Zekhariah 7 - Zanniat Bible

Thinlung Tak Lo Rong Ulhnak

¹ Darius in kumpimangbawi a ṭuanhnak kum lihnak kum, hla kua hla (Kislev hla), ni li nia ah Bawipa ai thu khiah i hnenah hleng i.

² Bethel khua mite in Sharezer le Regemmelek tu amahte minungte thawn Cungnungber Bawipa ai Biakinn ah Bawipa ai hmuifu ngen tuhin le,

³ suangbawite le prophette thuzawt tuhin hlat i. A thuzawthnak tu, “Biakinnpui siatsuah sek manin kum tampui song kin bawn awng zohnak bangin hla nga hla ah rong ul in lungsia in um tuhlai i ing maw?” ti i.

⁴ Bawipa thu tu i hnenah hleng ai,

⁵ Bawipa in, “Hemi ram minung le suangbawite heh rel tu: kumpui kum sawmsarih song, hla nga hla le hla sarih hla ah rong ul tlang ai lungsia in a um tlang khiah kaimah i upat manin ilo i.

⁶ Ti le rong a ding a ai tlang fangin khai amahte thinriamhnak hrang ian i,” tiin ti i.

⁷ Jerusalem tu khangso le nainung ngai in um awng ai minung tampui a um awng lai can ah le he khuapui hiang khuate ah mi tampui a um awng ian ilo in hlang lam ramah le nitlak lam tlangham ahkhai mi tampui a um awng lai can ah he bangin Bawipa in hlanlai prophette hmangin a rel awng zohnak i.

Thungailo Manin Saltanghnak

⁸ Bawipa in he thu tu Zechariah hnenah rel i:

⁹ “Hlanlai ah he thupehnakte i minung hnenah pe awng ing; Dikcang niu in thurel tu ilai pakhat le pakhat vumah ninghiohnak le ngaihharhnak nai tu ih.

¹⁰ Hmaitongte le farahte, ning lakai a umtu ramdang mite le a hlawhsam mite cawh tuh lo i si. Cen pakhat le pakhat siatsuah dun tum tuh lo i si, ti ing.

¹¹ Ikhalselai i minungte tu milungruh pawl i; i thupehnak hlun nuam loin hnua lam i hoisan i; amahte bil hu ai zaikhai ngai nuam tlang lo i;

¹² amahte thinlung tu lungto bangin hak i. Kum raipui laiah i rauhla thawn i hlat awnghnak prophette songin thu i zirhhnakte ngai nuam lo manin amahte vumah thin i raw bik i.

¹³ Thu i rel fangin i ngai nuam lo manin anite khai saw a ngen fangin ngai i nuam ve lo i.

¹⁴ Kaimah in hlisia bangin hmut sio ai amahte ling awng lohnak ram dangdang ah piakruai ing. Hemi tluk ram pha tu a songah aisu khai um loin ramkhing ah cang i,” tiin ti i.