Tirhthalahle 21 - Zanniat Bible

Jerusalem Ah Paul Feh I

¹ Kinmah inkhai hnuksat ai feh i ing. Lawng in a konteng ah khai tanglawk loin feh ai Cos hleng i ing, a thangha fangin Rhodes tikulh ah hleng ai ciata in Patara ah lan teu i ing.

² Ciata ah Phoenisia ah a feh tuh lawng tawk ai cia lawng ah thawn ai feh tlang i ing.

³ Cyprus tikulh hmuh hmun hleng fangin ciata in hlang lamah her ai Syria lamah lan i ing. Tyre khua ah tolh tlang ai ciata ah lawng thil phurhnak tepawl hma i.

⁴ Ciata ah hnuahluntu hrekkhat um ai anite hnenah zarh khat um i ing. Rauhla ai relhnak thawmin Paul tu Jerusalem ah feh tuh loin dawn i.

⁵ Ikhalselai amah thawn kin um tlang tikcu a bo fangin suak ai feh i ing. Anite inkhai amahte veksen in a nupui le fate thawn tipui kam tian kin hla tlang i. Ciata ah kin veksen in khuk caicin in sawngen i ing.

⁶ Cen pakhat le pakhat hnuksatdun ai kin tu lawng vumah kai ai anite tu inn ah tlung tlang i.

⁷ Tyre khua in lawng in feh ai Ptolemais khua ah hleng i ing. Ciata ah sangtu unaute tawk kong zianzo ai anite hnenah ni khat um i ing.

⁸ A thangha fangin suak lehthio ai Ceasarea hleng i ing. Ciata ah Jerusalem ai upa rilmi pasarih lakai pakhat Pathian thureltu Philip ai inn ah cam i ing.

⁹ Pasal nai lai lo fanu fenu pali nai ai Pathian thu a phuangtu prophette i.

¹⁰ Ni tam thah kin um hnuaah Judea ram in prophet pakhat Agabus tihnak hleng i.

¹¹ Kin hnenah kawi ai Paul ai elpen a lang hnuaah a kut le a ke khiah cia elpen in pen ai, “Rauhla Thianghlim in hetihin ti i: he elpen a naitu pa heh Jerusalem khua ah Judah mite in hetih bangin pen tuhai Gentile mite ai kut songah pe tuh i,” tiin ti i.

¹² Ciami kin za fangin kinmah in ituseh, midang inkhai ituseh, Paul tu Jerusalem ah feh tuh loin dawn tlang dekdo i ing.

¹³ Ikhalselai Paul in, “Zaimanin hetihin um tlang i si! Hetihin ning kap manin lung i zur amam i! Bawipa Jesuh ca ahcen Jerusalem khua ah pen le hen lek ilo in thi tuh tian rin ralring cialep ing,” tiin ti i.

¹⁴ Akontih in khai kham thil tlang lo manin, “Bawipa ai daihhnak bangin i tuhang seh,” tiin ti tlang i ing.

¹⁵ Ciata ah can tawkfang song kin um hnuaah pai ai Jerusalem ah feh tlang i ing.

¹⁶ Ceasarea ai a umtu hnuahlunte hrekkhat in kin hlun tlang ve ai kin cam tuh hmun Mnason ai inn ah kin fehpui i. Mnason tu Cyprus mi i ai hlanlai in hnuahluntu awng zo i.

Paul In James Leng I

¹⁷ Jerusalem kin hleng fangin sangtu u le naute in ang ngai in kin hmuak i.

¹⁸ A thangha fangin James tawk tuhin Paul thawn feh kawm ai pawlpui upate khai khim tlang liang i.

¹⁹ Paul in hnuksat zianzo ai amahte vumah anghnak thu rel ai a naperhnak hmang in Pathian in Gentile mite lakai a bawnhnak hmuahhmuah khai a semkhim liang in rel i.

²⁰ Ciami za fangin amahte in Pathian thangphat tlang i. Cen anite in, “Kin upa Paul, Judah mi songin mi thawng zaimaw zah sangtu cang zo ai dan hlunhnak ah zaitlukin zuam tlang i, ti khiah hmu sio isi.

²¹ Gentile ram songai a ummi Judah mi hmuahhmuah hnenah Moses dan zangtak tuhin le a fate zarhtan tuh nawn loin le Judah dante hlun tuh nawn loin Paul in zirh i, tiin heta ai umtute in za i.

²² Tunah heta ah ning hleng heh ling tuh zo i ai akontih in ti tuh ising?

²³ Hetihin bawn silai pha tuh i, tiin ruat i ing, heta ah thukhamhnak a bawn zo mite pali um i.

²⁴ Anite thawn feh tulai cianghlimdunhnak ai bawn dehnak dan bangin bawn tu ve lai a bohnak tangka khai pe sah tu; cen amahte sam met thil tuh i. Ciatihin nangmah rori in Moses dan khiah hlun ai na za cia thula heh thudik zaikhai um lo i, ti khiah ling tlang tuh sio i.

²⁵ Gentile mite sangtu ai a cang mite ai thula ah kinmah in laikuat zo ing. Lai kin kuathnak songah milim hnenah selhnak ti le rong ai tuh lo, sathi ai tuh lo, hawng dik ai rohnak sa ai tuh lo, nu le pa sualhnak bawn tuh lo, tiin kin relciahnak khiah kuat zo i ing,” tiin ti i.

²⁶ Ciamanin Paul in a thangha ah ciamite pali tu fehpui ai anite thawn amahte dan bangin cianghlimdunhnak bawn tlang i. Cia hnuaah Biakinn songah lut tlang ai cianghlimdunhnak heh zaifangin bo tuh i, ti le zaifangin hibawl sel kul ṭen i tihnak thu khiah rel i.

Biakinn Songah Paul Pom Tlang I

²⁷ Ni sarih a khim dawn fangin Asia ram in a hlengtu Judah mite hrekkhat in Biakinn songah Paul hmu tlang i. Mipui khiah holtok tlang ai Paul khiah pom i.

²⁸ “Israel mite, kin bawm tu ih! He pa tu khuahacang ah feh in Israel mite ituseh, Moses dan ituseh, he Biakinn ituseh, relsia in thuzirh betbotu i. Tunah he Biakinn songah Gentile mite rin lutpui ai he hmun thianghlim hmuah ningrimtiar sio zo i! tiin au tlang i.

²⁹ (Hetih ai amahte auhnak tu Ephesa khuami Trophimus khiah Paul thawn Jerusalem khua songah hmu manin Biakinn songah lutpui i, tiin ruat manin i).

³⁰ Khuapui song tu a veksen in buaihnak in dim ai mizapui tu dawp tlang ai Paul khiah pom in Biakinn songin duk i. Cen cia sawngpah in Biakinn dawngkhamte kham i.

³¹ Mizapui in Paul rek tum hnelhno lakah Jerusalem khuapui khuasen in ral tho i tiin Rome ralkap hotu ralbawipa hnenah thuthan tlang i.

³² Cia sawngpah in ciami ralbawipa tu ralbawi dang le ralkapte thawn dawp tlang i. Mipui in ralkapte thawn ciami ralbawipa hmu fangin Paul vit khiah com i.

³³ Ralbawipa tu Paul hnenah kawi ai a pom hnuaah thir cikcin pahnih in khit tuhin thupe i. Cen misenpui tu, “Hemi pa tu aisu i? Ziang sualhnak bawn heh i?” tiin zawt i.

³⁴ Mipui songin mi hrekkhat tu phundang in au tlang ve i. Thu buai ze lawmlam hang ai, ralbawipa in ziang cang i ti lingfiang lo manin ralkapte khiah Paul tu hmunkulh songah lutpui tuhin thupe i.

³⁵ Ciatihin fehpui tlang fangin kaipum tian lek hlenpui ben i; ciahnua tu misenpui neh thil lo manin Paul tu ralkapte in a zawng in zawng tlang i.

³⁶ Amah khel lamin nor tlang betbo ai, “Rek tu ih,” tiin au kong betbo i.

Paul In Amah Ai Ṭanhnak Thu Rel I

³⁷ Ralkapte in Paul tu hmunkulh songah lutpui dawn fangin Paul in ralbawipa hnenah, “Thu pakhatniu na rel thil ni tur ing?” tiin zawt i. Ralbawipa in, “Greek pong thiam isim?

³⁸ Ciatih ilekhaw kin hnua a rai thahpui ah ral tho ai ral thuam thawn mi thawng li ramkhing ah a tlanpuitu Egypt pa ngawn ilo na vuah bang ing?” tiin zawt i.

³⁹ Paul in, “Kai tu Judah mi ing. Cilicia ram Tarsus khua ai tehnak, khuapui hmingthang ai umtu ing. Mizapui hnenah thurelhnak can i pe tu hram,” tiin ngen i.

⁴⁰ Ralbawipa in thurelhnak can pe ai, ciamanin Paul tu kaipum vumah ding ai mi senpui tu dap tuhin a kut in zap i. Mipuite dap fangin Paul in Hebrew pong in anite hnenah thu rel i.