ഗലാത്ത്യഗാറാര് 1 - സാമി സേദി1-2 ഗലാത്ത്യ നാഡ്‌ല ഏസ്സ്‌ഗാറാര് കൂട്ടഗാള്‌ക്ക്, അപ്പോസുത്തലാന് പവുലോസു എന്നുവ നാന് എ്ള്‌ദുവ എ്ള്‌ത്ത്. ഈ എ്ള്‌ത്ത്‌ല് എ്ള്‌ദിര്‌ക്കുവ കാര്യഗാള്‌ക്ക് ഇദ്‌ല് എന്നൊപ്പ ഇര്‌ക്കുവ ഏസ്സ്‌ഗാറാര്‌മ് ഒത്തുപട്ട്‌ര്‌ന്റാര്. നല്ല സേദിന സൊല്ല്യ ബേ്ണ്ടി എനാന അപ്പോസുത്തലാനായി തെരിന്തെ്ഡ്‌ത്ത് ബെത്താദ് ഏസ്സ് ക്‌റ്‌സ്‌ത്ത്‌മ് ഏസ്സ് ക്‌റ്‌സ്‌ത്ത്‌ന ഉജുര്‌ളാക്ക്‌ന അപ്പാനായിര്‌ക്കുവ സാമിമ്‌ത്തെ. അല്ലാദെ മന്‌സാനല്ല. 3 നമ്മ് അപ്പാന് സാമിമ് ആണ്ടവാന് ഏസ്സ് ക്‌റ്‌സ്‌ത്ത്‌മ് നിമാക്ക് പ്‌ണ്ണ്യാമ് ഗേഡൊ, നിമാന നിമ്മ്‌ദ്യായിമ് ബെക്കുഡൊ. 4 നമ്മ് പാവാന തീത്ത് ഈ കേ്ഡ്‌ഗെ്ട്ട ഉലഗാത്ത്‌ലിന്ത് നമാന കാപാറ്റ്യ ബേ്ണ്ടി ക്‌റ്‌സ്‌ത്ത് തനാന താനെ പലി കൊഡുത്താന്. ഇദ്‌ത്തെ അപ്പാനാന സാമി ആസെപട്ടിന്ത കാര്യ. 5 സത്ത്യമായിമ് അയി സാമിക്ക് പേര്‌പെരിമെ എന്നാല്‌ക്ക്‌മ് ഇര്‌ക്കുഡൊ. ക്‌റ്‌സ്‌ത്ത്‌ന പറ്റി സൊല്ലുവ സത്ത്യമാന സേദി ഒന്റേ ഒന്റുത്തെ 6 ക്‌റ്‌സ്‌ത്ത് ഗേന്ത പ്‌ണ്ണ്യാത്ത്‌ല് പെ്ളേക്ക്യ നിമാന ബ്‌ളിത്ത സാമിന തെ്റിന്ത് സട്ടന നിമ്മ നല്ല സേദി എന്റ് സൊല്ലുവ ബേ്റൊന്റു സേദിന കേ്ള്‌ക്ക്യ മൊഗേവാദ്‌ന കേ്ള്‌ക്കാട്ടി എനാക്ക് നമ്പ്യാഗേ മുഡിവാദില്ലെ. 7 നേര്‌മായി സൊന്ന അത്തെല്ല സൊല്ലുവാദ് നല്ല സേദ്യല്ല, ആന അവാര് നിമാക്ക് പഡുസുവ കാര്യഗാള്‌ന ബെത്ത് നിമ്മ് മനേസ്സ്‌ന സന്തേഗ പഡിസി ക്‌റ്‌സ്‌ത്ത്‌ത്ത് നല്ല സേദിന മോസമാഡ്യത്തെ നോഡുന്റാര്. 8 ക്‌റ്‌സ്‌ത്ത്‌ന പറ്റി സൊല്ലുവ നല്ല സേദിന എമ്മ നിമാക്ക് സൊന്നേമ്. അയി നല്ല സേദിക്ക് എ്ണേഗാത്ത ദിന്‌സ്‌ല് എമ്മഗൊ, മേലോഗാത്ത്‌ലിന്ത് ഒന്റു ദൂദാനൊ നിമാക്ക് സൊന്നദാന അയാള് എന്നാല്‌ക്ക്‌മ് സാപ്പ പ്‌ഡിത്തവാന് ആയിര്‌ക്കുവാന്. 9 എമ്മ നിമാക്ക് മുദാല് സൊല്ലിന്ത പാസെ നാന് നിമാക്ക് ഇന്നാല്‌മ് സൊന്റെ: നിമ്മ കേ്ട്ട് നമ്പിര്‌ക്കുവ നല്ല സേദിക്ക് എ്ണേഗാത്ത ബേ്റൊന്റു നല്ല സേദിന ആരാറ്റ സൊന്നദാന അയാള് സാപ്പ പ്‌ഡിത്തവാന് ആയിര്‌ക്കുവാന്. 10 <<നാന് സൊല്ലുവാദ്‌ത്തെ നേരെന്റ്>> ആള്‌ഗാള് സൊല്ല്യ ബേ്ണ്ടിത്തേഗ നാന് ഇത്തെ സൊല്ലുവാദ്? അല്ല, അദ്‌ക്ക് ബദ്‌ല സാമിത്തെ നാന് സൊല്ലുവാദ്‌ന നേരെന്റ് സൊല്ലുഡൊ. നാന് മന്‌സാര്‌ഗാള്‌ന പിര്യപഡിസ്യ നോഡുന്റേന? ഇല്ലെ, ഇന്നാല്‌മ് നാന് മന്‌സാര്‌ഗാള്‌ന പിര്യപഡിസ്യ നോഡുവദാന ക്‌റ്‌സ്‌ത്ത്‌ക്ക് ഗിലാസഗാറാന് ആയിര്‌ക്കമാട്ടെ. പവുലോസു എത്തെ അപ്പോസുത്തലാന് ആനാന് 11 ഏസ്സ്‌ഗാറാരാന എന്ന് എ്ണേവുഗാറാരെ, നാന് നിമാക്ക് സൊന്ന നല്ല സേദി മന്‌സാര് നെനേവുലിന്ത് ബന്ത കാര്യല്ല എന്റ് നിമ്മ തെര്യ ബേ്ണ്ടി നാന് ആസെപഡ്‌ന്റെ. 12 ഈ നല്ല സേദി എനാക്ക് ഏദാറ്റ മന്‌സാര്‌ഗാള്‌ലിന്ത് കെ്ഡേത്താദല്ല. ഏദാറ്റ മന്‌സാന് പഡിസി തന്താദ്‌മല്ല. ഏസ്സ് ക്‌റ്‌സ്‌ത്ത്‌ത്തെ എന്ന് മനേസ്സ്‌ക്ക് ഇദ്‌ന അര്‌ത്ത മാഡി തന്താദ്. 13 എഗുദാര് സട്ട്‌മെ്ട്ട്‌പഡി നാന് സാമിന കുമ്മുഡിന്ത ഗളിഗേല് നാന് എത്തെ പെ്ളേത്തിന്തേനെന്റ് നിമ്മ കേ്ട്ട്‌റ്‌ക്ക്‌ന്റ്‌റല്ല. അയി ഗളിഗേല് നാന് ഏസ്സ്‌ഗാറാര് കൂട്ടഗാള്‌ന മ്‌ഗ്‌ന്ത കൊഡിമേമ് പഡ്‌സ്‌നെ, അവാര്‌ന അളിക്ക്യാമ് ഓരാഡ്‌നെ. 14 എന്ന് ബയിസ്സ്‌ക്കൊപ്പ ഇര്‌ക്ക്‌ന്റവാര്‌ന ബ്‌ഡ എഗുദാര് സട്ട്‌മെ്ട്ട്‌പഡി പെ്ളേക്കുവ കാര്യാത്ത്‌ല് നാന് മുഗാനി ആയിന്തെ. എന്ന് പാട്ടനാമ് സൊല്ലി ബെത്ത്‌റ്‌ക്കുവ കാര്യഗാള്‌ന നാന് സുറുസുറുപ്പോഡാമ് ഗേന്ത്‌നഡാന്തിന്തെ. 15-16 എഗുദാരല്ലാത്ത ജാദിഗാള്‌ക്ക് നല്ല സേദിന സൊല്ല്യ ബേ്ണ്ടി സാമിക്ക് എനാന കറ്‌മ്മപ്‌ഡിത്ത്‌ദ്. ഈ കാര്യ ഗേയ ബേ്ണ്ടി നാന് പ്‌റാക്കാത്ത മുദാലെ സാമി എനാന തെരിന്തെ്ഡ്‌ത്താന്. അദ്‌നാലെ തന്ന് മഗാന് ഏസ്സ് ക്‌റ്‌സ്‌ത്ത്‌ന സാമി എന്ന് കണ്ണ്‌ക്ക് കാട്ടി തന്താന്. അദുക്കുള നാന് എന്ത് ഗേഡൊ എന്റ് ആര്‌നാമ് കേ്ള്‌ക്കാലെ. 17 ക്‌റ്‌സ്‌ത്ത്‌ന പറ്റി സൊല്ലുവ നല്ല സേദിന സൊല്ല്യ ബേ്ണ്ടി ഏസ്സ് മുദാല് എ്ഡ്‌ത്ത് ബെത്തിന്ത അപ്പോസുത്തലനാമ്‌ന കാണ്യ നാന് എര്‌സലേമ് പട്ടണാക്ക് പോഗാമില്ലെ. അദ്‌ക്ക് ബദ്‌ല മുദാല് അറാവി നാഡ്‌ക്ക് പോന, പ്‌റസാരി അദ്‌ലിന്ത് ദമാസ്‌കോസു എന്നുവ പട്ടണാക്ക് തിരിഗി പോനെ. 18 മൂറു ബര്‌സ്സ കളിന്ത പ്‌റ പത്ത്‌റോസുന പളാക്കപഡ്യ നാന് എര്‌സലേമ് പട്ടണാക്ക് പോനെ. പദിനിഞ്ച്‌നാള് നാന് അയാളോഡ അദ്‌ല് തങ്ക്‌നേന്. 19 ആണ്ടവാന് ഏസ്സ് തമ്പി ആക്കോവുന അല്ലാദെ ബേ്റെ അപ്പോസുത്തലനാമ് ആര്‌നാമ് നാന് അദ്‌ല് കാണാലെ. 20 നാന് നിമാക്ക് എ്ള്‌ദുവാദ് ഉറുട്ടല്ല നേര്‌ത്തെ എന്റ് സാമിക്ക് തെരിന്റ്. 21 അദ്‌ക്ക് പ്‌റ നാന് സ്‌റിയ, കിലിക്ക്യ എന്നുവ നാഡ്‌ഗാള്‌ക്ക് പോനെ. 22 അയി ഗളിഗേല് എഗുദ നാഡ്‌ല് ഏസ്സ്‌ഗാറാര് കൂട്ടഗാള്‌ല ആള്‌ഗാള് എനാന പറ്റി കേ്ട്ടിന്താര്. എന്റാല്‌മ് അവാര്‌ക്ക് എനാന പളാക്കില്ലാദിന്ത്‌ദ്. 23 <<മുദാല് നമാന കൊഡിമെപഡിസി ഏസ്സോഡ ബെത്ത്‌റ്‌ക്കുവ നമ്പിക്കേന ഇല്ലാദെ മാഡ്യ അയാള് ഓരാഡിന്താന്. ആന അയാള് ഇന്നാല് ഏസ്സ്‌ന നമ്പ്യ ആള്‌ഗാള്‌ക്ക് സൊല്ലുന്റാന്>> എന്റ് ബേ്റാള് സൊല്ലുവാദ്‌നത്തെ അവാര് കേ്ട്ടിന്താദ്. 24 ഇത്തെ അവാര് എനാന പറ്റി കേ്ട്ട് സാമിന ദൊഡ്ഡവാന്‌ത്തെ എന്റ് സൊന്നാര്. |
New Life Computer Institute