Tirhthalahle 23 - Zanniat Bible

¹ Paul in Council upate khiah hmaicang rori in sik ai, “I miphunpui Israel mite, tun nia tian Pathian hmaiah i nundan ah ruathnak thiang lo tlawmniu bangkhai nai lo ing,” tiin ti i.

² Suangbawi Sang Ananias in Paul hiangai a dingtute hnenah Paul heh a kahmur beng tuhin thupe i.

³ Ciafangin Paul in, “Nang si ngo mathnak bangkhang, Pathian in nangmah na beng tuh i. Dan bangin i thu rel tuhin khiata ah to isi; ikhalselai ‘Beng tu ih,’ ti ai thu na pehnak in cia dan bal isi!” tiin sawn i.

⁴ Paul hiangai a umtute in, “Pathian ai Suangbawi Sang zohsuam isi!” tiin Paul heh ti tlang i.

⁵ Paul in, “Israel mi u le naute, Suangbawi Sang i, ti ling lo ing! Lai Thianghlim songah, ‘Na miphun uktu relsia mah,’ tiin um i,” tiin ti i.

⁶ Paul in a kawitute lakah a hrek tu Sadusite a hrek tu Farasite i, ti khiah a hmu fangin Council upate hmaiah au ai, “I miphunpui Israel mite, kaimah heh Farasi mi ing, Farasite ai fapa ing. A thi mite nung leh tuh i, tiin umlamhnak i nai manin tun heta ah tazacuai tuar ing,” tiin ti i.

⁷ Ciatihin a rel ben sawng fangin Farasite le Sadusite tu hau tlang ai ciata ai a umtute lakah khekdunhnak suak i.

⁸ (Zaimantifangin Sadusi mite incen minung heh a thi hnuaah tho leh tuh nawn lo i; vancungmi khai um lo i, rauhla khai um lo i, tiin ti tlang i. Ikhalselai Farasite incen a pathum in um i tiin sang i).

⁹ Amahte auhnak cawm amam ai Farasi mi Danthiam mite hrekkhat tu ding in roh ngai in au tlang ve i: “Hemi pa sualhnak heh tlawmniu bangkhai hmu lo i ing. Rauhla ihlahle vancungmi in a hnenah rel ngaingai i thai pang nakhaw!” tiin ti tlang i.

¹⁰ A roh ze in hau tlang manin Paul heh hlikhlai sek mawh ngai tiin ralbawipa a thinlau i. Ciamanin misenpui lakin Paul heh fehpui in hmunkulh ah hoi tuhin a ralkapte thupe i.

¹¹ Cia zan ah Bawipa khiah Paul hiangah ding ai, “Paul, zaikhai lau mah! Heta Jerusalem khua ah i thu lingpuitu ihang si, hetih bang thotho in Rome khua ahkhai i tuhlai isi,” tiin ti i.

Paul Rek Tumhnak

¹² A thangha ah Judah mite hrekkhat taikhawm ai khuaruat tlang i. Paul rek ngah hlanah rong ai tuh loin le ti khai ding tuh loin thukham tlang i.

¹³ Ciatih ai hmunkhat ah khua a ruattu heh minung sawmli zolo i.

¹⁴ “Ciatihin suangbawi upa le a dang upate hnenah feh tlang ai, “Paul kin rek ngah hlanah zaikhai ai tuh lo le ding tuh loin thutiam zo i ing.

¹⁵ Ciamanin ningmah le Councilte in Rome ralbawipa hnenah thucah tu ilai, Paul ai thula a khim deuh in ling kin hiam i, tiin ti khel tu ilai, Paul khiah heta ah koihruai tu ih. Cen kinmah in bawh tuhai heta a hleng man hlanah rek tuh i ing,” tiin ti i.

¹⁶ Ikhalselai Paul farnu ai fapa in ciatih ai a bawhhnak ling ngah manin hmunkulh ah feh ai Paul khiah rel i.

¹⁷ Cen Paul in ralkap pakhat khiah ko ai a hnenah, “Hemi tlangval pa heh ralbawipa hnenah fehpui tu; thuruah tuh pakhat nai i,” tiin ti i.

¹⁸ Cia ralbawi in hoi ai a hotu ralbawipa hnenah fehpui ai, “Thawngtla pa Paul in i ko ai he tlangval pa heh na hnenah koih tuhin i ruai i, zaimantifangin thu pakhat na rel tuh nai i,” tiin ti i.

¹⁹ Amahte hotu ralbawipa in tlangval pa khiah a kut in hoi ai a pahnih lek feh kawm ai, “Ziang i rel na nuam heh i?” tiin zawt i.

²⁰ Tlangvalpa in, “Judah mi hotu upate in Paul thula ah Council upate in a semkhim deuh in thu ling nuam i tiin ti khel tuhai thangha ah Paul khiah Council upa hnenah fehpui tuhin na ngen tuhin lungkhimhnak nai tlang zo i.

²¹ Ikhalselai amahte thu heh ngai nuam malaw; zaimantifangin minung sawmli zolo in Paul khiah bawh tlang tuh i. Paul rek ngah hlan ahcen zaikhai ai tuh lo le ding tuh loin thutiam tlang i. Tunah ralring cialep zo ai nangmah ai relcat tuh ian iang tlang i,” tiin rel i.

²² Ralbawipa in, “I hnenai na relhnak heh aisu hnen ahkhai phuang mah,” tiin ti ai tlangval pa khiah tlungruai i.

Mangki Felix Hnenah Kuat I

²³ Cen ralkap hotu ralbawipa in a kuthnia ai ralbawite pahnih ko ai, “Ceasarea ah feh tuhin ralkapte zahnih pai cia tu ih. Cen siphuh vumto ralkapte sawmsarih le faipui ralkapte zahnih khai pai cia tu ilai tun zan nazi pakua ah suak thil tuhin ralring tuseh.

²⁴ Paul to tuhhnak siphuh khai pai cia tu ilai Mangki bawi Felix hnenah himniu in hlen tu ih,” tiin ti i.

²⁵ Cen ralbawipa in a hnia lamai bangin lai kuat i.

²⁶ “Claudius Lysias in Mangki bawipa Felix hnenah hnuksat in lai na kuat ing.

²⁷ Na hnenai i kuathnak pa heh Judah mite in pom ai rek tum tlang i. Rome rammi i ti kaimah in ling ai i ralkapte thawn hup i ing.

²⁸ Sual amahte hlukhnak heh ziang ini ti ling nuam in Council upa hnenah fehpui ing.

²⁹ I ling ngah fangin a sualhnak tu rek tlak ilo ai thawngtoh tlak sualhnak khai ilo i; sual hlukhnak khiah amahte dan thula menma i.

³⁰ Cen amah rek nuam in khuakhan tlang i ti ling manin na hnenah na kuat taito ing. Sual a hluktute khai na hnenah kawi in na hmai rori ah tazacuai tuhin rel ing,” tiin kuat i.

³¹ Ralbawipa ai thupehnak bangin ralkapte in bawn i. Paul khiah fehpui ai cia zan ah Antipatris tian fehpui i.

³² A thangha fangin lai ralkapte tu let ai siphuh vumto ralkapte in hlun i.

³³ Ceasarea khua ah hlen ai Mangki Bawipa kut ah laikuat a pe hnuaah a kut songah Paul heh ap tlang i.

³⁴ Mangki bawi in laikuathnak siar ai, “Akon peng in kawi isi?” tiin Paul khiah zawt i. Cilicia peng in i, ti a ling fangin a hnenah,

³⁵ “Tazacuaitute a hleng fangin na thu rel leh tuh ing,” tiin ti i. Cen Paul tu Kumpibawi Herod ai sa awnghnak innpui Mangki bawi ai zung songah ralkap in kil tuhin thupe i.