Tirhthalahle 7 - Zanniat Bible

Stephen Ai Thurelhnak

¹ Cen Suangbawi Sang in Stephen hnenah, “Hetih ai amahte tihnak tu thu ngaingai im?” tiin zawt i.

² Ciafangin Stephen in, “U le nau, nu le pate, i ngai tu ih! Kin pu Abraham heh Haran ah um tuhin a feh hlanah Masopotamia ramah Pathian ai songlawihnak a hnenah lar ai,

³ “Na songkhat le na ram hlum tulai i hmuh tuhhnak ramah feh tu,” tiin ti i.

⁴ Ciatihin a ram in suak ai Haran khua ah um i. A pa thi hnuaah tunai ning umhnak ramah Pathian in thawnruai i.

⁵ Cialai ah he ram heh Pathian in Abraham hnenah amah bul ai tuhin a fip niu khai pe lo i; ikhalselai a hnenah pe tuhin thukham ai he ram heh nangmah le na tesinfate ai tuh i, tiin ti i. Pathian in hetih ai thukhamhnak a bawn laiah Abraham tu fate nai lo i.

⁶ Pathian in a hnenah, “Na tesinfate tu ramdang ah um tuh i; cia ramah sal cang tuhai kum za li song rimsu tuar tuh i.

⁷ Ikhalselai amahte na ruaihmi miphun vumah thukhanhnak nai tuhai ciahnua fang ian in cia ram in suak tuhai he hmunah kaimah i bia tuh i,” tiin ti i.

⁸ Cen Pathian in Abraham hnenah zarhtanhnak dan heh a thukham hnikhnaihhnak ah pe i. Ciamanin Abraham in a fapa Isaac a te hnua ni riat fangin zarhtan i. Isaac in a fapa Jacob ai zarhtan ai Jacob in a fapate hlaihnih zarhtan i. A fapate hlaihnih heh kin phun sentu kin pupa mi hmingthang pawl i.

⁹ “Jacob ai fapate in a naupa Joseph iksik ai Egypt ramah sal cang tuhin zuar i. Ikhalselai Pathian a hnenah um ai,

¹⁰ a harsahnak songin himniu in hoisuak i. Egypt kumpibawi hmaiah a ding fangin Pathian in Joseph heh ziaza mawi le fimhnak pe ai Egypt kumpibawi in a ram pumpui le a innsang vumah uktu bawi perruai i.

¹¹ Canaan ram le Egypt ram songah rian tlung ai mizapui caah harsahnak tampui hleng i. Kin pupate inkhai rong ngah thil lo i.

¹² Jacob in Egypt ramah rong um i ti a za fangin a fapate, kin pupate hlat i; hemi tu Egypt a hlenghnak hmasaber i.

¹³ A vel hnihhnak ai Egypt ram a hleng fangin a ute hnenah Joseph tu amah lala phuang ai Egypt kumpibawi in Joseph ai songkhatte heh ling ngah i.

¹⁴ Ciamanin Joseph in a pa Jacob le a songkhatte hnenah Egypt ramah vai tuhin thucah i. Amahte veksen in minung sawmsarih le pa nga i.

¹⁵ Cen Jacob tu Egypt ramah feh i; ciata ah amah le a fapate thi zo sek i.

¹⁶ Amahte luang heh Shechem ah phur ai Abraham in Hamor miphun hnenin tangka in a lai awnghnak hlanmual ah phum i.

¹⁷ “Abraham hnenah Pathian ai thukhamhnak a khim can a nong betbo fangin Egypt ramai a umtu kin phunpuite tu tampui in pung i.

¹⁸ Hnuataber ah Joseph ai thula ling awng lotu kumpibawi pakhat in Egypt ram uk i.

¹⁹ Kin pupate khiah zohsuam ai cawh i; a fate khai thi tuseh tiin inn songin sumpua ah lonruai i.

²⁰ Cialaitak in nausen niu mawi roh Moses tihnak te i. Moses tu inn ah hla thum song phatak niu in cawm tlang i.

²¹ Hnarpua ah lonhnak a tuar fangin kumpibawi ai fanu in khul ai, a fapa can in dom ai kilkhawl i.

²² Egypt mi ai fimhnak hmuahhmuah zir sio ai a ponkam le a bawnhnak in mi menma ilo i ti larruai i.

²³ Moses tu kum sawmli a khim fangin a phunpui Israel mite akontih in nung ini, ti hmu nuam in leng i.

²⁴ Cialai ah a phunpui Israel mi pakhat khiah Egypt pa in a reem khiah a hmu fangin bawm ai phuzul in Egypt pa heh rek lio i.

²⁵ (Pathian in anite luatruaitu tuhin i hmang tuhai i phunpuite inkhai lingthiam tuh i, tiin ruat napui lingthiam tlang lo i).

²⁶ A thangha fangin Israel mite pahnih tawng dun lak hmu lehthio ai rem tum i. ‘Unaute, i ngai tu ih! Ning tu mi phunkhat Israel mite veve i si! Zaimanin hetihin tawng dun i si?’ tiin ti i.

²⁷ Ikhalselai a phunpui a zohsuamtu pa in Moses khiah tul teu ai, “Aisu in kin vumah uktu le thukhantu ah na bawn i?

²⁸ Mania ai Egypt pa na rek bangin i rek tum isim?’ tiin ti i.

²⁹ Ciami khiah Moses in a za fangin Egypt ram in tlan ai midian ramah um i. Ciata ah fapate pahnih nai i.

³⁰ “Kum sawmli a liam hnuaah Sinai Mual hiang hampalak ramkhing ah hamphung maiko songin Moses hnenah vancungmi pakhat lar i.

³¹ Ciami mai heh Moses in a hmu fangin a multing ai sik hliah tuhin hamphung mai hiangah kawi i. Ikhalselai Bawipa ai aw za ai,

³² ‘Kai tu ning pupate ai Pathian, Abraham ai Pathian, Isaac le Jacob ai Pathian ing’ tiin ti i. Moses tu thinlau in hlawng ai a sik khai sik ngam lo i.

³³ Bawipa in, “Na kedawl hawk tu, zaimantifangin na dinhmun heh hmun thianghlim i!

³⁴ Egypt ramai i minungte tuarhnak le rimsuhnak hmu ing. Amahte aihramhnak za ai luatruai tuhin zuktolh ing. Kawi tu, Egypt ramah na hlat tuh ing,’ tiin ti i.

³⁵ “Moses tu Israel mite ai hnawl awng mi pa i. ‘Aisu in kin vumah uktu le thukhantu ah na bawn heh i?’ tiin ti tlang awng i. Hamphung mailiau songin a hnenah a lartu vancungmi ai bawmhnak thawmin Pathian in Israel mi uktu tuhin le luatruaitu tuhin a hlathnak mi i.

³⁶ Egypt ram in Israel mite tu amah in hoisuak ai Egypt ram, Tipui San le hampalak ramkhing lakah kum sawmli song thil ngaihsunurkul le ngaihtamkul tampui bawn i.

³⁷ Moses in Israel mite hnenah, ‘Pathian in ning hnenah kaimah i hlat bangin prophet hlat tuhai ciami pa tu ningmah ai miphun songin i tuh i,’ ti ai a titu pa i.

³⁸ Amah tu Israel mite ramkhing ai a um laiah amahte lakah a tel ṭiotu pa i; Kin pupate lakah um awng ai Sinai Mual ah vancungmi ponkam a zatu le mizapui hnenah a um awngtu i; cen Pathian thu nung kin hnenah a hlengthilhnak tuhin a cosang awngtu i fawn i.

³⁹ “Ikhalselai kin pupate in amah hlun nuam lo i. Hnawl tlang ai Egypt ramah let nuam sawn i.

⁴⁰ Ciamanin Aaron hnenah, ‘Kong kin hoitu tuhin khuavang tampui in kin bawt tu. Egypt ram in kin hoisuaktu Moses vumah ziang cang ini ti ling nawn bang hlah sing,’ tiin ti tlang i.

⁴¹ Ciatih imanin kawlpawcang hmel cuang in a lim bawn ai hibawlhnak sel in amahte kut ai bawn fawmhnak caah upathnak puai bawn dekdo i.

⁴² Ciamanin Pathian in zangtak ai prophette laibu songai nganciahnak bangin van ai arsite biaruai zel i. Ciami laibu songah: ‘Israel mite, kum sawmli song ramkhing ah sumhnam ro tlang ai hibawl ning selhnak khai Kaimah hnenah ning bawnhnak ilo i.

⁴³ Ning phurhnak hlam tu Molech khuasia ponhlam i. Ning kenghnak milim tu Ning khuavang Rephan ai arsi lim i. Anite tu bia tuhin ning bawnhnak khuavang limte i. Ciamanin ning tu Babylon kan lamah ning hnawt tuh sek ing,’ tiin um i.

⁴⁴ “Kin pupate in Thukhamhnak Ponhlam tu nelrawn ramkhing ah nai tlang ṭiode i. Ciami Ponhlam tu Pathian in Moses hnenah a larruaihnak pianzia bangin sa awnghnak i.

⁴⁵ Leh hnuaah kin pupate in cia ponhlam heh a pupate hnenin lang ai Joshua thawn a feh tlang fangin fehpui kong betbo i; hmai nor ai Pathian in a umciahnak miphunte khiah hnawt sah cekco ai cia ramte heh lang betbo i. Ponhlam tu ciata ah David ai san tian um awng i.

⁴⁶ Cen David in Pathian thinkhinghnak co ngah ai Jacob ai Pathian umhnak tuh inn pakhat sak tuhin Pathian hnenah ngen i.

⁴⁷ Ikhalselai inn a satu ngaingai tu Solomon i.

⁴⁸ “Ikhalselai Cungnungber Pathian tu minung kut ai bawnhnak inn songah um lo i; Prophet in hetihin rel i:

⁴⁹ ‘Vancung heh i tohkham i ai, Laivum heh i kefot hmun i, tiin Bawipa in ti i. I caah ziang bang inn i sak tum i si? I um nuamhnak hmun tu a konteng i?

⁵⁰ Hemi thil hmuahhmuah a bawntu heh Kaimah ilo ing maw?’ ti i.

⁵¹ “Mi thinlian pawl, ning thinlung a ruh ze i! Ning thinlung tu Pathian ling lo thinlung i! Pathian thu ngai tuhin ning nangong ze lawmlam i! Ningmah heh ning pupate bang thotho i si: Rauhla Thianghlim engsan ṭiode i si!

⁵² Ning pupate ai reem lomi prophet pakhat tal um awm? Pathian ai a felmi cengfa hleng tuh i tiin khuahlanlai in a phuang awngtu Pathian ai palaite rek awng i. Tunah ciami a felmi a Cengfa tu ningmah in zuar ai rek i si!

⁵³ Vancungmi in a kenghnak Pathian ai dan a hlun lotu heh ningmah thotho i si,” tiin ti i.

Stephen Rekhnak

⁵⁴ Council upate in Stephen thurelhnak za fangin thinraw ze ai kamriat tlang burhbo i.

⁵⁵ Ikhalselai Stephen tu Rauhla Thianghlim in dim ai vancung a hon sik fangin Pathian songlawihnak le Pathian kiahhan lamai a dingtu Jesuh khiah hmu i.

⁵⁶ Ciafangin, “Sik tu ih! Vancung dawngkham hong ai Pathian kiahhan lamah Mi Fapa a ding hmu ing!” tiin ti i.

⁵⁷ Ciafangin Council upate tu amahte bil khiah hup in aw naih tawp in au tlang ai Stephen khiah nem i.

⁵⁸ Khuapui songin duk ai lungto in sep i. A septute in a silhponte heh Saul tihnak tlangval pa hnenah hlup i.

⁵⁹ Lungto ai sep thliahthlo laitak in Stephen in Bawipa ko ai, “Bawipa, Jesuh, i rauhla lang tu hram hang law!” tiin au i.

⁶⁰ A khuk caicin in, “Bawipa, amahte sualhnak hih ngio malaw!” tiin cawm ngai in au i. Ciatihin a au ben sawng fangin a haihawh bo i.