Tirhthalahle 26 - Zanniat Bible

Paul In Agrippa Hmaiah ṭanghnak

¹ Agrippa in Paul hnenah, “Na thula rel thai ihang si,” tiin ti i. Paul in a kut tung ai a ṭanhnak thu hetihin rel i:

² “Kumpibawi Agrippa, tunnia na hmaiah Judah mite ai sual i hlukhnak thute sawn ve thilhnak can i ngah manin mi bawngpha ngaingai ing tiin ruat dun ing.

³ Judah mite ai dan hmuahhmuah le thu eldunhnakte a lingtu sio na imanin mi bawngpha in i ruat dun cuanghnak i. Thinsau niu in i ngai tu hram law, tiin ninghio na ngen ing.

⁴ “Judah mite hmuahhmuah in i nuncandan tu i naupang lai in i ling sio i. I nuncan khuasadan thulate, a hmasa ah kaimah ai miphun hnenah, a hnuata ah Jerusalem ah, a veksen in amahte ling siohnak i.

⁵ I thula heh amahte rel nuamhnak ilekhaw rel tuseh, amahte ling ṭiohnak i. A hampan in kai tu kin biahnak lamah a fek ngai Farasite ai songtel pakhat ing.

⁶ Tunnia heta ah i thurel tuhin i dinghnak khai Pathian in kin pupate hnenai thukham a bawnhnak khiah umlamhnak nai manin ing.

⁷ Ciatih ai umlamhnak i naihnak heh kin miphunte hlaihnih in Pathian khiah a sun a zan in a bia awng lai ai umlamhnak a nai awnghnak thotho i. Ciami umlamhnak manin Kumpibawi, Judah mite in taza i cuai khiah i!

⁸ Heta ai a hlengtute, Pathian in mithi thoruai i ti khiah zaimanin cang thil lo tiin ruat tlang i si?

⁹ “Nazareth mi Jesuh ai thula tu i tawng thil zah in tawng tuh ing, tiin kaimah rori in i ruat awnghnak i.

¹⁰ Ciami tu Jerusalem khua ah i bawnhnak awng hnelhno i. Suangbawi upate hnenin thunaihnak ngah ai Pathian minungte tampui thawng ah toh ing. Rek tuhin amahte thu rel fangin i lungkhimhnak larruai in i kut tung ve de ing.

¹¹ Vel tampui synagogue song rori ah reemruai de ai amahte sanghnak in com tuseh tiin i zuam thaitawp in zuam awng ing. Amahte vumah thin i raw ze manin cawh tuhin ramdang khuate tianin hleng awng ing.

A Thinthlenghnak Thu Rel I

¹² “Ciatihin anite reem nuam rori manin Suangbawi upate hnenin thunaihnak lang ai Damascus khua ah feh ing.

¹³ Aw kumpibawi pa, sun laivar ah Damascus lampui ai i vak hnelhno teng fangin ni tahin a tleu sawn tleuhnak van in hleng ai kaimah le i fehpuite ai cingkim kin det liang i.

¹⁴ Kin veksen in laipua lakah kin tlu sek ai Hebrew pong in aw pakhat za ai, ‘Saul, Saul, Zaimanin i reem hnelhno isi? Kawlpawcang in a naitu pa ai fungkek saih lekhaw amah a urruai dun sawn bangin nangmah urruai dun sawn isi,’ tiin ti i.

¹⁵ ‘Bawipa, aisu isi?’ tiin zawt ing. Cen Bawipa in, ‘Na reemhnak Jesuh ing.

¹⁶ Tho tulai ding tu. Kaimah i ruaih tuhin na ril i nuam manin na hnenah lar ing. Tunnia ai na i tawkhnak thu le hmai lamah i hmuh tuhhnak thute heh midang hnenah rel tulai i thulingtu i tuh isi.

¹⁷ Nang tu Israel mi le Gentile mite hnenah na hlat tuhai amahte kut songin na hup tuh ing.

¹⁸ Amahte mit thakruai tuhai thimhnak in tleuhnak ah, Satan hathnak songin Pathian hnenah letruai tuh isi. Ciatihin kaimah i sanghnak thawmin amahte sualhnak khai ngaithiam in um tuhai Pathian ai thianghlimruai mite lakah tel tuh ve isi,’ tiin ti i.

Paul In A Naperhnak Rel I

¹⁹ Ciatih imanin, Kumpibawi Agrippa, van in larhnak i hmuhnak ai thu khiah el thil lo ing.

²⁰ Hmasaber ah Damascus khua ah, cen Jerusalem ah, cia hnuaah Judea ram song hmuahhmuah le Gentile mi hnen ahkhai feh ai, ‘Ning sual sir tu ilai Pathian hnenah let tu ih; cen ning sual sir larruaihnak thil khiah bawn tu ih,’ tiin thurel betbo ing.

²¹ Ciatihin i ti manin Judah mite in Biakinn songah i pom ai a rek tianin tum i.

²² Ikhalselai tunnia tian ah Pathian in i bawm ai tunah, ningmah nauta tilo upa tilo in ning veksen hmaiah i hmuhnak thu rel ing. I relhnak thu heh Moses in ituseh, prophette in ituseh cang tuh i tiin rel cia awnghnak i.

²³ Ciatih ai amahte relhnak heh zai i tifangin: khuatleu nunohnak thu tu Judah mi le Gentile mite hnenah than tuhin Messiah in tuarhnak tawk tuhai, cia hnuaah thihhnak in a nung leh hmasabertu i tuh i, tihnak i,” tiin ti i.

²⁴ Ciatihin Paul in amah ṭanhnak thu a rel ben fangin Festus in, “Paul, na voi zo ihang! Na zir tam zehnak in na voiruai zo ihang!” tiin auh i.

²⁵ Ciafangin Paul in, “Bawipa Festus, i voi lo nakhaw! Lungfim niu in thutak rel ing!

²⁶ Aw Kumpibawi Agrippa, na hnenah suphnak nai lo ralpha ngai in pong ing; zaimantifangin nang tu he thu hmuahhmuah a lingtu sio isi. Pakhat khai pelh loin hnikhnaih tuh sio in na um ing, zaimantifangin hetih ai i relhnak tepawl heh aisu inkhai ling lohnak, a ningnawi ah thuphnakte ilo i.

²⁷ Kumpibawi Agrippa, prophette sang aw sim? sang isi, ti na ling ing,” tiin ti i.

²⁸ Agrippa in Paul khiah, “Hemi can comniu songah Khristian i cangruai tum isim?” tiin ti i.

²⁹ Paul in, “A can comniu ah ituseh, a can saupui ah ituseh, nangmah le tunnia heta ah i thu a ngaitu hmuahhmuah heh ning veksen in, he i kut ai thir cikcin siarlo, kaimah bang cang sio isilai tiheh Pathian hnenai i sawngenhnak i,” tiin ti i.

³⁰ Cen Kumpibawi, Mangki Bawi, Bernis le midangte khai tho tlang ai,

³¹ feh hnuaah pakhat le pakhat, “Hemi pa tu rek tlak le thawng toh tlak sualhnak nai bang hlah e,” tiin ti dun i.

³² Cen Agrippa in Festus hnenah, “Rome kumpibawi hnenah a thu hlen hlah selai, he pa heh hlat thil lio napui i!” tiin ti i.