Tirhthalahle 25 - Zanniat Bible

Rome Kumpibawi Hnenah A Thu Hlenhnak

¹ Mangki Festus khiah cia ram a hlenghnak ni thum hnuaah Ceasarea in Jerusalem ah feh i.

² Ciata ah Suangbawi upate le Judah mi hotute in Paul vumah sual hlukhnak thulate rel tlang i.

³ Paul khiah lamlak ah rek nuam manin Jerusalem ah fehpui tuhin Festus hnenah ngen i.

⁴ Festus in, “Paul tu Ceasarea khua ai thawngtotu i ai kaimah khai Ceasarea ah let cing tuh ing.

⁵ Ning hotute khiah kaimah thawn Ceasarea ah kawi tlang tu selai hemi pa in sualhnak nai lekhaw rel tuseh,” tiin ti i.

⁶ Festus tu anite hnenah ni riat ihlahle ni hra dung a cam hnuaah Ceasarea ah tlung i. Inn a hleng thangha ah Festus tu a thurelhnak zung songah to ai Paul koih tuhin thupe i.

⁷ Paul hleng fangin Jerusalem an a kawitu Judah mite tu a hiang cingkim ah ding tlang bial ai a roh ngai in sual hluk tlang i; ikhalselai amahte sual hlukhnak tu a dik rori i tiin larruai ben lo i.

⁸ Ikhalselai Paul inkhai, “Judah mi dan thu ah ituseh, Biakinn thu ah ituseh, Rome kumpibawi ai thu ah ituseh, sualhnak zaikhai nai lo ing,” tiin ti i.

⁹ Ikhalselai Judah mite hnenin mithmai pha ngah a nuam manin Festus in Paul khiah, “Jerusalem ah feh in ciata ah i hmaiah taza na cuai selai lung na khim tur im?” tiin zawt i.

¹⁰ Paul in, “Rome kumpibawi ai thurelhnak hmaiah tun heh ding ai heta ah taza i cuai tlang tuseh. Nangmah in na linghnak bangin Judah mite hnenah thilsual zaikhai bawn lo ing.

¹¹ Dan bal ai thihhnak tlak sualhnak i bawnhnak um lekhaw luat inglai tiin ngen lo ing. Ikhalselai amahte sual hlukhnak ah thudik zaikhai um hlah lekhaw aisu inkhai Judah mite kut ah i hlengpui thil tuh lo i. Rome kumpibawi hnenah a thu hlen tuh ing!” tiin ti i.

¹² Cen Festus in amah ruathnakpetute thawn tawk dun tlang hnuaah Paul khiah, “Rome kumpibawi hnenah thu na hlenpui bangin a hnenah feh tuh isi,” tiin ti i.

Agrippa Le Bernis Hnenah Thurel I

¹³ Cia hnua can tawkfang a rai hnuaah Kumpibawi Agrippa le Bernis tu Festus hnuksat ai pon tuhin Ceasarea khua ah tlawng kawm i.

¹⁴ Ni tam thah cam hnuaah Festus in Paul ai thula tu kumpibawi Agrippa hnenah rel i, “Felix in thawngtoh awng mi pa pakhat Ceasarea ah um i.

¹⁵ Jerusalem ah khual i tlawng awng laiah Judah mi suangbawi upate le a dang upate in tazacuai tlang ai amah heh rek tuhin ngen i.

¹⁶ Ikhalselai i relhnak tu: Kin Rome mite in mi pakhatkhat tazacuai fangin tazacuaitu thawn hmaiton in amah a ṭanhnak thurel can a nai ve hlan ahcen tazacuai mi pa khiah anite kut songah pe heh kin dan ilo i, tiin ti ing.

¹⁷ Heta ah kawi tlang fangin ni khat khai iang loin a thangha rori ah thurelhnak zung ah to ai, ciami pa heh koih tu ih, tiin thupe ing.

¹⁸ Amah daih lotute tu ding ai thurel i, ikhalselai sual hluk natu tiin i ruat tluk in hluk tlang lo i.

¹⁹ Amahte biahnak thu le Jesuh tihnak pa thi ai Paul in, ‘Nung leh i,’ tiin a relhnak manin thu eldunhnak nai tlang awng i.

²⁰ Hemi thula ah akontih in thufiang ling thil tuh ing, tiin i thinlung khancat thil lo ing; ciamanin Paul tu Jerusalem ah feh in anite ai sual na hlukhnak heh ciata ah rel selai lung na khim ni tur im?” tiin zawt ing.

²¹ Ikhalselai Paul in a thu hlen tuhin ngen ai amah khai kil rih tuhin le Rome Kumpibawi in a thu rel sah tuhin ngen i. Ciamanin amah khiah Rome kumpibawi hnenah i kuat thil hlan song tu ralkapte in kil tuhin thupe ing,” tiin ti i.

²² Agrippa in Festus heh, “Ciami pa ai thurelhnak tu kaimah rori in za i hiam i,” tiin ti i. Festus in, “Thangha za tuh ngawn isi,” ti i.

²³ A thangha fangin Agrippa le Bernis tu songlawi ngai in, taikhawmhnak khan songah lut kawm ai ralbawi upa ber pawl le khuasong upate in hlun i. Cen Festus ai thupehnak bangin Paul koih tlang i.

²⁴ Festus in, “Kumpibawi Agrippa le heta ai a hlengtute: Hemi ning hmuhnak mipa heh Judah mi hmuahhmuah in, heta ah ituseh Jerusalem ah ituseh, amahte daih lohnak thu i hnenah hlengruai i. Nung tlak lo i, ti tianin au tlang i.

²⁵ Ikhalselai rek tlak sualhnak a bawnhnak hmu thil lo ing. Cen amah in Rome kumpibawi hnenah a thu hlen manin ciata ah kuat tuhin a thu relcat zo ing.

²⁶ Ikhalselai Rome kumpibawi hnenah a thula ngan tuh felfai in ling ngial lo ing. Ciamanin tunin ning hnenah koihruai ing. Kumpibawi Agrippa, nangmah hmai rori ah suahpui ing. A thula i zong hnuaah ngan tuh zaital nai ni ing maw, ti i nuam manin i.

²⁷ Zaimantifangin kaimah ca hrimhrim ah thawngto pakhat thu tazacuaidunhnak thula zaikhai fiangniu in ngan loin kuat tu mawi tuh lo i,” tiin ti i.