എവുറായാര് 5 - സാമി സേദി1 എഗുദാര്‌ത്ത് എല്ലാ ദൊഡ്ഡ പൂസാരിഗാള്‌നാമ് ജനഗാള്‌ലിന്ത്‌ത്തെ തെരിന്തെ്ഡ്‌ക്കുവാദ്. ആള്‌ഗാള്‌ക്ക് ബേ്ണ്ടി സാമി ഗിലാസഗാള്‌ന ഗേയ എ്ഡ്‌ത്ത് ബെത്ത്‌റ്‌ന്റവാര്‌ത്തെ അവാര്. അവാര് ആള്‌ഗാള് ഗേന്ത പാവഗാള്‌ക്ക് പലിഗാള്‌മ് നേര്‌സെഗാള്‌മ് കൊഡുക്കുഡൊ. 2 എഗുദാര് ദൊഡ്ഡ പൂസാരിമ് കൊറേവുള്ളവാന്‌ത്തെ. അദ്‌നാലെ അയാള് അറുവില്ലത്തവാര്‌നാമ് തപ്പ് ഗേന്റവാര്‌നാമ് കറ്‌മ്മ പട്ട് നഡാക്ക്യ മുഡിന്റവാന്‌ത്തെ. 3 താന്‌മ് കൊറേവുള്ളവാന് ആനാദ്‌നാലെ ജനഗാള് പാവഗാള്‌ക്ക് ബേ്ണ്ടി താനേമല്ല തന്ന് പാവഗാള്‌ക്ക് ബേ്ണ്ടിമ് പലി കൊഡുക്കുഡൊ. 4 ആന ആര്‌മ് അവനവാന് താനെ അയി പദാവിന ഏറ്റെഡ്‌ക്കുവാദില്ലെ. അഗരോനുന പാസെ സാമി ബ്‌ളിത്തവാന്‌ത്തെ അയി പദാവിന ഏറ്റെ്ഡ്‌ക്കുവാദ്. 5 അദേപാസെ ക്‌റ്‌സ്‌ത്ത്‌മ് ദൊഡ്ഡ പൂസാരി എന്നുവ മദ്‌പ്പ്‌ന താന്‌താനെ ഏറ്റെഡ്‌ക്കാലെ. ആന, <<നീ എന്ന് മഗാന്, ഇന്റ് നാന് നിനാന പ്‌റാത്തിര്‌ന്റെ>> എന്റ് സൊന്ന സാമി അയാള്‌ക്ക് കൊഡുത്താദ്‌ത്തെ അയി പദാവി. 6 അദേപാസെ ബേ്റൊന്റു പട്ട്‌ല്‌മ്, <<മല്‌ക്കിസേദേക്ക്‌ന പൂസാരി മാഡ്‌ന ദിന്‌സ്‌ല് നീ എന്നാല്‌ക്ക്‌മ് ഒന്റു പൂസാരി ആയിര്‌ക്ക്‌ന്റായി>> എന്റ് സാമി സൊന്റാന്. 7 ക്‌റ്‌സ്‌ത്ത് താന് ഈ ഉലഗാത്ത്‌ല് പെ്ളേത്ത്‌റ്‌ക്കാട്ടി ദൊഡ്ഡാദ്‌ക്ക് അഗാറുവ അഗാറോഡാമ് കേ്സ്യോഡാമ് സാവുലിന്ത് തനാന കാപാറ്റ്യ മുഡിവ സാമിക്ക് പരേസി ഉദാവിക്കായി ബേ്ണ്ട്‌നാന്. അയാള് തണിമ്യുള്ളവാന്‌മ് സാമിക്ക് അഞ്ചി ബക്‌ത്യോഡ ഇന്തവാന്‌മ് ആനാദ്‌നാലെ സാമി അയാള് പരേസന കേ്ട്ടാന്. 8 ക്‌റ്‌സ്‌ത്ത് സാമി മഗാനായിന്ത് ഗുഡി താന് പട്ട കജട്ടഗാള്‌നാലെ സാമി സൊല്ലുപഡി നഡാക്ക്യ പഡിത്താന്. 9 അത്തെ കജട്ടഗാള് പട്ട് താന് തെഗേന്തവാന് ആഗാട്ടി അയാള് തന്ന് സൊല്ലുപഡി നഡാക്കുവ എല്ലാവാര്‌നാമ് എന്നാല്‌ക്ക്‌മ് കാപാറ്റ്‌ന്റവാന് ആനാന്. 10 മല്‌ക്കിസേദേക്ക്‌ന പൂസാരി മാഡ്‌ന ദിന്‌സ്‌ല് സാമി ക്‌റ്‌സ്‌ത്ത്‌നാമ് ദൊഡ്ഡ പൂസാരി മാഡ്‌നാന്. നമ്പിക്കെ ബ്‌ഡ്‌ന്റവാര് സൂസാരിക്കുഡൊ 11 എമാക്ക് ഇദ്‌ന പറ്റി മൊത്തന കാര്യഗാള് സൊല്ല്യ ഇര്‌ക്ക്‌ന്റ്. ആന നിമ്മ അദ്‌ന സട്ടന നെപ്പ്കെ്ഡേസത്താദ്‌നാലെ സൊക്കാന സൊല്ലി തര്യ ബുദ്ദിമുട്ടു ഇര്‌ക്ക്‌ന്റ്. 12 നിമ്മ നമ്പിക്കേക്ക് ബന്ത് കാല എഞ്ച്‌ക്കൊ ആറ്റ്. ഇന്നാക്കെല്ലെ നിമ്മ പഡ്‌സ്‌ന്റവാര് ആയിന്ത്‌റ്‌ക്കുഡൊ. ആന ഇന്നാല്‌മ് നിമാക്ക് സാമി സൊല്ലുസുലാക്കാത്ത്‌ലിന്ത് മുദാല് പഡിത്ത കാര്യഗാള്‌ന താനെ ആരാറ്റ മറിസിമ് പഡിസി തരുവ തേവി ബന്ത്‌റ്‌ക്ക്‌ന്റ്. ദൊഡ്ഡവാര് തിന്നുവ തീന്യല്ല, പാല് കുഡിക്കുവ തേവിത്തെ നിമാക്ക് ബന്ത്‌റ്‌ക്ക്‌ന്റ്. 13 പാല്‌ന കുഡിത്ത് പെ്ളേക്ക്‌ന്റവാനെല്ല ഇന്നാല്‌മ് പച്ചെപ്‌ള്ളെന പാസെ സെരി ഏദ് തപ്പ് ഏദ് എന്റ് തെര്യാത്തവാന്‌ത്തെ. 14 ആന ദൊഡ്ഡവാര് തിന്നുവ തീനി ദൊഡ്ഡുനവാര്‌ക്ക്‌ത്തെ. അവാര് നല്ലാദ് കെ്ട്ടാദ് എന്തെന്റ് നെപ്പ്‌കെ്ഡേസ്യ പഡിത്ത് പളാഗ്‌നവാര്‌ത്തെ. |
New Life Computer Institute