Tirhthalahle 22 - Zanniat Bible

¹ Paul in, “U le nau, nu le pate, ning hmaiah i ṭanhnak thu i rel fangin i ngai tu ih! ti i.

² Hebrew in pong manin misenpui tu dap tlang khep i. Cen Paul in peh lehsal ai:

³ “Kai tu Cilicia peng Tarsus khua ai tehnak Judah mi ing. Ikhalselai heta Jerusalem khua ah a khangmi pakhat ing ai Gamaliel ai zirhmi pakhat ing. Kin pupate ai dan fel ngai le fek ngai ai zirhmi pakhat ing. Tun heta ai a hlengtu ningmah bangin Pathian hnenah pumpetu pakhat ve ing.

⁴ Bawipa ai lampui hluntute heh rek in reem awng ing. Nupang tilo, pasal tilo kaimah in pom ai thawng toh ing.

⁵ Suangbawi Sang le Council upate tu thudik i relhnak a lingtute i. Cia upate hnenin Damascus khua ai Judah unaute hnenah pe tuhhnak lai keng in Bawipa ai lampui hluntute heh pom ai thir cikcin thawn khit in Jerusalem khua ah fehpui tuhin le reem tuhin Damascus khua ah feh ing.

Paul A Lungthlenghnak Rel I

⁶ “Ciatihin feh ai Damascus i hleng dawn fangin, sun laivar ah vancung in a tleu bikraw tleuhnak in i cingkim heh rinlopui in i det surso i.

⁷ Lai lakah i tlu ai aw pakhat in, ‘Saul, Saul, Zaimanin i reem i si?’ tiin i ti khiah za ing.

⁸ Ciafangin, ‘Bawipa, aisu isi?” tiin zawt ing. Ani in, ‘Na reemhnak Nazareth mi Jesuh ing,’ tiin iti i.

⁹ I kompuite in tleuhnak tu hmu napui i pontu ai aw tu za tlang lo i.

¹⁰ ‘Ziang bawn tuh ing, Bawipa?’ tiin zawt ing. Bawipa in, ‘Tho in Damascus khua songah feh tulai na bawn tuhin Bawipa in a tumtekciahnak hmuahhmuah khiah na rel tuh i,’ tiin ti i.

¹¹ A tleu ze manin mit i vai ai i rualpuite in i kut in Damascus ah i fehpui i.

¹² Cia khuapui ah Ananias tu dan hluntu, biahnak lam a zuamtu le ciata ai umtu Judah mi hmuahhmuah ai upatmi i.

¹³ Ananias tu i hnenah kawi ai i hiangah ding in, ‘Unau pa Saul, khua hmu leh tuhang,’ tiin ti i. Cia sawng fangin khua hmu leh ai amah heh sik ing.

¹⁴ Ani in, “Kin pupate ai Pathian in amah ai daihhnak a lingtu tuhin le Midikcang pa hmutu tuhin le amah ai aw rori zatu tuhin na ril zo i.

¹⁵ Zaimantifangin na hmuhnak le na zahnak heh mi zongzong hnenah reltu tuhin Amah ai thulingtu tuh ihang si.

¹⁶ Ciatih imanin raipui iang nawn mah! Tho tulai amah hming ko kongin baptisma lang tulai na sualhnak somciang tu,” tiin ti i.

Gentile mi Hnenah Thurel Tuh

¹⁷ “Cia hnuaah Jerusalem ah let ai Biakinn songah saw i ngen laiah larhnak hmu ing.

¹⁸ Cia larhnak ah Bawipa hmu ai i hnenah, ‘Tho tulai rang ngai in Jerusalem an suak tu, zaimantifangin he khua mite in i thula na phuanghnak heh pom tuh lo i,’ tiin ti i.

¹⁹ Kai in, “Bawipa, synagogue ah feh ai nangmah na sangtute khiah pom in i vit dekdo de khiah anite in ling sio i.

²⁰ Cen na thulingtu Stephen rek fangin kaimah rori um ai a rekhnak khiah lungkhimpui hlaiah a rektute ai ponte a awh sahtu ing,’ tiin ti ing.

²¹ Bawipa in, “Feh tu; lamhlapui Gentile mite hnenah na hlat tuh ing,’ iti i,” tiin Paul in rel i.

²² Ciami a rel tian tu misenpui in phatak niu in ngai i. Ikhalselai cia hnuaah amahte aw naih tawp in, “Khia pa heh pai tu lio seh! rek tu ih, nung tlak lo i” tiin au tlang dekdo i.

²³ Amahte veksen in aw naihtawp in au tlang ai amahte hnikpon zap in laivut khiah van lamah hlik tlang dekdo i.

²⁴ Rome ralbawipa in a ralkapte hnenah Paul khiah hmunkulh songah fehpui tu ilai zaimanin misenpui in hetlukin hua ai au tlang ini ti linghnak tuhin fungkek in vit tu ih, tiin thupe i.

²⁵ Ikhalselai fungkek in vit tuhin a pen ben sio fangin Paul in ciata ah a dingtu bawi pakhat hnenah, “A sual thukhan lai lo Rome mi pakhat heh vit dan ini im?” tiin zawt i.

²⁶ Cia thu a za fangin cia bawi tu ralbawipa hnenah feh ai, “Ziang bawn isi? Khia pa heh Rome rammi nakhaw!” tiin ti i.

²⁷ Ciamanin Paul hnenah kawi ai, “Rome mi isim? I rel tu,” tiin ralbawipa in zawt i. “Ing,” tiin Paul in ti i.

²⁸ Ralbawipa in, “Kaimah khai tangka tampui i pe hnua fangin Rome mi i cang i,” tiin ti i. Paul in, “Kai tu suahkeh in Rome rammi ing,” tiin sawn i.

²⁹ Cia sawng fangin Paul thuzawt a tumtute tu khel ah let tlang sio i. Ralbawipa in Paul khiah Rome rammi i ti a ling hlaiah Rome rammi thir cikcin thawn a khit khiah a ling leh fangin thinlau roh i.

Council Hmaiah Paul Hlenpui I

³⁰ Ralbawipa in Judah mite in Paul vumai sual hlukhnak heh ziang ini, ti lingfiang nuam manin a thangha ah Paul ai thir cikcin hawkruai ai Suangbawi upate le Council upate veksen taikhawm tuhin thupe i. Cen Paul tu fehpui ai amahte hmaiah dingruai i.