Tirhthalahle 24 - Zanniat Bible

Judah Mite In Paul Tazacuai I

¹ Ni nga hnuaah Suangbawi Sang Ananias tu upa hrekkhat le danthiam Tertullas thawn Ceasarea ah feh i. Mangki bawi Felix hmaiah suak ai Paul tazacuaihnak rel i.

² Cen Paul khiah ko ai danthiam Tertullas in Paul sual hlukhnak heh hetihin rel i: “Mangki bawi, fimhnak thawn nangmah in kin hoi manin can raipui daphnak ngah tlang ai kin ram phathnak hrangah remm kulhnak tampui remm zo isi.

³ Hemi kin hmu fangin na bawnhnak tepawl heh khuahacang ah mi in lungkhim ai na vumah ang ngai i.

⁴ Na can tam ze na lang sah pang fangin ti kin lau manin i rel nuamhnak heh a com thai tawp in rel tuhai ninghio niu in i ngai sah tu hram law.

⁵ Hemi pa heh mi buaitiar thai ngai le a laukul i tiin hmu tlang i ing. Laivum nuamhmuncang ah Judah mite buaitiar ṭiode ai Nazareth bu tihnakte songah a konghoitu amah i.

⁶ Kin Biakinn ningrimtiar tum ai cialak fangin pom i ing. (Cen kin dan bangin a thu rel tum i ing;

⁷ ikhalselai ralbawipa Lisias kawi ai khengkhebel in kin sut i.

⁸ Cia hnuaah Lisias in Paul tazacuai a hiamtute tu na hnenah feh tuseh, tiin thupe i). Nangmah in he pa heh thu zawt lesikhaw amah hnenin sual kin hlukhnakte heh nangmah rori in ling tuh ngawn isi,” tiin ti i.

⁹ Ciatih ai a relhnak khiah Judah mite inkhai bawm ai a relhnak heh amahte veksen in a dik rori i ti tlang i.

Paul In A Ṭanhnak Thu Felix Hmaiah Rel I

¹⁰ Mangki bawi in Paul khiah thu rel tuhin a kut in zap ai Paul in Mangki bawi hnenah: Nangmah heh he ram songah kum raipui thukhantu i si ti kaimah in ling ai tunah na hmaiah ṭanhnak rel tuhin can nai manin i ang ngai i.

¹¹ Jerusalem ah Pathian bia tuhin i fehhnak heh ni hlaihnih tahin tam lai lo i, ti khiah ling tuh na um ing.

¹² Biakinn songah aisu pakhat bang thawn khai thu el dun hnelhno lo i ing, ti khiah Judah mite in ling sio i. Synagogue ah ituseh, khuapui song hmun dangdang ah ituseh, mizapui i holtokhnak hmu tlang tuh hrimhrim lo i.

¹³ Cen tunah na hmaiah sual i hlukhnakte heh a dik rori i tiin na hmuh ben tuh fawn lo i.

¹⁴ Kaimah in bawn taktak ing tiin na hmaiah i ti hiamhnak tu hemi i: Kin pupate ai Pathian i biahnak ah lampui kin tihnak hlun ing; anite in cia lampui tu a dik lo i ti i. Ikhalselai Moses dan songai nganhnak hmuahhmuah le prophette ai nganhnak laibu songai umhnak hmuahhmuah khai sang sio ing.

¹⁵ Anite bang thotho in kaimah khai Pathian hnenah umlamhnak nai ve ing. Ciami umlamhnak tu, mi zongzong in, mipha khai mi hnawm khai, thihhnak in tho leh tuh i, tihnak i.

¹⁶ Ciatihin Pathian hmai le minung hmaiah thinlung thianglohnak nai tuh loin i zuam thai tawp in zuam ṭiode ing.

¹⁷ Kum raipui song Jerusalem khua hleng nawn lo manin i miphunte bawmhnak ah tangka pe tuhin le hibawlhnak sel tuhin Jerusalem ah feh ing.

¹⁸ A dan bangin cianghlimdunhnak bawn ben sio hnuaah a vumai i relhnak tepawl i bawn laitak ah Biakinn songah i hmu tlang i. Cialai ah i hnenah miburpui um lo i; buaihnak khai um lo i.

¹⁹ Ikhalselai ciata ah Asia ram in a hlengtu Judah mi hrekkhat um i. Ciamite tu i vumah lungkhim lohnak nai lekhaw na hmai rori ah anite kawi in mawh i hlukhnak rel tuh vehnak i.

²⁰ Ihlahle heta ai a umtute in Council upate hmaiah i ding laiah a sual i tiin a hmuhnak na rel tlang tuseh.

²¹ A hmaiah i ding laiah thil pakhat ian i aupuihnak um i: ‘Mi thite tu nunhnak ah tho leh tuh i,’ tiin i sang manin tunnia ah taza i cuai tlang i,” tiin rel i.

²² Cen Felix tu ciami Lampui thula phatak niu in a lingtu imanin a thurelhnak comruai ai, ‘Ralbawipa Lisias a hleng fangin ning thu rel leh tuh ing,” tiin ti i.

²³ Pual a kiltu ralbawi tu, “Paul heh phatak niu in kilkhawl tu ilai, luatruai tu deuh ilai a kulhnak tepawl heh a rualpuite in pe tuseh,” tiin ti i.

²⁴ Ni tlawmniu a rai hnuaah Felix tu a nupui Drusilla thawn kawi kawm i. Drusilla tu Judah mi i. Paul khiah ko ai Paul in Jesuh Khrih sanghnak thula rel ai ngai tlang i.

²⁵ Ikhalselai Paul in phathnak thu, amah le mah supdunhnak thu le a hleng tuh Thukhanhnak Nia thute a rel fangin Felix tu a thinlau ai, “Tun tu let rih tu. Can i nai fangin na ko leh tuh ing,” tiin ti i.

²⁶ Felix incen Paul in tangka i pe selai tiin umlamhnak nai i. Ciamanin Paul khiah ko leklo de ai thu rel kawm de i.

²⁷ Kum hnih a khim hnuaah Mangki Felix tu Porsius Festus in sawng i. Judah mite hnenin mithmai pha a ngah nuam manin Felix in Paul khiah suah loin thawngtoh meng i.