എവുറായാര് 8 - സാമി സേദിഏസ്സ് നമ്മ് ദൊഡ്ഡ പൂസാരി 1 എമ്മ സൊല്ലി ബരുവാദ്‌ക്ക് ഇര്‌ക്കുവ അര്‌ത്ത എന്തെന്റ് സൊന്ന, മേലോഗാത്ത്‌ല് മദ്‌പ്പുള്ള സാമി കുറിഞ്ചിക്ക് ബല സാരി കുക്കാന്ത്‌റ്‌ക്കുവ ഒന്റു ദൊഡ്ഡ പൂസാരി നമാക്ക് ഇര്‌ക്ക്‌ന്റാന്. 2 മന്‌സാന് മാഡാത്താദ്‌മ് ആണ്ടവാന് മാഡിര്‌ക്കുവാദ്‌മ് ആന സത്ത്യമാന ഗുഡുസുലുല അരാങ്ക കുച്ചുലു അയാള് ഗിലാസ ഗേന്റാന്. 3 ഒന്റൊന്റു എഗുദാര് ദൊഡ്ഡ പൂസാരിനാമ് എ്ഡ്‌ത്ത് ബെക്കുവാദ് സാമിക്ക് നേര്‌സെഗാള്‌മ് പലിഗാള്‌മ് കൊഡുക്ക്യാത്തെ. അദ്‌നാലെ ഈ ദൊഡ്ഡ പൂസാരിമ് സാമിക്ക് എന്താറ്റ ഒന്റു കൊഡുക്കുഡൊ. 4 അയാള് ഇന്നാല്‌മ് ബൂമില് പെ്ളേത്തിന്തദാന പൂസാരി ആയിര്‌ക്കാഗേമാട്ടാന്. എന്ത്‌ക്കെന്റ് സൊന്ന എഗുദാര് സട്ടപഡി നേര്‌സെഗാള് കൊഡുക്കുവ പൂസാരിഗാള് ഈങ്ക് ഇര്‌ക്ക്‌ന്റാരല്ല. 5 അയി പൂസാരിഗാള് ബൂമില് ഗേവ കാര്യഗാള് മേലോഗാത്ത്‌ല് ഇര്‌ക്കുവ കാര്യഗാള്‌ന കാട്ടുവ ഉരുവാമ് നിഗാല്‌മ്‌ത്തെ. അദ്‌നാലെത്തെ മോസെ ഗുഡുസുലു കെ്ട്ട്യ പഡ്‌ഗാട്ടി, <<മലേല് ബെത്ത് നാന് നിനാക്ക് കാട്ടി തന്ത അദേ ദിന്‌സ്‌ല് എല്ലാദ്‌മ് നീ ഗേഡൊ>> എന്റ് സാമി മോസേക്ക് സൊന്നാദ്. 6 ആന ക്‌റ്‌സ്‌ത്ത്‌ക്ക് കെ്ഡേത്ത്‌റ്‌ക്കുവ പൂസാരി ഗിലാസ ബേ്റെ പൂസാരിഗാള്‌ക്ക് കൊഡുത്തിന്താദ്‌ന ബ്‌ഡ എത്ത്‌റാഗോ ദൊഡ്ഡാദ്‌ത്തെ. അദേപാസെ സാമിനാമ് മന്‌സാര്‌ഗാള്‌നാമ് എ്ണേത്ത് ക്‌റ്‌സ്‌ത്ത് ബെത്ത പുദ്യ ഒപ്പന്ത പള്യാദ്‌ന ബ്‌ഡ എത്ത്‌റാഗോ മ്‌ഗ്‌ന്താദ്‌ത്തെ. മ്‌ഗ്‌ന്ത നല്ല കാര്യഗാള്‌ന തരുവെ എന്റ് സാമി ബാക്ക് തന്ത് കൊണ്ടുത്തെ ഈ പുദ്യ ഒപ്പന്ത ബെത്താദ്. 7 മുദാല് ബെത്ത ഒപ്പന്ത കുറ്റകൊറേവില്ലത്താദ് ആയിന്തദാന റണ്ടാവാദ് ഒന്റു ഒപ്പന്ത ബെക്കുവ തേവി ഇല്ലാദിന്ത്‌ദ്. 8 ആന ഇസ്‌റവേല്‌ഗാറാരോഡ കുറ്റകൊറേവു കണ്ടാദ്‌നാലെ സാമി ഇത്തെ സൊന്നാന്: <<ഇസ്‌റവേല്‌ല ആള്‌ഗാളോഡാമ് എഗുദാല ആള്‌ഗാളോഡാമ് നാന് ഒന്റു പുദ്യ ഒപ്പന്ത ബെക്കുവ ഗളിഗെ ബന്റ് എന്റ് ആണ്ടവാന് സൊന്റാന്. 9 നാന് അവാര് പാട്ടനാമ് കയിന പ്‌ഡിത്ത് മിസ്‌റേമ് നാഡ്‌ലിന്ത് കൂട്ടി ബന്ത നാള്‌ല്, നാന് അവാരോഡ ബെത്ത ഒപ്പന്തന പാസെ അല്ല അയി ഒപ്പന്ത. എന്ത്‌ക്കെന്റ് സൊന്ന നാന് അവാരോഡ ബെത്ത ഒപ്പന്താക്ക് അവാര് കെ്ട്ട്‌പട്ട് ഇര്‌ക്കാലെ. അദ്‌നാലെ നാന് അവാര്‌ന ഗെരേഗാലെ എന്റ് ആണ്ടവാന് സൊന്റാന്. 10 ഇന്നി ബര്യ പോവ കാലാത്ത്‌ല് ഇസ്‌റവേല്‌ല ആള്‌ഗാള്‌ക്ക് നാന് ബെക്കുവ ഒപ്പന്ത ഇദ്‌ത്തെ എന്റ് ആണ്ടവാന് സൊന്റാന്: എന്ന് സട്ടഗാള്‌ന നാന് അവാര് മനേസ്സ്‌കുള്ളുക്കു ബെക്കുവെ. അവാര് നെഞ്ച് കുള്ളുക്കു നാന് അയി സട്ടഗാള്‌ന എ്ള്‌ദുവെ. നാന് അവാര്‌ക്ക് സാമി ആയിര്‌ക്കുവെ. അവാര് എന്ന് ജനഗാള് ആയിര്‌ക്കുവാര്. 11 ഇന്നി ആര്‌മ് തന്ന് എ്ണേവുഗാറാര്‌ക്കൊ തന്ന് കുഡുമഗാറാര്‌ക്കൊ <ആണ്ടവാന്‌ന തെരിഡൊ> എന്റ് ബുദ്ദി സൊല്ലി കൊഡുക്കമാട്ടാര്. എന്ത്‌ക്കെന്റ് സൊന്ന സ്‌ന്നവാര്‌ലിന്ത് ദൊഡ്ഡവാര് മാട്ട്‌ക്ക് അത്തെ എല്ലാവാര്‌മ് എനാന തെരിവാര്. 12 അവാര് ഗേന്ത തെറ്റ്‌കുറ്റഗാള്‌ന നാന് പൊറുക്കുവെ. അവാര് ഗേന്ത പാവഗാള്‌ന നാന് എന്നാല്‌ക്ക്‌മ് നെനേക്കമാട്ടെ.>> 13 ഈ ഒപ്പന്തന <<പുദ്യാദ്>> എന്റ് സൊല്ലുവാദ്‌നാലെ മുദാല്‌ലാദ്‌ന സാമി പള്യാദ് മാഡിര്‌ക്ക്‌ന്റാന്. പള്യാദാനാദ്‌മ് ഉവഗര ഇല്ലാത്താദ്‌മ് ആന ഏദ്‌മ് സട്ടന മായിന്ത് തള്ള്‌മ്. |
New Life Computer Institute