Tirhthalahle 3 - Zanniat Bible

Ke Zemi Cak I

¹ Nikhat ah Peter le John tu sawngen can zan lam nazi pathum fangin Biakinn ah feh kawm i.

² Ciafangin Kotka mawi tihnak ah a suahkeh in ke a zemi pa pakhat um i. Nisiar in Biakinn ah a kawitute hnenin tangka ngen tuhin cia kotka ah mite in dah de i.

³ Peter le John lut kawm a hmu fangin thil pakhatkhat pe tuhin ngen i.

⁴ Phantakniu in sik kawm ai Peter in, “Kin sik tucuk!” tiin ti i.

⁵ Ziang ngah tuh ini ing, tiin umlam roh in sik i.

⁶ Cen Peter in, “Tangka na pe tuh zaikhai nai lo ing; ikhalselai i naihnak na pe ing: Nazareth mi Jesuh Khrih hming in tho tulai vak tu,” tiin ti i.

⁷ Cen a kiahhan lam kut in awh ai thoruai i. Cia sawngpah in ciami pa ai ke le a titiruh kemitte cak lehsal i.

⁸ Ani khai tho vut ai amah niu in ding ai vak ben i. Cen Peter le John hnenah Biakinn songah lut ve i. Dawk dekdo ai a vak kong in kik zutzo in Pathian thangphat i.

⁹ Ciatih ai a vak thil le Pathian a thangphat khiah mizapui in hmu tlang ai,

¹⁰ Kotka mawi ai tangka ngen in a um ṭiotu i, ti khiah ling fangin a vumai thil a hlenghnak manin khuaruahhar tlang ai aican tlang roh i.

Biakinn Songah Peter thurelhnak

¹¹ Ciapa tu Solomon saphmai tihnak ah Peter le John hnenah a um khiah hmu fangin mizapui tu khuaruahhar in anite hnenah dawp tlang i.

¹² Ciami khiah Peter in a hmu fangin anite hnenah, “Aw i phunpui Israel mite, Zaimanin he thu ah khuaruahhar in kinmah lehlam mitkhep loin kin sik i si? Hemi pa a vak thil heh kinmah ai hathnak le Pathian daihzawng in a nung bentu kin imanin a canghnak vuah tlang i sim?

¹³ Abraham, Isaac le Jacob ai Pathian, kin pupate ai Pathian in amah ai songlawihnak heh a cengfa Jesuh hnenah pe zo i. Ikhalselai ning in ani tu thunaitu kut songah pe i si. Pilat in hlat tuhin a relciahnak rin amah mithmuh rori ah hnawl i si.

¹⁴ Jesuh tu mi thianghlim le mipha bik inapui ningmah in hnawl i si; cia hlaiah Pilat hnenah ninghio ngen tlang ai mirektu heh hlat tuh sawn in ruai i si.

¹⁵ Ningmah in nunhnak ah mi a fehpuitu khaih rek i si; ikhalselai Pathian in thihhnak in thoruailehsal ai kinmah heh ciami a lingpuitute i ing.

¹⁶ Ciami Jesuh hming ai huham manin he ke zemi pa heh cakhnak ngah thil i. Ning hmuhnak le ning zahnak heh a hming sanghnak thawmin bawnhnak i. Ning veksen in ning hmu sio bangin Jesuh ah sanghnak in he pa heh cakruai i.

¹⁷ Ciamanin u le naute, ningmah le ning hotute in Jesuh vumai ning bawnhnak heh ning ling lo manin ning bawnhnak i ti ling ing.

¹⁸ Pathian in khuahlanlai pui ah a rilmi Messiah tu harsahnak tuar tuh i tiin prophette hnenah phuang zo i; ciami heh tunah hetihin khim ihang.

¹⁹ Sual sir tu ilai Pathian hnenah let tu ih. Ciatih ilekhaw ning sualhnak ning ngaithiam tuh i. Ciatihin ti le i sikhaw,

²⁰ Bawipa hnenin rauhla hathnak can hleng tuhai ning caah a ril cia mi Messiah tihnak Jesuh heh ning hnenah ning pe tuh i.

²¹ Pathian in hlanlaipui ai a thianghlim prophette hnenin a phuang cia bangin zaizongza a thar ai sem thar can a hleng hlanlo Jesuh tu vancung ah um tuh i.

²² Zaimantifangin Moses in, “Bawipa ning Pathian in kaimah i hlat bangin ning miphun prophet pakhat ning hnenah hlat tuh i. Amah ai ning relhnak hmuahhmuah hlun kul tuh sio i si.

²³ Ciami prophet a hlun nuam lotu heh Pathian miphun songin hnawthnak tuar tuhai siatsuahhnak tawk tuh i,’ ti i.

²⁴ Cen thuthan tuh a naitu prophette, prophet Samuel le amah hnua ai a hlengtu prophette inkhai, amahte veksen in tun dungso ai a canghnak heh rel cia ṭen zo i.

²⁵ Prophette hnenin Pathian ai thukhamhnak tu ningmah caah i ai Pathian in ning pupate hnenah a bawnhnak thutiam a kawmtu ve i si. Pathian in Abraham hnenah, “Na tesinfate songin laivum ai mi zongzong hmuifu pe tuh ing,’ tiin ti i.

²⁶ Ciatih imanin Pathian in aisu bang khai ning phatlohnak in let ai hmuifu ning pe thilhnak tuhin a rilmi a Cengfa tu a hmasaber ah ning hnenah hlat i,” tiin ti i.