Zekhariah 14 - Zanniat Bible

Jerusalem Le Miphunte

¹ Bawipa in thu a khan tuhhnak nia tu nong zo i. Cen Jerusalem khua rok tuhai amahte suthnak thilrite tu na mithmuh ah zem tlang tuh i.

² Bawipa in a miphun hmuahhmuah Jerusalem tawng tuhin kokhawm tuh i. Khuapui tu lang tuh i, inn thilrite sut tuhai nupangte khengkhebel in sualpui tuh i. Minung a hrek tu sal cang tuhin pom tuh i, ikhalselai a dangte tu khuapui an a konteng ahkhai fehpui tuh sek lo i.

³ Cen Bawipa tu feh tuhai ciami miphunte tu, hlanlai ai a tawng awng bangin tawng tuh i.

⁴ Ciafangin Jerusalem ai nisuah lam Olive Mual vumah Bawipa tu ding tuh i. Cen Olive Mual tu nisuah lamin nitlak lam fehhnak in phairawn kaupui in khan hnih in khan tuh i. Mual ai a hrek tu sak lamah thawn tuhai a dang a hrek tu hlang lamah thawn tuh i.

⁵ Olive Mual khan hnih in a khantu ciami phairawn in tlan tuh i si. Judah kumpibawi Uzziah san laiah hlinhlin awng ai ning pupate a tlansuak awng bangin tlan tlang tuh ve i si. Bawipa i Pathian tu hleng tuhai mi thianghlim hmuahhmuah fehpui tuh i.

⁶ Ciami can a hleng fangin khuasik le vur tla ti um tuh lo i.

⁷ Khuathim tikhai um tuh nawn lo i. Zan ah rin sun khuavar ian um tuh i. Zaifangin ciabang cang tuh i, ti cenin Bawipa ian in ling i.

⁸ Cia nia a hleng fangin Jerusalem an nunhnak ti luang tuh i; Ti a hrek tu Tipui Thi ah luang tuhai a hrek tu Mediterranean tifingriat ah luang tuh i. Khuakhal tilo, fur tilo kumpui kum khat song suak tuh ṭiode i.

⁹ Cen Bawipa tu laivum pumpuhluk ai kumpibawi i tuh i. Mi zongzong in Pathian tiin bia tlang tuhai amah ai hming kel in ling tlang tuh i.

¹⁰ Hemi lairam tu a veksen in sak lamah Geba in hlang lamah Romemon tian zawllai in bawn tuh sio i. Jerusalem tu a hiangai ram tahin sang tuh cuang i. Hemi khuapui tu Benjamin kotka in hlanlai ai kotkate a um awnghnak Akil Kotka tihnak tian kau tuh i; cen Hananel ralvil inn in kumpibawi cabit rialhnak hmun tian i tuh i.

¹¹ Ciata ah misenpui tu huphimhnak le hlamuanghnak thawn um tlang tuhai siatsuahhnak zaikhai lau tuh lo i.

¹² Bawipa in Jerusalem a tawngtu miphunte vumah tihikkul urhnak hlengruai tuh i. A nung cingin amahte taksa hmon tuh i; Amahte mit le laite khai hmon tuh sek i.

¹³ Ciafangin Bawipa in amahte thinlauruai in buaitiar tuhai mi zongzong in a hiangai a umtu minung hmuahhmuah pom in pakhat le pakhat tawng dun tuh dekdo i.

¹⁴ Judah mite in Jerusalem ṭan tuhai raltawng tlang tuh i. Miphun tampui ai thilri le lianhnak sut tuh i: sui, ngun le hnikpon siar cawk loin lang tuh i.

¹⁵ A ralte zancam hmunai a ummi sumhnam hmuahhmuah: siphuhte, laakte, kalaukte le kalauk fate vum ahkhai tihikkul urhnak hlengruai tuh ve i.

¹⁶ Cen Jerusalem a tawngtu miphunte songin a tangsunte tu Cungnungber Bawipa khiah kumpibawi i, tiin bia tlang tuhin le Ponhlam Puai bawn tuhin kumsiar in Jerusalem khua ah feh tlang tuh i.

¹⁷ Cungnungber Bawipa tu kumpibawi i, tiin bia tuh a eltu le feh a nuam lotu laivum miphun phun khatkhat um lekhaw amahte ramah ruah si tuh lo i.

¹⁸ Egypt mite in Ponhlam Puai bawn nuam lo ai feh nuam hlah lekhaw Jerusalem feh a eltu le Pathian bia nuam lotute vumai tihikkul urhnak Bawipa ai a hlengruaihnak tu amahte vumah hleng tuh ve i.

¹⁹ Egypt mi ituseh, miphun dang ituseh, Ponhlam Puai bawn nuam hlah lekhaw ciabang cawhhnak tu amahte vumah hleng tuh i.

²⁰ Ciafangin tu siphuhleng duktu siphuhte vumai khaihhnak sengserel vumah rin “Bawipa naihnak, a thianghlim i,” tiin ngan tuh sio i. Biakinn songai rong suanghnak belte tu puleng hmai ai hlengte bangin bungbel cianghlim i tuh i.

²¹ Jerusalem le Judah ram pumpuhluk songai a ummi bel hmuahhmuah Cungnungber Bawipa biakinn hrangah a dangniu in dah tuh i. Cia bel tu hibawlhnak a seltute in a selhnak hibawl sa suanghnak ah hmang tlang tuh i. Cia nia a hleng fangin Cungnungber Bawipa ai Biakinn songah thil zuartu le thil laitu pakhat khai um tuh nawn lo i.