Zekhariah 12 - Zanniat Bible

Jerusalem Luat Tuh I

¹ Israel thula tu Bawipa hnenin hetihin hleng i. Vante a pharhtu Bawipa, lailung semsuah ai minung nunhnak rauhla a petu Bawipa in hetihin rel i:

² “Jerusalem tu khuat pakhat songai cabitti bangin bawn tuh ing; a hiangai miphunte in ding tlang tuhai zuri bangin tlu tuh i. Cen Jerusalem a kulh fangin Judah ram khua dangdang khai kulh tlang tuh sio ve i.

³ Ikhalselai ciami can a hleng fangin Jerusalem tu a rit ngai lungto ah bawn tuhai a dang tumtu miphun tu tuahmawhhnak tawk tuh i. Laivum miphun hmuahhmuah Jerusalem tawng tuhin ṭangkhawm tuh i.

⁴ Ciami can ah a siphuhte tu thinlau tlang tuhai siphuh vumai a totu hmuahhmuah thinlung amruai tuh sio ing. Judah mite tu kilkhawl tuh ing, ikhalselai a ralte ai siphuh mitte khiah cawruai tuh sek ing.

⁵ Ciafangin Judah hinte in, “Bawipa Cungnungber Pathian in Jerusalem ai a umtu minungte hnenah thazang pe i,” tiin pakhat le pakhat rel dun tuh i.

⁶ “Ciafangin Judah hinte tu hampalak mai bang, ihlahle nimden lo ai nimden ro kanghnak vumai bel bangin bawn tuhai a cingkim ai miphun hmuahhmuah siatsuah tlang tuh sio i. Jerusalem khua mite tu khuapui songah him tuh hlen i.

⁷ “David ai tesinfate le Jerusalem mite in ngah tuhhnak tahin thupui tuh sawn loin hmasaber ah Judah ralkapte hnenah Bawipa kaimah in nehhnak pe tuh ing.

⁸ Ciafangin Jerusalem ai a umtute tu Bawipa in hup tuhai amahte lakah mi ṭawnṭai ber rin David tluk in hat tuh i. Ciami David ai tesinfate in Bawipa ai vancungmi bangin konghoi tuh i; amah Pathian bang rori i tuh i.

⁹ Ciafangin Jerusalem a tawngtu miphun hmuahhmuah siatsuah tuh sek ing.

¹⁰ “David ai tesinfate le Jerusalem khua ai midangte tu ninghio ngaihharhnak thinlung le sawngen nuamhnak thinlung thawn dimruai tuh ing. Mipakhat amahte vang ai dawthnak sik tlang tuhai amahte fa naihsun thi ai kah bangin kap tlang tuh i. A fapa upa ber thi ai thinhar lungleng in a um bangin um tlang tuh i.

¹¹ Ciafangin Jerusalem khua songai kaphnak tu Megiddo phairawn ah Hadadrimmon hrang kaphnak bangin roh tuh i.

^12-14 Hemi ram innsang cangcang ah mah hlanlam ṭen lungsia in um tuh i. David ai tesinfa innsangte, Nathan ai tesinfa innsangte, Levi ai tesinfa innsangte, Shimei ai tesinfa innsangte le a dang innsangte khai ciatihin um tuh i. Amahte innsang ṭen ah lungsia in um tuhai pasal le nupang tu hmun dangdang ah lungsia in um tuh i,” ti i.