Tirhthalahle 20 - Zanniat Bible

Macedonia Le Achaia Ram Ah

¹ Cia thubuai tu dap ai Paul in sangtute tu hmunkhat ah kokhawm ai thapehnak pongkam in a forh hnuaah hnuksat ta ai Macedonia lamah feh i.

² Cia ram dunghlun tlawng zianzo ai thapehnak rel betbo i. Cen Achaia hleng ai,

³ Ciata ah hla thum um i. Syria ah feh tum napui, a pai laitak ah Judah mite in a zuar tum thu a ling manin Macedonia lamin let tum leh i.

⁴ Berea khuami Pirhas ai fapa Sopater le Thessalonica khuami Aristarchus le Secundus, Derbe khuami Gaius, Asia ram in Tychicus le Trophimus, le Timothy inkhai paul fehpui tlang i.

⁵ Amahte feh lak songah Troas khua in kin iang tlang i.

⁶ Col Tello Sang Puai a bo hnua Philipi in lawng thawn feh tlang ai ni nga hnuaah Troas ah man ilai ing. Troas ah zarh khat cam i ing.

Paul In Troas Hnuataber Tlawng I

⁷ Cani nia zan lamah pawlkomhnak zanfak ai tlang tuhin taikhawm tlang i ing. A khawmtute hnenah Paul in thu rel ai a thangha feh tuh hang manin zan seulai tian thurel i.

⁸ Vumta khan ah khawm ai maikhuat tampui var bial i.

⁹ Eutychus tihnak tlangval pakhat tu dawngkhamniu ah to ai Paul in raipui thu a rel fangin a mitmu sung deuhdeuh ai hnuavai fangin mitmu ngah lio manin cia inn thuah thumhnak in laipua lakah tlok i. A khul tlang fangin thi zo ihang.

¹⁰ Ikhalselai Paul khai tolh taito ai cia tlangval pa heh huam vut i. Paul in, “Ning thin lau mah ih, nung lai i,” tiin ti i.

¹¹ Cen Paul tu vumta khan ah kai leh teu ai sang khiah khan ai ai tlang i, Paul tu a rai roh, zing lam nisuak tian thu a rel hnuaah feh i.

¹² Cia tlangval pa tu a nung in a inn ah tlun leh ai thinnuam tlang ngai i.

Troas In Miletus Ah

¹³ Lawng vumah kai ai cia lawng thawn Assos khua ah feh tlang i ing; Assos ah Paul sawm kong tuh i ing. Ciatihin sawm kong tuh heh amah in kin rel cia i, zaimantifangin lai lampui in ani tu feh cia zo i.

¹⁴ Assos ah Paul tawk tlang ai kin lawng vumah toruai ai Mitylene ah feh i ing.

¹⁵ Mitylene in suak ai a thangha ah Khios hleng i ing. A tit nia fangin Samos hleng ai a thiam nia ah Miletus hleng i ing.

¹⁶ Paul in Asia ramah a rai cam tuh nuam lo manin Ephesa lan tuh teu tum i. Cang thil iselai Pentecost nia khel in Jerusalem ah hleng nuam taito i.

Paul Ai Hnuataber Thucahhnak

¹⁷ Paul in Miletus mi hlat ai Ephesa khua pawlpui upate in amah tawk tuhin thucah i.

¹⁸ Amahte hleng fangin Paul in, “Kaimah Asia ram hleng ai a ni khathnak nia in i can hmuahhmuah ning hnenah zaitin hmang ing ti ling sio hlen i si.

¹⁹ Thinniamhnak le mithli thawn Bawipa ruaih ai Judah mite ai engsanhnak khai har fualfo in tuar ing.

²⁰ Zapui hmaiah ituseh, ning inn songah khai ituseh, thurelhnak can i nai fangin ning caah bawmtu tuh hmuahhmuah in zaikhai sup loin rel ing tikhai ling i si.

²¹ Judah mite hnenah ituseh, Gentile mite hnenah ituseh, amahte sualhnak zam in Pathian hnenah let tlang ai kin Bawi Jesuh sang kul hrimhrim tiin i rel lek zolo in ralringhnak khai pe ing.

²² Cen tunah Rauhla Thianghlim ai hoihnak hlun in Jerusalem ah feh tum ing; ciata ah ziang i cang tuh i ti zaikhai ling lo ing.

²³ Khua cangcang ah thawngtoh le harsahnak ian in i iang i, ti ian Rauhla Thianghlim ai ralring pehnak thawmin ling ing.

²⁴ Ikhalselai kaimah caah i nunhnak heh zaikhai siar lo ing; Bawipa Jesuh in bawn tuhin i ruaihnak Pathian ai ninghiohnak Thuthangpha phuang tuh ṭuanvo heh hlehsuah liang in bawn tuh sio heh i hiamhnak i.

²⁵ Ning veksen hnenah kaimah heh suk le so ah vak ai, Pathian ai Ukhnak thu ning rel ing. Ikhalselai tun tu aisu inkhai i hmu leh tuh nawn lo ihang, ti khiah ling ing.

²⁶ Ciamanin tun nia ah fiang ngai in ning hnenah phuang ing: ningmah lakah pakhatkhat ning pairal lekhaw mawh i hluk mah ih.

²⁷ Zaimantifangin Pathian ai tumtekhnak khiah suphnak zaikhai nai loin a veksen in ning hnenah phuang sio ing.

²⁸ Ciatih imanin ningmah veve kilkhawl thiam tu ilai Rauhla Thianghlim in tuurual kilkhawltu tuhin ning dah bangin ning tuurual khiah phatak niu in kilkhawl tu ih. Pathian in a Fapa thisan thawn amah caah a bawn zohnak a pawlpui khaltu cang tu ih!

²⁹ Kai i feh hnuaah a kihkul mehleng puar kawi tuhai tuurualte heh sik tuh menma lo i, ti ling ing.

³⁰ Ningmah songin mihrek in amahte lamah hoi nuam in thudonrel in sangtute heh hoisualhnak tikcucan hleng tuh i.

³¹ Ciamanin ralring tu ilai sun tilo zan tilo mithli thawn kum thum song ning veksen in i zirhhnak khiah hai mah ih.

³² Tun tu Pathian ai kilkhawlhnak le a ninghiohnak thu songah ning ap zo ing. Amah in ning khangsoruai tuhai a minungte caah a dahciahnak hmuifu khiah ning pe tuh i.

³³ Aisu ai tangka, sui le hnikpon khai ot awng lo ing.

³⁴ I kut rori in naper ai kaimah le i rualpuite ai kin kulhnak thil khai suahpui ve ing ti khiah ning ling sio hlenhnak i.

³⁵ Zaizongza ah roh ngai in per ai santlai lo mite bawm tuh ising ti khiah ning hmuh zo ing; Bawi Jesuh inkhai, ‘Ngah lam tahin pehnak lamah anghnak tam sawn i,’ a tihnak ponkam heh hih tu ngio ih,” tiin thucah i.

³⁶ Paul in ciatihin a rel ben fangin a khuk caicin ai amahte veksen in sawngen tlang i.

³⁷ Paul tu kuah tlang thut tlang ai cak niu in feh tu, ti kongin amahte veksen in kap tlang dekdo i.

³⁸ Aisu inkhai i hmu leh tuh nawn lo i si, a ti manin anite lungsia cuang khiah i. Cen lawng umhnak tian hla tlang i.