ്‌ഡിത്ത സണ്ട്‌സളാങ്ക്‌ഗാള്‌ന കഡാല് തെരെഗാള് ഏ്ട്ടിക്ക് ഏ്റ്‌സുവ പാസെത്തെ ഇവാര് ഗേവ കെ്ട്ട കാര്യഗാള്. തനാക്ക് ബേ്ണ്ടി സാമി ബെത്ത്‌റ്‌ക്കുവ എ്ഡേലിന്ത് തപ്പി പോവ ബെ്ള്ളിഗാള്‌ന പാസെത്തെ എന്ത്‌ക്ക് ബേ്ണ്ടി പെ്ളേക്കുഡൊ എന്നുവ നെനേവു ഇല്ലാദിര്‌ക്കുവ ഇവാര് പെ്ളേപ്പ്. ഇത്തവാള്‌ഗാള് കഡേസില് പോയി എജ്ജുവാദ് എന്നാല്‌ക്ക്‌മ് ഇ്റ്‌ട്ട് കെ്ട്ടിര്‌ക്കുവ എ്ഡേക്ക്‌ത്തെ. 14 ആദി മന്‌സാന് ആദാമ്‌ലിന്ത് ഏ്ളാവാദ് തലെകെ്ട്ട്‌ല് പ്‌റാന്ത ആനോക്കു ഇവാര്‌ന പറ്റി സൊല്ലിര്‌ക്കുവാദ് എന്തെന്റ് സൊന്ന: <<ഇദാ, ആണ്ടവാന് എ്ണ്ണ്‌സ്യ മുഡ്യാത്ത ദൂദാര്‌ഗാളോഡ ബന്റാന്. 15 സാമിക്ക് അഞ്ചാദെ ഗേന്ത ഒന്റൊന്റു കുറ്റഗാള്‌ക്ക്‌മ് തഗ്‌ന്ത ദെ്ണ്ടെണെ കെ്ഡേക്ക്യ ബേ്ണ്ടി ആള്‌ഗാള്‌ന ബിദിക്ക്യ ബന്റാന്. സാമിക്ക് അഞ്ചാദെ സാമിന പറ്റി മാനഗെ്ഡ്‌സുവ നായഗാള് സൊന്ന ഒന്റൊന്റു കുറ്റഗാറാര്‌നാമ് ബിദിക്ക്യ ബന്റാന്.>> 16 അവാര് തമ്മ് പിര്യാക്ക് പെ്ളേത്ത് തമ്മ് കാര്യഗാള് നഡാക്കാദെ ബര്‌ഗാട്ടി അവാര് ങ്കൊറുങ്കൊറുക്ക്‌ന്റവാര്‌മ് അഡ്‌ത്തവാര്‌ന പറ്റി കുറ്റ സൊല്ലുന്റവാര്‌മായി പെ്ളേക്ക്‌ന്റാര്. അദല്ലാദെ താനെ തമ്മാത്തെ ദൊഡ്ഡവാരെന്റ് സൊല്ലി നഡാന്ത് തമ്മ ആസെപഡുവ കാര്യ നഡാക്ക്യ ബേ്ണ്ടി അഡ്‌ത്തവാര്‌ന ഉജാത്തിമ് സൊല്ലുന്റാര്. 17 എനാക്ക് മെച്ച്‌പ്‌ഡിത്തവാരെ, നിമ്മ, നമ്മ് ആണ്ടവാന് ഏസ്സ് ക്‌റ്‌സ്‌ത്ത് അപ്പോസുത്തലനാമ് നഡാക്ക്യ പോവ കാര്യഗാള്‌ന പറ്റി മുദാലെ സൊന്നാദ്‌ന നെനേത്ത് നോഡുനു. 18 കഡേസി കാലാത്ത്‌ല് ആണ്ടവാന്‌ക്ക് മെച്ച്‌പ്‌ഡിത്തവാരായി പെ്ളേക്ക്‌ന്റവാര്‌ന നാണഗെ്ഡിസി തമ്മ് പിര്യാക്ക് കാര്യഗാള് ഗേന്ത് പെ്ളേക്ക്‌ന്റവാര് ബരുവാര് എന്റ് മുദാല് താനെ ഈ അപ്പോസുത്തലാര് സൊല്ലിര്‌ക്ക്‌ന്റാരല്ല. 19 ഇവാര് സാമിനിഗാല് നഡാത്താത്തവാരായി തമാക്കിര്‌ക്കുവ അറുവുലു നഡാന്ത് കൊണ്ടു ഏസ്സ്‌ഗാറാര് കൂട്ടാത്ത്‌ല് ആങ്കീങ്ക് കച്ചി മാഡ്‌ന്റവാര്‌ത്തെ. 20 ആന എനാക്ക് മെച്ച്‌പ്‌ഡിത്തവാരെ, സാമിനിഗാല് തരുവ നെനേവുഗാള്‌ന മനേസ്സ്‌ക്ക് തുമ്പുസി പരേസികൊണ്ടു നിമ്മ് പെ്ളേപ്പ്‌ല് നിമ്മ സാമിക്കുള്ളവാരായി പെ്ളേത്ത് നിമ്മ നമ്പി നഡാക്കുവ പെ്ളേപ്പ്‌ല് ആങ്കീങ്ക് ഉവഗര ഗേന്ത് പെ്ളേന്. 21 അദ്‌താനേമല്ല, സാമി നിമാന സീവാന്‌ബെത്ത് നഡാത്ത്യ ബേ്ണ്ടി നിമാന സാമി കയിക്ക് ഒപ്പിസി കൊഡുത്തു കൊണ്ടു നിമാക്ക് കെ്ഡേത്ത എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ക്ക് ബേ്ഡ്‌മാന ഗവ ആണ്ടവാന് ഏസ്സ് ക്‌റ്‌സ്‌ത്ത് പഡ്യ ബേ്ണ്ടി നിമ്മ ഒപ്പ കാത്ത്‌റ്‌ന്. 22 അത്തെ പെ്ളേക്കാദെ ഈ ഉലഗാക്ക് ഒന്റു കണ്ണ്‌മ് സാമിക്ക് ഒന്റു കണ്ണ്‌മ് ബെത്ത് പെ്ളേക്ക്‌ന്റവാര്‌ന ഗവപട്ട് അവാര്‌ക്ക് ഉവഗര ഗേന്. 23 അദല്ലാദെ തമ്മ ഗേവ കുറ്റഗാള്‌നാലെ സാമി ബിദിക്ക് സിക്കി തീക്ക് പോവ ആള്‌ഗാള്‌ന ഗവപട്ട് അവാര് സിക്ക്യ പോവ ആവാത്ത്‌ലിന്ത് അവാര് തപ്പിസി കഡാക്ക്യ അവാര്‌ക്ക് ഉവഗര ഗേന്. ആന മുദാല് നിമ്മ് പെ്ളേപ്പ്‌ന സൂസാരിക്കുവ എ്ണ്ണത്തോഡ നിമ്മ ഉവഗര ഗേഡൊ. ഇല്ലപോന അവാര് സിക്കിര്‌ക്കുവ പാവാക്ക് നിമ്മാമ് സിക്കി തള്ളുവുറല്ല? സാമിക്ക് നണ്ണി 24-25 നമ്മ് പെ്ളേപ്പ്‌ന കാപാറ്റുവ നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌നാലെ നിമ്മ നമ്പി നഡാക്കുവ പെ്ളേപ്പ്‌ലിന്ത് നിമ്മ തപ്പി പോഗാദെ നിമാന കാത്ത്, പാവ ഒന്റുമു ഇല്ലാദെ മ്‌ഗ്‌ന്ത പിര്യത്തോഡാമ് നിമാന തന്ന് പട്ട്‌ക്ക് സേത്തുവ അയി സാമിക്ക്‌ത്തെ പേര്‌മ് പെരിമേമ് ഉണ്ടാഡൊ. അയി സാമി സക്‌ത്യോഡ ആളുവാദ് ഈ കാലാത്ത്‌ല്‌മ് എന്റാകാലാത്ത്‌ല്‌മ് ഇര്‌ക്കുഡൊ. ആമേന്. |
New Life Computer Institute