ആക്കോവു 1 - സാമി സേദി1 സാമിത്ത്‌മ് ആണ്ടവാന് ഏസ്സ് ക്‌റ്‌സ്‌ത്ത്‌ത്ത്‌മ് ഗിലാസഗാറാന് ആയിര്‌ക്കുവ ആക്കോവു എന്നുവ നാന് എ്ള്‌ദുവ എ്ള്‌ത്ത്. ഇസ്‌റവേല് ജാദിക്ക് പട്ട പന്നന്റ് കുലാത്ത്‌ല് ഏസ്സ്‌ന നമ്പിര്‌ക്കുവ ആള്‌ഗാള് ഉലഗാത്ത്‌ല് പല എ്ഡെഗാള്‌ല് ജില്ലമ്പുല്ലാത്ത് ആയിര്‌ക്ക്‌ന്റാര്. അവാര്‌ക്ക്‌ത്തെ നാന് ഈ എ്ള്‌ത്ത് എ്ള്‌ദുവാദ്. സാമ്യോഡ ഇര്‌ക്കുവ നമ്പിക്കേമ് ബുദ്ദിമ് 2-3 എന്ന് ഏസ്സ്‌ഗാറാരെ, ഏസ്സ്‌ഗാറാര് ആയിര്‌ക്കുവ നിമാക്ക് പല ദിന്‌സ്‌ല് കജട്ടാമ് സോദണെഗാള്‌മ് ബര്‌മ്. അദുക്കുള നിമ്മ മനേസ്സാറ പിര്യപഡുഡൊ. എന്ത്‌ക്കെന്റ് സൊന്ന ഇദ്‌നെല്ല താങ്കുവാദ്‌ക്കുള്ള ദയിര നിമ്മ് മനേസ്സ്‌ക്ക് കെ്ഡേത്ത് കൊണ്ടേ ഇര്‌ക്ക്‌മ്. 4 അത്തെ മനേസ്സ്‌ക്ക് ദയിര കെ്ഡേത്ത് കൊണ്ടേ ഇര്‌ക്കുവാദ്‌നാലെ നിമ്മ കുറ്റകൊറേവു ഇല്ലത്തവാര്‌മ് സാമിക്കിര്‌ക്കുവ എല്ലാ ഗുണാമ് കെ്ഡേത്ത് കൊണ്ട്‌റ്‌ക്ക്‌ന്റവാര്‌മ് ആവുറു. 5 ഇദ്‌ന തെരിവാദ്‌ക്കുള്ള ബുദ്ദി നിമാക്ക് ആര്‌ക്കാറ്റ കൊറേവിന്തദാന നിമ്മ സാമിന കേ്ള്‌ക്കുഡൊ. എന്ത്‌ക്കെന്റ് സൊന്ന നമാക്ക് ബേ്ഡ്‌മാനദെല്ല സാമി നല്ല മനേസ്സോഡ തരുവാന്. അത്തെ കേ്ള്‌ക്കുവാദ്‌നാലെ സാമി നമാന നൊഡ്യമാട്ടാന്. 6 നിമ്മ സാമിന കേ്ള്‌ക്കാട്ടി മനേസ്സ്‌ല് സന്തേഗപഡാദെ നിമ്മ കേ്ള്‌ക്കുവാദെല്ല നിമാക്ക് കെ്ഡേക്ക്‌മെന്റ് നമ്പികൊണ്ടു കേ്ള്‌ക്കുഡൊ. ആന സന്തേഗത്തോഡ കേ്ള്‌ക്ക്‌ന്റവാന് കാറ്റ് അഡിക്കാട്ടി കീ്ഗ്‌മേല്‌മ് ആഡുവ കഡാല് തെരെന പാസെത്തെ. 7 ഇത്തെ ഇര്‌ക്കുവ ഒന്റു മന്‌സാന് ആണ്ടവാന്‌ലിന്ത് എന്തൊന്റു കെ്ഡേക്ക്‌മെന്റ് ആസെപഡ്യ പാങ്കില്ലെ. 8 റാഡ് മനേസ്സ് ഇര്‌ക്ക്‌ന്റവാന് താന് ഗേവ ഒന്റു കാര്യാത്ത്‌ല്‌മ് ഒറേത്ത് നില്ലമാട്ടാന്. പണഗാറാന്‌മ് ഏ്ളേമ് ഒന്റേ സമാത്തെ 9 ഏസ്സ്‌ഗാറാന് ആയിര്‌ക്കുവ ഒന്റു ഏ്ളേന സാമി ദൊഡ്ഡവാനായി കാണുവാദ്‌നാലെ അയാള് സാമിന പറ്റി പെരിമെനായ സൊല്ലുഡൊ. 10 ഒന്റു പണഗാറാന്‌ന ഏ്ളെ മാഡ്‌നാദ്‌നാലെ അയാള് സാമിന പറ്റി പെരിമെനായ സൊല്ലുഡൊ. എന്ത്‌ക്കെന്റ് സൊന്ന അയാള് പണ പൂവുന പാസെ കൊട്ടി മായിന്ത് പോമു. 11 നേര കഡാന്ത് ബെക്കെ മുറ്റുഗാട്ടി പൂവെല്ല കൊട്ടി അദ്‌ക്കിര്‌ക്കുവ അളാഗെല്ല മായിന്ത് പോന്റു. അദ്‌താനേമല്ല പുല്ലു മഗെഗളിഗേക്ക് ദള്‌ദളാമ് ഇര്‌ക്ക്‌ന്റ്, ബേസഗേക്ക് അദ് കരിഗിമ് പോന്റു. അദേപാസെത്തെ പണന നമ്പി പെ്ളേക്ക്‌ന്റവാന് പെ്ളേപ്പ്‌മ് കെ്ട്ട് പോന്റു. 12 ഏസ്സ്‌ന നമ്പുവാദ്‌നാലെ ബരുവ സോദെണെഗാള്‌ന താങ്കുവാദ്‌ക്കുള്ള ദയിര കെ്ഡേസിര്‌ക്ക്‌ന്റവാന് ബാഗ്യഗാറാന്. എന്ത്‌ക്കെന്റ് സൊന്ന കജട്ടഗാള്‌നെല്ല താങ്കി നമ്പിക്കേന ബ്‌ഡാദെ ഒറേത്ത് നില്ല്‌ന്റവാന്‌ക്ക് സാമി നല്ല പെ്ളേപ്പ്‌ന കൊഡുക്കുവാന്. തന്നോഡ സീവാന്‌ബെത്ത് നഡാക്ക്‌ന്റവാര്‌ക്ക് ഈ നല്ല പെ്ളേപ്പ്‌ന കൊഡുക്കുവേന് എന്റ് സാമി സൊല്ലിമ്‌ര്‌ക്ക്‌ന്റാന്. പാവ ഗേയ സാമി ആസെപ്‌ഡ്‌സുവാദില്ലെ 13 പാവ ഗേവ എന്താറ്റ കാര്യഗാള് ബര്‌ഗാട്ടി സാമിത്തെ ഇത്തെ ബര്‌സ്സ്‌നാദ് എന്റ് ആര്‌മ് സൊല്ല ബേ്ഡ. എന്ത്‌ക്കെന്റ് സൊന്ന പാവ ഗേവ എ്ണ്ണഗാള് സാമി ആര്‌ക്ക്‌മ് കൊഡുക്കുവാദില്ലെ. അത്തവ ദിന്‌സ്‌ല് സാമി ആര്‌നാമ് ആസെപ്‌ഡ്‌സുവാദില്ലെ. 14 ആന ഒരുത്താന് തനാക്ക് ഇര്‌ക്കുവ കെ്ട്ട ആസെഗാള്‌നാലേത്തെ ഇത്തവ ആസെപാഡ്‌ഗാള്‌ക്ക് സിക്കുവാദ്. 15 ഒന്റു പെ്ണ്ണ്‌പ്‌ളെ ബേ്റായി, പ്‌ള്ളെ ദൊഡ്ഡി, പ്‌ള്ളെ്ഡ്‌ക്കുവ പാസെ ഒരുത്താന് മനേസ്സ്‌ല് ആഗാത്ത ഈ ആസെഗാളെല്ല പെരിഗി പെരിഗി പാവഗാള് ഗേന്റാന്. ഇത്തെ പാവഗാള് ഗേന്ത് അയാള് സാവുക്കു ആളാന്റാന്. 16 അദ്‌നാലെ എനാക്ക് മെച്ച്‌പ്‌ഡിത്ത ഏസ്സ്‌ഗാറാരെ, നിമ്മ ആര്‌മ് ഇത്തവ സോദണേക്ക് സിക്കി ഏമാന്ത് പോഗാദേന്. സാമി സൊല്ലുക്കു കെ്ട്ട്‌പട്ട് നഡാന് 17 നമാക്ക് ബേ്ഡ്‌മാന എല്ലാ നല്ല ബരഗാള്‌നാമ് തരുവാദ് മേലോഗാത്ത്‌ല് അപ്പാനായിര്‌ക്കുവ സാമിത്തെ. അയി സാമിലിന്ത് നല്ലാദ് കെ്ട്ടാദ് മാറി മാറി ബരാഗേ മാട്ട. അയി സാമില് ഒന്റു കൊറേവെ കാണമാട്ടാമ്. 18 താന് ദ്‌ട്ടിസിര്‌ക്കുവ എല്ലാദ്‌ന ബ്‌ഡ നമ്മ ഉജാന്തവാരായി ഇര്‌ക്ക്യ ബേ്ണ്ടി സാമി ആസെപഡ്‌ന്റാന്. അദ്‌നാലെ സാമി തന്ന് സത്ത്യമാന സൊല്ലുസുലാക്കാന നമാക്ക് സൊല്ലി തന്ത് നമാന പുദ്യ മന്‌സാന് മാഡിര്‌ക്ക്‌ന്റാന്. 19 അത്തെ സാമി നമാന പുദ്യ മന്‌സാന് മാഡിര്‌ക്കുവാദ്‌നാലെ നമ്മ സാമി സൊല്ലുസുലാക്കാന കാദ് കൊഡുത്തു കേ്ള്‌ക്കുഡൊ. നമ്മ നായ നൊഡിഗാട്ടി മൊനേക്ക് തെ്ട്ടാദെ നിദാനത്തോഡ നായ നൊഡിഡൊ. അദ്‌നാലെ എനാക്ക് മെച്ച്‌പ്‌ഡിത്ത ഏസ്സ്‌ഗാറാരെ, ഇദ്‌ന നിമ്മ സൊക്കാന തെരിന്ത്‌റ്‌ക്കുഡൊ. 20 എന്ത്‌ക്കെന്റ് സൊന്ന നമ്മ മൊനേക്ക് തെ്ട്ട്‌ഗാട്ടി ഇന്ന്യൊന്റൊരുത്താന്‌ന സാമി ആസെപഡുവ പാസെ നമാക്ക് നഡാത്ത്യ മുഡ്യാമാട്ട. 21 അദ്‌നാലെ നമ്മോഡ ഇന്നിമിര്‌ക്കുവ കെ്ട്ട പളാക്കഗാള്‌നെല്ല തെ്റിന്ത് തള്ള്‌ന്. നമാന പുദ്യ മന്‌സാന് മാഡ്‌ന സാമി സൊല്ലുസുലാക്കാക്ക് കെ്ട്ട്‌പട്ട് നഡാന്. എന്ത്‌ക്കെന്റ് സൊന്ന ഈ സാമി സൊല്ലുസുലാക്കാക്ക് നമാന കാപാറ്റ്യ മുഡിമ്. 22 ആന നമ്മ സാമി സൊല്ലുസുലാക്കാന കേ്ള്‌ക്കുവാദ് താനെ അല്ലാദെ അദ്‌ല് സൊല്ലിര്‌ക്കുവ കാര്യഗാളെല്ല ഗേഡൊ. കേ്ട്ട് ഗുഡി ഗേഗാദിന്ത നമ്മ നമാന താനെ സദിക്ക്‌ന്റാമ്. 23 എന്ത്‌ക്കെന്റ് സൊന്ന സാമി സൊല്ലുസുലാക്കാന കേ്ട്ടിന്ത്‌മ് അദ്‌ല് സൊല്ലിര്‌ക്കുവ കാര്യഗാള്‌നെല്ല ഗേഗാത്തവാന് കന്നാഡില് തന്ന് മൂഞ്ചി നോഡുന്റവാന്‌ന പാസെത്തെ. 24 അയാള് കന്നാഡില് തന്ന് മൂഞ്ചിന നോഡുന പ്‌റ തന്ന് മൂഞ്ചിന മറാന്ത് തള്ളുവ പാസെ സാമി സൊല്ലുസുലാക്കാന കേ്ട്ട് അദേപാസെ ഗേഗാത്തവാന് തമ്മ് കൊറേവുഗാള്‌ന തെരിന്തിന്ത്‌മ് മറാന്ത് തള്ളുവാന്. 25 ആന ഒന്റു കൊറേവുമില്ലാത്ത സാമി സൊല്ലുസുലാക്കാന കേ്ട്ട് മറാക്കാദെ നമ്മ അദേപാസെ പെ്ളേക്കുഡൊ. അത്തെ പെ്ളേക്ക്‌ന്റവാര്‌ക്ക് അദ്‌ക്ക് തഗ്‌ന്ത പ്‌ണ്ണ്യ കെ്ഡേക്ക്‌മ്. എന്ത്‌ക്കെന്റ് സൊന്ന നമ്മ് പെ്ളേപ്പ്‌ലിര്‌ക്കുവ കൊറേവുഗാള്‌ന ഒട്ടുക്കു ഇല്ലാദെ മാഡുവാദ്‌ക്കുള്ള ബില സാമി സൊല്ലുസുലാക്കാക്ക് ഇര്‌ക്ക്‌ന്റ്. നേരാന സാമി ബക്‌തി 26 ബായിക്ക് ബന്താദെല്ല സൊല്ലിന്ത് താന് ബക്‌തിഗാറാനെന്റ് സൊന്ന അദ് നേര്‌മാന ബക്‌ത്യല്ല. അത്തെ സൊല്ലുന്റവാന് തനാന താനെ സദിക്ക്‌ന്റാന്. 27 ദബാരിഗാള്‌ക്ക്‌മ് മ്‌ണ്ടേസ്യാര്‌ക്ക്‌മ് കജട്ട ബര്‌ഗാട്ടി അവാര്‌ന കയി താങ്കുവാദ്‌മ് ഈ ലോഗാത്ത്‌ലിര്‌ക്കുവ ആഗാത്ത കാര്യഗാളൊന്റുമു ഗേഗാദെ തനാന താനെ സൂസാരിക്കുവാദ്‌മ്‌ത്തെ സാമി കണ്ണ്‌ക്ക് മെച്ച്‌പ്‌ഡിത്ത ബക്‌തി. |
New Life Computer Institute