Tirhthalahle 6 - Zanniat Bible

Bawmtu Upate Pasarih

¹ Can a rai hlanah hnuahlunte tam amam ai Judah mite le Greek pong in a pongtu Judah mite lakah thubuai um i. Greek pong a hmangtu Judah mite in nisiar amahte kulhnak laihnak tuhin tangka zem tlang fangin hmaitongte in a co tuh zah co lo i, tiin thu um i.

² Ciamanin nalangte hlaihnih in sangtute hmuahhmuah heh hmunkhat ah ko ai, “Tangka thula tawlrelhnak ah Pathian thurel ngulsul lesingkhaw pha tuh lo i.

³ Ciamanin u le naute, ningmah lakah Rauhla Thianghlim le fimhnak in a dimmi minung pasarih ril tu ilai anite heh he thula tawlreltu ah dah tuh ising.

⁴ Kin tu kin can veksen in sawngenhnak le thurelhnak ah hmang tuh i ing,” tiin ti tlang i.

⁵ Nalangte hlaihnih ai ruathnak khiah amahte veksen in lungkhim tlang ai ciatihin sanghnak le Rauhla Thianghlim in a dimmi Stephen, Philip, Prochoras, Nicanor, Timon, Parmenas Antioch khua in Judah biahnak ah a luttu Gentile mi Nikolaus khai i.

⁶ Amahte pasarih tu nalangte hnenah fehpui ai amahte lu vumah kut suan tlang ai sawnget i.

⁷ Cen Pathian thu tu zai amam i. Hnuahlunte khai Jerusalem khua songah pungzai amam ai suangbawite tampui in amahte sanghnak khiah pompui ve i.

Stephen Pomhnak

⁸ Pathian in hmuifu tampui pe ai a thawmlian huham thawn a dimmi Stephen in mizapui lakah ngaihsunurkul le ngaihtamkul bawn i.

⁹ Ikhalselai Salsuak pawl songin Stephen thawn thu eldunhnak suak ai cia Stephen thawn thu elduntute lakah Cyrene khua le Alexandria khua in a hlengtu Judah mite khai tel i. Cen Cilicia le Asia ramai Judah mite khai tel ve i.

¹⁰ Ikhalselai Stephen tu Rauhla in fimhnak pe ai a pong fangin aisu inkhai el ben lo i.

¹¹ Ciamanin mi hrekkhat khiah, ‘Moses le Pathian thangsiat in a pong za i ing,” tiin ti tuhin nawhthuh pe i.

¹² Ciatihin mizapui, upate le Danthiam mite tu thinraw thai in forh i. Stephen tu pom ai Council upate hmaiah suahpui i.

¹³ Cen thudon hluktu tuh pawl fehpui ai, ‘Hemi pa heh kin Biakinn Cianghlim le Moses ai dan khai nautat zohsuam in pong ṭiode i.

¹⁴ Hemi Nazareth mi Jesuh in he Biakinn heh bal tuh sio ai Moses ai san in kinmah ai san tian a umhnak kin pupate ai dan khai thleng tuh sio i, tiin a pong lak za i ing,” ti i.

¹⁵ Council pumkhawmhnak songah a teltu hmuahhmuah in Stephen sik tlang ai a mithmai tu vancungmi ai mithmai bangin hmu tlang i.