Tirhthalahle 8 - Zanniat Bible

Saul In Pawlpui Reem I

¹ Cia nia ai panin Jerusalem ai pawlpui khiah cawhhnak a roh ngai in tuar ihang. Nalangte siarlo a dang sangtute hmuahhmuah Judea ram le Samaria ram songah piak tlang sio i.

² Stephen tu Pathian a kihzahtu hrekkhat in vui ai a roh ngai in kap tlang i.

³ Ikhalselai Saul in pawlpuite siatsuah tum i; inn khat hnua inn khat ah feh ai nupang pasal ti lo sangtu hmuahhmuah amahte inn in duk ai thawng ah toh i.

Samaria Ah Thuthangpha Hleng I

⁴ A piaksiomi sangtute khiah khuahacang ah hleng ai amahte hlenghnak hmuncang ah Thuthangpha rel tlang i.

⁵ Philip tu Samaria khuapui ah feh ai cia khua mite hnenah Messiah ai thula rel i.

⁶ Mi tampui in a thurelhnak khiah phatak ngai in ngai tlang ai ngaihsunurkul a bawnhnak khai hmu tlang i.

⁷ Miburpui songin khuasiate cawm ngai in au kongin suak ai mize le kebai mite khai cak tlang i.

⁸ Ciamanin cia khuapui songah anghnak a roh ngai in um i.

⁹ Cia khua ah Simon tihnak mi pakhat um i. Can rai thah ngai a mitkher thiamhnak in Samaria mite lungmu molh sek in zawl de i. Kaimah panpan tiin ruat dun ve i.

¹⁰ Khuapui songai a umtute hmuahhmuah uham naupang ti loin a thu ngai tlang i. Anite in, “Ani tu, ‘Maksak Huham,’ tihnak Pathian ai hathnak i!” ti tlang i.

¹¹ Can raipui a mitkher thiamhnak in amahte thinlung molh sek in a bawn manin anite thu hlun nuamhnak i.

¹² Ikhalselai Philip ai thurelhnak Pathian Ukhnak Thuthangpha le Jesuh Khrih ai thula za fangin sang tlang ai nupang ituseh pasal ituseh baptisma lang tlang i.

¹³ Simon inkhai a thu sang ve i; baptisma a lang hnuaah Philip heh hlun ai ngaihtamkul le ngaihsunurkul thil tampui Philip ai bawnhnak khiah a hmu fangin ani khai a khuaruahhar ve roh i.

¹⁴ Jerusalem ai a umtu nalangte in Samaria mite khai Pathian sang ve ihang ti ling fangin amahte hnenah Peter le John hlat i.

¹⁵ Amahte hnen a hleng kawm fangin sangtute in Rauhla Thianghlim ngah thil tuhin amahte caah sawnget kawm i.

¹⁶ Zaimantifangin Rauhla Thianghlim khiah aisu hnen ahkhai hleng lai lo i; Bawi Jesuh hmingin baptisma a langtute lek lai i.

¹⁷ Cen Peter le John in amahte vumah kut suan in sawngen kawm ai Rauhla Thianghlim ngah tlang i.

¹⁸ Nalangte in amahte kut suan tlang fangin sangtute in Rauhla Thianghlim ngah tlang i ti khiah Simon in hmu i. Ciamanin Peter le John hnenah,

¹⁹ “Kaimah khai amahte vumah kut i suan mi hmuahhmuah Rauhla Thianghlim ngah thil tuhin he mi huham i pe tu ve ih,” tiin ti kongin tangka pe i.

²⁰ Ikhalselai Peter in, “Pathian ai pehnak lehsawng heh tangka thawn lai thil tuhin na ruat manin nang tu na tangka thawn pairal kawm tuhang ih!

²¹ Pathian mithmuh ah na thinlung a dik lo manin kin naperhnak songah tel lo isi, covo khai nai lo isi.

²² Hebang thilpha lo na ruatsualhnak in sir tulai na ngaithiam tuhin Bawipa hnenah sawngen tu.

²³ Zaimantifangin iksikhnak in a dimmi na sualhnak thawng songah a tloktu isi, ti khiah hmu ing,” tiin ti i.

²⁴ Ciafangin Simon in Peter le John hnenah, “Ninghioniu in he ning ponghnak tepawl heh i vumah hleng tuh loin Pathian hnenah saw i nget kawm tu ih,” tiin ngen i.

²⁵ Pathian thurel kawm ai amahte hmuhnak le tawkhnak a rel kawm hnuaah Peter le John tu Jerusalem ah let kawm leh i. A let kongin Samaria peng khuatenau tampui ah Thuthangpha rel kong betbo i.

Philip Le Ethiopia Bawi Ai Thu

²⁶ Bawipa ai vancungmi in Philip hnenah, “Pai tulai hlang lamah Jerusalem an Gaza fehhnak lampui ah feh tu,” tiin ti i. (Tun tu cia lampui tu hmang nawn lo i).

²⁷ A tihnak bangin ralring ai Philip tu feh i. Cialak fangin Ethiopia mi pakhat amahte khua lamah a tlungtu khiah tawk i. Ciapa tu tilretmi pa i ai Ethiopia kumpibawi nu ai naihnak sumsaw hmuahhmuah a kilkhawltu bawi i. Ani tu Jerusalem ah Pathian bia tuhin feh i.

²⁸ A tlung lam fangin a siphuhleng vumah to ai prophet Isaiah laibu siar phetpho i.

²⁹ Rauhla Thianghlim in Philip hnenah, “Feh tulai khia siphuhleng hiangah nong tu,” tiin ti i.

³⁰ Philip in hnawh ngiarngo ai prophet Isaiah laibu siar i ti ling i. Philip in, “Na siarhnak heh a sullam ling aw sim” tiin zawt i.

³¹ Ciapa in, “Aisu tal in i relfiang lo fangin tu akontih in ling thil tuh heh ing?” tiin sawn i. Cen Philip khiah a siphuhleng vumah to tuh ve in sawm i.

³² A siarhnak Lai Thianghlim tu a hnia lamai bangin i: “Amah tu rek tuhhnak tuu bangin fehpui tlang ai, Tuu faniu a hmul met laiah ai loin a um bangin, pong loin dap niu in um i.

³³ Zohsuam nautathnak tuar i, ṭantu aisu khai nai lo i; Lailung in a nunhnak lang sah manin, A sen mite rel tuh pha aisu khai um lo i,” tiin um i.

³⁴ Ciapa in Philip khiah, “I rel tu! Prophet Isaiah ai ponghnak heh aisu ai thu heh i? Amah ai thu maw, midang ai thu i?” tiin zawt i.

³⁵ Ciafangin Philip in ciami Lai Thianghlim tluan ai panin Bawi Jesuh ai Thuthangpha khiah rel sio i.

³⁶ Ciatihin feh kawm zianzo ai ti umhnak ah hleng kawm i. Ciapa in, “Heta ah ti um i. Baptisma co tuhin i dawntu ziang um i,” ti i.

³⁷ (Philip in, “Na thinlung veksen in sang lesikhaw baptisma co tuh isi,” ti i. Ciapa in, “Sang ing; Jesuh Khrih tu Pathian ai Fapa i tiin sang ing,” ti i).

³⁸ Ciami Ethiopia pa in a siphuhleng comruai ai Philip thawn ti songah theuh kawm ai Philip in baptisma pe i.

³⁹ Ti songin a suak kawm fangin Bawipa ai Rauhla in Philip khiah lang lio i. Cia bawi in Philip tu hmu nawn lo i; ikhalselai ang ngai in a inn ah tlung i.

⁴⁰ Philip tu Ashdod ah hleng i; Ceasarea ah feh ai lam tluan khua cangah Thuthangpha rel betbo i.